1 Mihem jouse hinkho hi hahsatna toh kidel jing hilou ham? Ihinkho uhi kitha lah khut tobang hilou ham? 2 Liim ngaicha aum natong mi tobang ahin, soh atohna man ngah tobang ahi. 3 Keima jong lha phabep sunga chu phatchomna bei natoh eikipen ahi, lunggel gentheina dimset in jankho sot noijah genthei kathoh e. 4 Jalkhun chungah kalumin, itih tah le jingkah ahitadem tin kagel jin, ahinlah jan in eisu chol in khovah kahsen kaki pehle le jin ahi. 5 Kati chungla than leh akhih in atom dimin ka vun jong apohkeh gamin anai along longe. 6 Ka nikho ho jong pon khong ho patphei kilham sangin ging jon, kinepna beijin akichai ji'e. 7 O Pathen, kahin kho hi hai khat bep bou ahi ti nei geldoh peh in, chule keiman kipana hi kanei kit lou hel ding ahi. 8 Nangin tua hi neimu ahin, ahinlah nei musot pon nate, nangin neiven natin ahinlah keima ana chemang tange. 9 Meilhang akithecheh a aman hel bangin, athiho khu hung kile kit tapou vinte. 10 Amaho chu ainuva patna tonsotna mukit tah lou dinga chemang ahitauve. 11 Keima thusei louvin kaum theipoi, kalung genthei naho kasei doh a ka lhagao genthei jeh a kiphin ding kahi. 12 Keima hi twikhanglen'a kichat chat um ganhing len ahilouleh gullui kahia nahonbit nanoija chu neikoi jeng ding ham? 13 Keima kalupna in eilhamon intin, chule ka imut teng kanat genthei na ho olsah tante tin kagelle. 14 Ahinlah nangin mangse neimatsah jin, chule gaothil mu in nei kichat sah ji'e. 15 Hitia genthei thoh sang hin, eikimeh lih jeng hen lang thileng pha kasa joi. 16 Kahinkho kadei mon hitia hin hin ding hi kadei tapoi, O nikho lhomcha kanei sung hin kachangin nei dalha jengin. 17 Mihem hohi ipi hiuva, nangin hibanga hi na khohsah a chule nagel jing jeng ham? ✡ Labu 8:4; 144:3 18 Ajeh chu nangin jingkah seh le nakhol chil soh in, chule phat jousen na patep jinge. 19 Kachil valna ding phatsung beh a ipi dinga nei dalhah lou ham? 20 Chonset kanei ahilehnang chunga ipi kabol khah ham? O mihem te vejing pa, keihi nanga dinga pohgih kahija, natup penna neisem ham? 21 Kachonsetna hi ngaidam jengin lang chule kathemmona ho nei lahmang peh tan, ajeh chu leivui lah a kijam a thivah ding kahitan, nangin hin ven natin chemang tange.