1 Oupwe arapoto, ämi chon ekewe mwün fanüfan, pwe oupwe rongorong. Oupwe aüseling, ämi mwichen aramas. Fanüfan epwe aüseling, pwal aramasen won meinisin. 2 Iwe, ewe Samol mi Lapalap a song ngeni chon ekewe mwün fanüfan, a pwal lingeringeriti nöür kewe mwichen sounfiu meinisin. Iwe, a apwüngala pwe repwe ninnila. 3 Ar kewe somä resap peias, inisir epwe ponfeil, nge ekewe chuk repwe parapar ren char. 4 Iwe, akkar me maram me fü kana repwe telila, läng epwe numufengen usun echö toropwe, nge minen läng meinisin repwe turutiu usun chön irän wain ika chön irä fiik ra mworotiu. ✡ Mat 24.29; Mark 13.25; Luk 21.26; Pwär 6.13-14

5 Iwe, ewe Samol mi Lapalap a amolätä nöün ketilas lon läng. Nengeni, iei epwe feitiu won Etom pwe epwe apwüngü ekewe aramas, a fen apwüngala pwe epwe afeiengaueer. ✡ Ais 63.1-6; Jer 49.7-22; Is 25.12-14; 35.1-15; Am 1.11-12; Op 1-14; Mal 1.2-5 6 Iwe, nöün ketilas a kuula ren cha me kiris, ren chan ekewe nienifön sip me kuuch, pwal ren kirisin föün lon ekewe ätemwänin sip. Pun ewe Samol mi Lapalap a eäni eu asor lon ewe telinimw Posra, a afisätä eu nimanau mi watte lon ewe fanü Etom. 7 Ekewe kow mi mwacho repwe etiir le turutiu, pwal ekewe nienifön kow me ekewe ätemwänin kow mi pöchökül repwe ninnippöküla. Iwe, fanüer epwe kuula ren cha, nge ewe pwül epwe mürina ren kiris.

8 Pun iei fansoun än ewe Samol mi Lapalap epwe amanaua Sion o ngeni chon oputan chappen ar föför. 9 Iwe, ekewe chanpupun Etom repwe wiliti asaruto, pwülün mi moromor epwe wiliti primston, nge unusen ewe fanü epwe wiliti asaruto mi kar. 10 Iwe, ewe ekkei esap kunula lepwin me lerän, nge ötüötün epwe ötütä feilfeilachök. Ewe fanü Etom epwe tala seni eu täppin aramas tori eu täppin, nge esap wor eman epwe saifetal won. ✡ Pwär 14.11; 19.3 11 Iwe, fukuro me ängä repwe nonom lon ewe fanü. Iwe, Kot epwe föri pwe ewe fanü Etom epwe fokun pönüla, pwe epwe usun chök mwen än Kot föri fanüfan. 12 Ekewe aramas tekia seni Etom esap wor och rer pwe repwe eu mwü. Iwe, an kewe samol meinisin resap chüen nom.

13 Iwe, iräfölüföl repwe mämäritä won ekewe imwen king, pwal pötöwölingau lon ekewe imwen maun. Iwe, ewe fanü epwe wiliti eu lenien foks me fukuro. 14 Sokun mönün lon fanüapö repwe chufengen me wolif, nge anüngau repwe ngüngü ngeni chiener. Ewer, ekewe anün rochopwak repwe so o asösö won.

15 Iwe, fukuro repwe fas ikenan, repwe pwal amökkü sokuler o achufengeni apaner kana fän pöükässir. Ewer, ikenan ekewe machang iter wolcher repwe chufengen me chiener. 16 Oupwe küttafichi o aleani seni än ewe Samol mi Lapalap we puk: Meinisin ekei man repwe nom, iteiten eman me eman epwe wor pwülüan. Pun ewe Samol mi Lapalap a allük pwe epwe iei usun, püsin i epwe achufengeniir. 17 Iwe, epwe ineti ewe fanü o ngeni eman me eman kinikinin. Repwe lenieni ekewe leni tori feilfeilachök o nonom lon seni eu täppin aramas tori eu täppin.