15
Yai Gumam bei moiro nuwi kokonan gan okonom koro muruwo koro surai yokamai tai niki dongua tarom okonom koro muruwo koro surai ipu sire towane towane eromie
1 Ena na kanikai tai ori wom kamundi tei u mari fungoro na kanere inokore munmane nan eiye. Na epe kaniye: Yai Gumam nuwi kokonan gan okonom koro muruwo koro surai bei moiro tai niki dongua okonom koro muruwo koro surai akoro moimie. Yokamai bei moiro “No yokamai furo ari mangi tei moinga yokamai bei niki de erowapunga iran Yai Gumam dem miriyom api sungua i mora gouname,” diro benaro beimie.* Rew 15:6-7 2 Te na tai ta ama kanikai fui nuwi ori wom epe mere moingoro kaniye. Te edongua donguamom i awa mawa tere fui nuwi gere u towane fungoro ama kaniye. Te ari yokamai fui nuwi bunamdi tei moimie. Koma yokamai bei moiro kei biyom yaromi te yaromi kuiam te yaromi kam nambamom i kura boiro ime de ereimie. Ena Yai Gumam bei moiro towa ta yokamai erongoro akoro 3 Mose Yai Gumam nuwi kokonan gan yaromi wiyom dungua te non sipsip gam wiyom dungua wi epe dime:
“Aiye, No Ari Wanopanom Yai Gumam yo, ne yai yoporam boinga yarom moinie. Tai kokonan i muruwo ne benga i ori wom dungero ena no kanupunga inokore munmane epunie. Ne bei moiro ari mangi tei moinga yokamai muruwo wom kiapanom bei erenga ena ne mapunom i yo tenga te kon kawom wanine.* Eks 15:1; Rew 16:7; Sam 92:5 4 Ena ne nenen yo tere moinga iran ari yai opai muruwo kuri fi erere ne kanum akire dime. Te ari yai opai muruwo mangi koro koro moinga yokamai kaningai ne yo tenga mapunom benga kanere ena yokamai u nen moingi tei uro ne kanum akire duwaime,”
epe diro wi dime.* Yer 10:6-7; Sam 86:9
5 Ena yokamai ka i mora wi dingoro na kanikai fi mun ei teinga ikom Yai Gumam ikai tei moingua i kamundi tei dungua ikom i kori gumam yaume.* Eks 38:21; Ip 9:3 6 Kori gumam i yaungua Yai Gumam nuwi kokonan gan okonom koro muruwo koro surai yokamai furo mangi ari tai niki dongua bei erowaro benainga yokamai ikom yo tongua tei ma dere u mena wime. Yokamai gai nokapu wom feke dongua bau boingua fingoro non gam fiki i kongo gol ire beinga deinomdi tei sime. 7 Ena kapu okonom suwo iro suwo iro yokori moinga yokamai moingi suna tei kapu ta furo nuwi kokonan gan okonom koro muruwo koro surai yokamai moingi tei furo kongo gol beinga kopare yokamai towane towane erome. Te tora tai ta ta kopare minomdi ikai tei dume? Yai Gumam kakom kakom moi derewo moingua yaromi dem miriyom api suwangua tarom i kopareyom okonom koro muruwo koro surai minomdi ikai tei dume.* Rew 14:10 8 Ena ari yokamai bei moiro tai kipom sungua tarom gaingoro ena enuku i furo iki ikai tei fai si dunguamere epe Yai Gumam bau boinguamom i te yaromi yoporam boinguamom i bei moiro fi mun ei teinga iki dungui ikai tei fai si di tongua iran i nuwi kokonan gan okonom koro muruwo koro surai yokamai furo tai ta niki dongua ari bei ereinga kakom tei ari yokamai fi mun ei teinga iki ikai tei kinaimie. I tamanume. Nuwi kokonan gan yokamai bei moiro tai niki dongua tarom i ari bei gou erowainga iran i ari yokamai fi mun ei teinga ikai tei naime.* 1 Kin 8:10-11; Ais 6:4