YONINI KAMA VAYA INO
(Yoni)
Yonini Kama Vaya Ma Uvanteí Pákenai Afova Vaya Ino
Ma vompon ma uvantein banta ino.
Baya varen orin banta Sebetin anin Yoni ano ino.
Uvarein orana ino.
AD nainti (90) ráké mana antareti (100) fin mi ma vompon uvanten minon ten inikhen mino.
Ma vompon ma uvantein baru ino.
Esiá barafin ma áau orun perápá ma vain kákan baru Efesasí ino. Mai vanta karavusií ono van Aisiní un nompin Patmosí musóká tiantan o váken mi Aúpá Baré ein Baya Ma Sian Dákó Ukhein Bompon uvaren mino.
Ma vompon ma uvaman amikhein kéká ino.
Minó Yisasintá ma mumunan iyain kéká ino. Yutan kéká bá Kiriki kayo vá inká Romú nanin banta ma monó tiyan mumunan iyain kéká bái ino.
Nái ana vará ma vompon uvanten nafino.
Ma vompon ma yankafin nain kéká ano Yisasin nan Tiyarafenu Anin mino siren afová ino van mino.
1
Baya Ano Vantaí Uven Ma Varará Tetí Ankan Má Baren Mino
1 * Yon 17:5; 1Yn 1:1-2; Rev 19:13Esé araíen minó daná ída afoká ukhan Baya varen mino. Baya ano Tiyarafenu vá báken mai Vaya ano Tiyarafenun baren mino. 2 Esé araíintá Baya ano Tiyarafenu vá baren mino.
3 * 1Ko 8:6; Kor 1:16-17; Ibu 1:2Tiyarafenu ano véin pinté anan minó daná uvamádan afoká ukhen mifo mana yaná ano veyan táké ída afoká ukhen mino. 4 * Yon 5:26Ayun ma fara van oriyan ban aunan béimpin bákan mai aunan manon minó nanin banta oon uruanten mino. 5 * Yon 3:19Mai oon mano sítípafin kiyan bákan maen títípa ano ída véin iyákaren mino.
6 * Mat 3:1; Ruk 1:13-17, 76Tiyarafenu ano monó non péantan banta Yonin tiantan eren mino. 7 Mai ma erein béi ano mai ooni vaya sian amá urantin minó nanin banta ano veni vaya iniren mumunan ino van mino. 8 Mai ooni vaya máa sian amá ono van mi Yoni eren mifo véi ída mai oon mino. 9 * Yon 8:12Mai ma fura sikhein oon mano ma vanasi kakhaantiyain manon ma varará eriyan mino.
10 Tiyarafenu ano véin pinté uaren bara uvantaré íkan béi ma varará e van mifo vanasi ano ída véin oman afová en mino. 11 Béi vei vara anará erin mifo vei kéká ano ída véin aviren mino. 12 Ída aviren mifo véintá ma mumunan ein nanin bantan maman Tiyarafenu akhafanaíen mino. 13 * Yon 2:11; 3:3-6; 1Pi 1:23Betí ankan be anóe afóeni narera safi aui anunura safi vantai anunura safi ída Tiyarafenu akhasí ukhen mino. Tiyarafenu ano veyantái vetin maman be akhasí ukhen mino.
14 * Fir 2:7Baya ano vantaí uven ma varará tetin aúbaná baren mino. Tetí ankan inka veni kakhani ákona oné tiféuno. Mai mana iyampon ma ve Afóe ano siantan ma ereini kakhan bákan inká beni sarisari vá puntákein avúavá bá béimpin bíkakhen mino.
