1 Rəbbə həmd edin!

Əməlisalehlər məclisində, icma arasında

Bütün qəlbimlə Rəbbə şükür edəcəyəm.

2 Rəbbin işləri böyükdür,

Bunlardan zövq alanlar ibrət götürür.

3 Əməllərində ehtişamı, əzəməti görünür,

Salehliyi əbədi qalır.

4 Xariqələrini xalqının yadına salır.

Rəbb lütfkar və rəhmlidir,

5 Ondan qorxanları bəsləyərək saxlayır,

Öz əhdini əbədi olaraq yadda saxlayır.

6 Xalqına millətlərin torpaqlarını verərək

Qüdrətli işlərini onlara göstərdi.

7 Əllərinin işləri sədaqət və ədalətdir,

Onun bütün qayda-qanunları etibarlıdır.

8 Onlar həmişə, əbədi olaraq möhkəmdir,

Sədaqətdən, düzlükdən yaranmışdır.

9 Öz xalqına qurtuluş göndərdi,

Əhdi əbədi olsun deyə əmr verdi,

İsmi müqəddəsdir, zəhmlidir.

10  * Əyy. 28:28; Sül. 1:7; 9:10 Rəbb qorxusu hikmətin başlanğıcıdır,

Buna əməl edənlərin sağlam düşüncəsi vardır.

Ona əbədi olaraq həmdlər olsun!