1 Iei usun mine ewe Samol mi Lapalap a apasa fänäsengesin ekewe chon Amon, “Ifa usun, esap wor nöün Israel mwän? Ifa usun, esap wor eman älemwirin? Pwota chök ekewe aramas mi fel ngeni Milkom ra angei fanüen chon ewe ainangen Kat o imweimw lon ar kewe telinimw? 2 Nge epwe war ewe fansoun üpwe föri pwe ekewe chon Amon mi nom lon ewe telinimw Rapa repwe rongorong akürangen maun. Ewe telinimw epwe wiliti eu ioien mettoch mi tala, nge wisoposopun kewe repwe karala. Mürin chon Israel repwe angeesefäli fanüer seni chokewe mi angei seniir me mwan. Ngang ewe Samol mi Lapalap üa kapas.

3 Oupwe puchör, ämi chon Hespon, pun Ai a tala. Oupwe ngüngüres, ämi föpwülün Rapa. Oupwe üföüf üf seni tuk o kechü. Oupwe säfeil me lon tittin ewe telinimw. Pun ämi we kot Milkom epwe oola fiti nöün kewe souasor me nöüwis. 4 Pwota oua aingaing won ämi kewe lemol, ämi aramas ousap allükülük? Oua anomu ämi apilükülük won wöümi o apasa, ‘Iö epwe tongeni maun ngenikich?’ 5 Nengeni, üpwe awarato niuokus watte womi seni ekis meinisin. Repwe asükemiila ämi meinisin, nge esap wor eman epwe achufengeni ekewe choisä. Ngang Kot ewe Samol mi Unusen Manaman üa kapas. 6 Nge mürin ekoch fansoun üpwe aliwinisefäli ekewe chon Amon mi oola. Ngang ewe Samol mi Lapalap üa kapas.” ✡ Is 21.28-32; 25.1-7; Am 1.13-15; Sef 2.8-11

7 Iei usun mine ewe Samol mi Unusen Manaman a apasa fänäsengesin Etom, “Ifa usun, esap chüen wor tipachem me lon Teman? Ifa usun, än ekewe chon mirit öüröür a wesila? Ifa usun, esap chüen wor ar tipachem? 8 Ämi chon Tetan, oupwe kul o sü, oupwe op lon ekewe föimw mi alolol. Pun üpwe awarato feiengau won ekewe mwirimwirin Esau lupwen fansoun üpwe apwüngüür. 9 Lupwen chon kini föün irän wain ra feito remi, ifa usun, resap likiti ekoch föün? Nge lupwen chon solä ra feito lepwin, ifa usun, resap chök angei ükükün mine ra mochen? 10 Nge ngang üa angei meinisin seni ekewe mwirimwirin Esau. Üa pwärala ar lenien op, pwe resap chüen tongeni op. Nöür kewe semirit ra mäla, pwal pwiir me chon arur. Esap chüen wor eman lusun. 11 Oupwe likiti ngeniei nöümi semirit mi mäsen pwe üpwe tümwünüür. Nöümi kewe fefin mi mä pwülüer repwe apilükülüküei.

12 Are chokewe esap öchitiir ar repwe ün seni ewe kapen apwüng, nge ra fen wisen ün seni, ifa usun, oua ekieki pwe ämi ousap pwal küna apwüng? Apwi, oupwe fokun ün seni ewe kapen apwüng. 13 Üa pwon fän akapel itei pwe ewe telinimw Posra epwe wiliti och minen eniweniw me eu leni mi pön, aramas repwe turunufasei o leaweni lon ar kapasen ottek. Nge ekewe telinimw ünükün repwe pönüla tori feilfeilachök. Ngang ewe Samol mi Lapalap üa kapas.”

14 Üa rongorong eu pworaus seni ewe Samol mi Lapalap, nge eman chon künö a titila ren chon ekewe mwü pwe epwe apasa, “Oupwe amwichafengenikemi, oupwe feito, pwe oupwe maun ngeni Etom.” 15 Nengeni, ewe Samol mi Lapalap epwe akisuketiu me lein ekewe mwü, kopwe küna koput me lein ekewe aramas. 16 Än aramas niuokusituk me lamalamtekian lelukom ra atupuk, en ewe mi nom lon ekewe pwangen achau o nonom won ungen ewe chuk. Inamwo ika ka föri leniom wilitekia usun lenien ekewe ikel, epwe chök aturuketiu seni ikenan. Ewe Samol mi Lapalap a kapas.