15 Mai van mi Yoni máa sen oovaren banasi siamemí, “Ten toyampá ma eriyain banta mai séi ída vákun béi fe vá ein bantan bákan beni ákona ano séin esantakhá ma vanta van mi séi fefá tiretin tiamikharé uno. 16 Mai vantafin tarisari ano moéken bíkakhái setí ankan ena ena yamú beni avábá bariyá tiféuno. 17 * Eks 34:28; Rom 6:14Para vara seyo, Mosesin pinté uaren mi Tiyarafenu ano setí ankan man baya simen mifo sarisari vá puntákein avúavá bá mai Tiyarafenu ano ma aní ukhein banta Yisasin pinte nan baré tiféuno. 18 * Eks 33:20; Yon 6:46; 1Ti 6:16Ída mana vanta ano Tiyarafenun onten mifo ve Anin mano anan be Afóen ádé báken mai véi Tiyarafenun ban mi ve Afóeni vaya setin tisimen mino.
Monó Non Péantan Banta Yoni Ano Ma Yisasini Aa Uvíden Puntáantein Baya Ino
(Matiu 3:1-12; Maki 1:7-8; Ruku 3:15-17)
19 Yutan nanin bantai anon banta kayo ano monó doran banta kayo vá Rivai kayo* Rivai e ma siyain maen mai monó doran banta kékái ayain banta kayo ino. vá tiantákan Yerusaremí me ampiren Yonin mo máa sen inaemí, “Éi Tiyarafenu ano ma aní ukhein banta fono.”
20 Máa síkan Yoni mai vaya ída umeren mifo amáká máa sen tiádemí, “Tiyarafenu ano ma aní ukhein banta va uno.”
21 * Diu 18:15, 18; Mat 11:14Ída ino síkan betí ankan béin inaemí, “Mai éi sakhanampa vanta Iraiya fono,” síkan “Béi va uno” siyaimpin evaránen inaemí, “Mai éi sakhanampa vanta fono” síkan “Ída ino” sen mino.
22 Máa siyaimpin evaránen béin inaemí, “Mai éi eyan nan iye unó tiya fono. Setin tisimesirá evaráné mai ma sisintá erikheruna kayo mo siameno.”
23 Síkan Yoni vetí ankan tiamemí, “Pefá ma sakhanampa vanta Aisaiyan oorá ma sen kámá bara fáké ma oovaren, ‘Bafani aa funtarano’ ma sikhá ein mai séi uno.” Ais 40:3
24 Máa siyaimpin mai ma Farasisi kéká ano ma siantan erikhá ein kéká ano Yonin máa sen 25 inaemí, “Mai éi ma ída Tiyarafenu ano ma aní ukhein banta fo Iraiya fo áa sakhanampa vanta fo ma vanteya mai fará banasi monó non péantiya fono.”
26 Máa siyaimpin Yoni evaránen betí ankan tiamemí, “Téi nompói féantiyá umpo sirétin aúbanápin mai mana vanta váka ída afová ukha ono. 27 * Yon 1:15Téi ída funtákeruna ída kanaíé mai ma sen toyampá eriyain bantai arantan anamun anan útufonté uno.”
28 Yodení non ufá mana sító baru Betaní Yoni monó non péantiyákan mi mai yaná afoká en mino.
Yisasi Maen Tiyarafenui Arará Sipisipi Ino
29 * Ais 53:6-7; 1Pi 1:18-19Ená damú Yisasi ma Yoni vaintá eríkan ma onen máa semí, “Onano. Mai Tiyarafenui sipisipi arará ino. Ma vara ráke nanin bantai ume ma arúantan mino. 30 * Yon 1:15Ten toyampá ma eriyain banta mai séi ída vákun béi fe vá ein bantan bákan beni ákona ano séin esantakhe ne ma séku inikhá eona mai ma vanta van mi sikharé uno. 31 Téi ven ída afová é amino ukhéi Tiyarafenu ano ma aní ukhein banta ino sen Isareri nanin banta ano afová ino van mi monó non máan péantiyá uno.”
32 * Mat 3:16Máa siren Yoni sian dákóen mí, “Téi onékun inaru fáké kukhofá nun avúaváká ten Kantá Aunan mano ven ánontá eren mino. 33 ‘Eren mifo séi seyantá bein ída afová ukhékun mi Tiyarafenu ano séin tisintá me vanasi nompó péantiyá uno. Pefá Tiyarafenu ano séin máa sen tisimikharen mino. Onesin ma mana vanta ánontá ma Kantá Aunan ma eran nain mai vanta anon Kantá Aunan póké banasi non peántanten mino.’ 34 * Mat 3:17Máa sikhareí téi ódaréi Yisasin nan Tiyarafenu Anin mino sé tian amá é uno.”
