5
Kaukavu Ane Mipipinu Xe Sipsip ꞌOlu
1 ✡ Ais 29:11; Ese 2:9-10Mo itema uxolu no luu ne ia no avo tema, la eni emaisou kaukavu vile mipipinu muai. Kaukavu ne, mikaukavunu xalee vile xe xalee vile mo misakiinu no anu sakisaki muxatele tamei. 2 Mo eni emaisou angelo vile xavi misevile muꞌava tatila aloxo ꞌo, “ꞌEi umomomosou ululusou sakisaki mo uxavulalanu kaukavu ne?” 3 Ia evile uxolu teitexi no opo loxotolo mo no lia ꞌo xe no nano no lia umomomo sou uxavulalanu kaukavu ne mo umaisou uasi. 4 Eni atatama xo ixalisou evile umomomo sou uxavulalanu kaukavu ne mo umaisou uasi. 5 ✡ Tav 49:9; Ais 11:1, 10; Pal 22:16La vile noxiꞌa ta tatila muavuti la muvikalaleli aloxo ꞌo, “Natama uasi. Namaisou! Laeoni molu no anu mata Iudasi mo Anu Deviti uliꞌu muaulixu Satani. La sou Anu mumomomosou ululusou sakisaki muxatele tamei xe uxavulalanu kaukavu ne.”
6 ✡ Sek 4:10; Ioa 1:36; Pal 13:8Anu muvikalaleli mukalu, la eni emaisou Sipsip ꞌOlu ututulu no nixi no luu. La ta mii tamiꞌa iloꞌa ta tatila mixixaonu. Sipsip ꞌOlu ne, anu loxo mivau mo sikilinu muxatele tamei xe iou muxatele tamei. Iou muxatele tamei ne, anu ta ulee noxou Lataua muxatele tamei ane mipalusiꞌa miluꞌe no lia ꞌo mukalusi. 7 Anu muavuti la muneꞌe noxou itema e uxoxolu no luu ne sou munoꞌu kaukavu ane mipipinu muai no avolu tema. 8 ✡ Lex 141:2; Pal 8:3-4Anu munoꞌu mukalu, la ta mii tamiꞌa iloꞌa ta tatila itemaxu vile mo tamiꞌa mixolaꞌu tavaꞌu sou milotu noxou. Aneꞌi vilevilesi mitetelisou susapu xe paku miꞌoxo no anu xoulu ia mii iꞌelaxu la tumaꞌu lailaixe muꞌanaꞌana no anu. Tumaꞌu lailaixe ne, anu lakilaka noxiꞌa ta mitema noxou Lataua. 9 ✡ Lex 33:3; 40:3; 96:1; 98:1La aneꞌi milexe lexe vile alavua aloxo ꞌo,
“Nini nemomomo sou nanoꞌu kaukavu ne mo nalulusou sakisaki,
xo nini neuluasiꞌa mo no anu sialuxene,
la nini nenoꞌu ulusiꞌa ta mitema noxou Lataua ane mata noxiꞌa iouiou
mo vaikalaiꞌa iouiou mo vasimeꞌa kaukavunu iouiou no xalee xalee tuatuala mukalusi.
10 ✡ Mul 19:6; Ais 61:6; Pal 1:6; 20:6Mo nini nesosovosiꞌa mo mixali ta tatanaanu tuala
xe ta ailiꞌi sou ixaxai noxou Lataua noxinge.
La sou aneꞌi isaxilaꞌa ta mitema latala no lia ꞌo ukalusi.”
11 ✡ Tan 7:10; Eva 12:22Milexe mukalu, la emaisiꞌa ta angelo tavuꞌalo mo elomusou xolineꞌi. Ia itiitisiꞌa tavuꞌalo musuku mo umomomosou taꞌitisiꞌa uasi. Aneꞌi mixixaonu luu iloꞌa ta mii tamiꞌa xe ta tatila. 12 La milexe tatila manina aloxo ꞌo,
“Sipsip ꞌOlu anu muulua ne,
umomomosou unoꞌu xavi mo lavuluti mo lavulavu noxou Lataua
xo Anu xaviinu.
Xe nenge tataxaanu mo taꞌiti ualasou mo taꞌosasou.”
13 Mo elomusiꞌa ta mimii latala mukalusi no opo loxotolo mo no lia ꞌo mo no laaxu lia mo no luaki milexe. Aneꞌi latala mukalusi mixolu no anu ne, milexe aloxo ꞌo.
“Itema ane muxolu no luu mo Sipsip ꞌOlu ne,
nenge taꞌosasiꞌa mo ta tataxaneꞌi
xe taꞌitinu ualasiꞌa no voxovoxo utotomu mo kaluxu uasi,
xo aneꞌi xavineꞌi sou isaxilaꞌu mimii latala ukalusi.”
14 Aneꞌi milexe mukalu, la ta mii tamiꞌa mivikala lexe “Manina,” xe ta tatila mixolaꞌu tavaꞌa sou milotu noxiꞌa.