17 Ewe Samol mi Lapalap a apasa, “Etom epwe wiliti och minen eniweniw. Meinisin mi pwerela ünükün repwe fokun niuokus o turunufasei pokiten an feiengau meinisin. 18 Etom epwe usun chök Sotom me Komora me ekewe telinimw ünükür, lupwen ra tala. Esap wor eman aramas epwe imweimw lon, esap pwal wor eman epwe saifeil lon. Ngang ewe Samol mi Lapalap üa kapas. ✡ Ken 19.24-25 19 Usun eman laion a towu seni ewe wöllap arun ewe chanpupu Jortan o feila ngeni eu lenien enen sip, iei usun üpwe müttir feito o asüela chon Etom seni fanüer. Mürin üpwe awisa ätewe üa filätä pwe epwe nemeni Etom. Iö epwe wewe ngeniei? Iö epwe pälüeniei? Meni souemwen a tongeni ü ngeniei? 20 Iei mine oupwe rongorong usun mine ngang ewe Samol mi Lapalap üa akota ngeni chon Etom, pwal mine üa ekiekietä ngeni ekewe chon Teman: Ellet repwe nukiela pwal ekewe semirit, nge aramas meinisin repwe rükö ren. 21 Fanüfan epwe chechech ren akürangen än Etom turutiu. Aramas repwe rongorong ar puchör me arun ewe Setipar. 22 Nengeni, ewe chon oputa epwe ässfeil o müttir ässitiu won Posra usun eman ikel a ässitiu o ameresala pöükässin won. Lon ena fansoun ekewe sounfiun Etom repwe niuokus usun chök eman fefin, lupwen a tori an cheuchen fam.” ✡ Ais 34.5-17; 63.1-6; Is 25.12-14; 35.1-15; Am 1.11-12; Op 1-14; Mal 1.2-5

23 Iei usun mine ewe Samol mi Lapalap a apasa fänäsengesin Tamaskus. Chon ekewe telinimw Hamat me Arpat ra rükö, pun ra rongorong pworausen afeiengau. Ra niuokus o mwökütüküt lon leluker ren ar osukosuk usun matau esap tongeni lüala. 24 Ekewe chon Tamaskus ra apwangapwangala, ra kul o sü fän niuokus watte. Riaföü me cheuch a cheriir usun eman fefin a cheri an cheuchen fam. 25 Ewe telinimw mi iteföüla o pwapwa a koturula. 26 Lon ewe rän alüalün ewe telinimw repwe mäla lon alan kewe, nge nöün kewe sounfiu meinisin repwe rosola. 27 Iwe, ngang üpwe aküw eu ekkei won tittin ewe telinimw Tamaskus, epwe kenala än Penhatat kewe imwen maun mi pöchökül. Ngang ewe Samol mi Unusen Manaman üa kapas.” ✡ Ais 17.1-3; Am 1.3-5; Sek 9.1

28 Iei usun mine ewe Samol mi Lapalap a apasa fänäsengesin Ketar me ekewe mwü Hasor a nemeniir, ir ekewe mwü Nepukatnesar ewe kingen Papilon a liapeni, “Oupwe ütä o maun ngeni Ketar. Oupwe arosala ekewe aramas mi nom ötiu. 29 Imwer imw mangaku me nöür pwiin sip repwe oola, pwal ar chechen lon imw me pisekir meinisin. Aramas repwe angei seniir nöür kamel o kökkö ngeniir, ‘Niuokus watte a nom pwelin ünükümi.’ 30 Ngang ewe Samol mi Lapalap üa fönöökemi, ämi mi nonom lon Hasor, pwe oupwe sü. Oupwe feila toau o op lon föimw mi alolol. Pun Nepukatnesar ewe kingen Papilon a rawangauakemi o ekiekietä eu akot ngenikemi. 31 Oupwe ütä o maun ngeni chon eu mwü mi nonomöch o kinamwe. Ar telinimw esap wor asamalapen tittin ika amwöchün, ir echök ra imwüla. Ngang ewe Samol mi Lapalap üa kapas. 32 Oupwe liapeni nöür kamel, nöür pwiin sip epwe choon wokumi. Üpwe atoropasafeili chokewe mi fichi mökürer, üpwe awarato feiengau wor seni ekis meinisin. 33 Hasor epwe wiliti eu leni ia kolak mi mwacho ra nom ie, epwe pönüla tori feilfeilachök. Esap wor eman epwe imweimw ie, esap pwal wor eman epwe fetal lon. Ngang ewe Samol mi Lapalap üa kapas.”

34 Iwe, ewe Samol mi Lapalap a kapas ngeni ewe soufos Jeremaia fänäsengesin Elam lepoputän mwün Setekia ewe kingen Juta. 35 Iei alon ewe Samol mi Unusen Manaman, “Nengeni, üpwe niela nöün Elam kewe chon esefich, populapen ar pöchökül. 36 Üpwe awarato won Elam ekewe rüanü asepwäl seni ekewe rüanü pelien läng. Üpwe atoropaseer ngeni ekei rüanü asepwäl. Iwe, esap wor eu mwü ia chokewe mi sü seni Elam resap feila ie. 37 Üpwe föri pwe chon Elam repwe niueiti chon oputer, chokewe mi mochen nirela. Üpwe afeiengaua ekewe chon Elam lon ai song mi fokun watte o tinala mwichen sounfiu mürir tori üpwe aroserela. 38 Üpwe niela ar we king me nöür kewe nöüwis o anomu ai lenien motun king lon Elam. Ngang ewe Samol mi Lapalap üa kapas. 39 Nge lon kan fansoun mwach üpwe aliwinisefäli ekewe chon Elam mi oola. Ngang ewe Samol mi Lapalap üa kapas.”