7
Lataua Musosovosiꞌa ta Isilaeli 144,000
1 ✡ Iel 49:36; Tan 7:2Anu mululusou sakisaki muxatele vile mukalu, la eni emaisiꞌa ta angelo tamiꞌa mitulutulu no xalee lia kusikusinou tamiꞌa. Aneꞌi mitulutulu sou mitaluxu atume iou tamiꞌa, la uilisou lia mo luaki xe ovuovu uasi. 2 Mo eni emaisou angelo vile molu no xalee ane aso utelo no anu uneneꞌe la mutetelisou sosovo noxou Lataua ane umauli. Anu muneꞌe la muꞌava toxoxaꞌa mulai noxiꞌa ta angelo tamiꞌa e Lataua mulosiꞌa xavi sou iꞌoxo masuanu lia ilou luaki. 3 ✡ Ese 9:4, 6; Pal 9:4Aloxo ꞌo, “Ngingi ngaxolu ꞌo, mo nenge nengeꞌa tateinu sosovo no ꞌalaieꞌi ta mitema sou xaixai vitanisi noxou Lataua noxinge tei ꞌo. Xe ukalu, la sou ngingi ngaꞌoxo masuanu lia ilou luaki mo ovuovu.” 4 ✡ Pal 14:1, 3Muꞌava aloxo ne mukalu, la eni elomusou itiitisiꞌa aneꞌi ane minoꞌu sosovo ne muxali loxo 144,000 no anu mata noxiꞌa ta Isilaeli mukalusi.
5 Mata noxou Iudasi minoꞌu sosovo itiitisiꞌa muxali loxo 12,000.
Mo mata noxou Lubeni 12,000 mo mata noxou Gado 12,000.
6 Mo mata noxou Aseli 12,000 mo mata noxou Napitali 12,000
mo mata noxou Manase 12,000
7 mo mata noxou Simeoni 12,000 mo mata noxou Levi 12,000
mo mata noxou Isikali 12,000
8 mo mata noxou Sevuloni 12,000 mo mata noxou Iosepu 12,000
xe mata noxou Beniamini 12,000.
Ta Mitema Tavuꞌalo Mitaanu Tokolomo Kea
9 Eni emaisou itiitisiꞌa ta Isilaeli mukalu xe emalei la, emaisiꞌa ta mitema tavuꞌalo manina umomomo sou taitisiꞌa uasi ane mata noxiꞌa iouiou mo vasimeꞌa kaukavuxu iouiou mo vaikalaiꞌa iouiou no xalexalee tuatuala mukalusi. Aneꞌi mitutulu no talaxaꞌa itema muxolu no luu ne ilou Sipsip ꞌOlu, la mitaanu tokolomo kea mulalusi xe mitetelisou xoolou volovoloxu no avoꞌa. 10 ✡ Pal 5:6-7La aneꞌi miꞌava tatila aloxo ꞌo,
“Lataua noxinge ane muxolu no luu ilou Sipsip ꞌOlu upamaulinenge.”
11 Aneꞌi miꞌava tatila aloxo ne, la ta angelo ane mitulu mixixaoneꞌi itema muxolu no luu iloꞌa ta tatila mo ta mii tamiꞌa milapau miluꞌelai no talaxo itema muxolu no luu ne sou milotu noxou Lataua. 12 ✡ Pal 5:12Ia mivikala aloxo ꞌo,
“Manina lexe nenge taꞌosasou Lataua noxinge mo taꞌitinu ualasou
mo talemolu laixe noxou xe ta taxanu no voxovoxo utotomu mo kaluxu uasi.
Xo anu itema sou lavulavu mo xavi noxou ne xaviinu misevile.
Manina.”
13 La vile noxiꞌa ta tatila mutaliꞌisilo aloxo ꞌo, “Aneꞌi ta ꞌei e mitaanu tokolomo kea mo meꞌa neꞌei?” 14 ✡ Tan 12:1; Mat 24:21La ekolinu aloxo ꞌo, “Tila, nini nelavusiꞌa.” La anu muvikala lexe, “Aneꞌi ta mitema ne, aneꞌi miuaulixu tuꞌutuꞌumaxu toxotoxoxaꞌa la miꞌuinu tokolomoiꞌa no anu sialuxu Sipsip ꞌOlu la muxali kea. 15 La sou aneꞌi milai mixolu no luu talaxu Lataua sou ixaxai noxou no taasou no aso xe no ꞌolovoxo. La itema ane muxolu no luu ne uxolu noxiꞌa. 16 ✡ Ais 49:10La aneꞌi isolixaꞌa mo isoliu lexa la uasi. Mo aso umomomo sou uveꞌa mo ialuxaꞌa la uasi. 17 ✡ Lex 23:2; Ais 25:8; Pal 21:4Xo Sipsip ꞌOlu e muxolu no nixi no luu ne anu usaxilaꞌa loxo itema sou usaxilaꞌa ta sipsip mo anu uoleneꞌi ilai no lexa sou mauli iou. Xe Lataua uiasou ieꞌi lexaxu.”