Yisasi Ma Araí En Bei Eyo Iyampon Kayo Arein Baya Ino
35 Máa sirákaren ená damú Yoni evaránen bei eyo iyampon kanan má mairá o mantakharen mino. 36 * Yon 1:29Mantakharen onan Yisasi entavíkan Yoni semí, “Onano. Mai Tiyarafenui sipisipi arará ino.” 37 Máa síkan mai eyo iyampon kanan mano iniren Yisasin avákuren oren mino. 38 Avákuren oríkan Yisasi yovaéan onen békanan máa sen inaemí, “Nái vará dosiyan tafono” síkan. Békanan evaránen inaen temí, “Aru soe, inte namuná éi vaonafino.”
39 Máa síkan Yisasi evaránen békanan tiamemí, “Tiré kanan eriveya onano,” siren kamí kamí áauí iyákan aviren be ma vain namumpin o vákan e varen dunin baren mino.
40 * Mat 4:18-20Kankanan banta ano ma Yonin avaya ma iniyá ein pinté Saimon Pitan afá aváen Enduru anon Yisasin avákuren oren mino. 41 O varen ma Yisasin me ampiren maen Enduru ma esé daná barein mai ve afá aváe Saimonin dosiren máa sen tiamemí, “Tetí ankan inka Mesian oné uno.” (Mesia ne ma siyain mai máan mi sikhen mino. Tiyarafenu ano ma aní ukhein banta ino.) 42 * Mat 16:18Máa sen tiamiren Enduru ano Saimonin aviren Yisasi vaintá oríkan Yisasi véin ódaren temí, “Yonin anin Saimoni oe, éi nan ínaimpá Sifasin ne sinten mino. Mai avíi ana Kiriki vaya finté Pitan nen tikhen mino.* Máí kan bíi ana mai onámana sen tikhen mino.
Yisasi Ma Firipin Nú Natanierin Nú Arein Baya Ino
43 Ená damú Yisasi Karirifá orono van iyaren Firipin onen tiamemí, “Éi ere sen tivákurono.” 44 Endurun nú Pitan núi varu ana Betsaidái vákan Firipin má dere mai varu ráke vanta ino. 45 * Diu 18:18; Ais 7:14; 9:6; Yer 23:5; Isi 34:23Firipi ano Natanierin o omáken tiamemí, “Mosesini man bayafin má sakhanampa vanta kayoi vompompin má ma sikhá ein mai vanta Yosepin anin Nasaretíké Yisasin baréíi setí ankan inka oné tiféuno.”
46 Máa síkan Natanieri evaránen béin inaemi, “Nasaretíké kaná mana kama yaná afoká inten nafino.” Síkan Firipi evaránen béin tiamemí, “Erikhe vá onano.”
47 Máa siran Yisasi vaintá Natanieri eríkan ódaren temí, “Onano, ma vantafin ída mana kampun baya vá avúavá bá bákan béi Isareri vanta uron mino.”
48 Máa síkan Natanieri evaránen Yisasin inaemi, “Éi intesá ureyá téin afová ukhare vae,” síkan Yisasi evaránen béin tiamemí, “Firipi ma ída éin arakhaya fiki yaa anafin baná téi éin ontaré uno.”
49 * Mat 14:33; 16:16; Mak 3:11Máa síkan Natanieri evaránen béin tiamemí, “Aru soe, éi Tiyarafenu Anin Isareri kayoi kin mono.”
50 Máa síkan Yisasi evaránen béin tiamemí, “Téi fiki yaa ana ráke éin oné uno ma seruna mairasá éi mumunan iya fono. Ínaimpáké mai esantakhein kákan danasintan onan nono.”
51 * Esé 28:12Máa siren béin tiamemí, “Téi fura siré tiretí ankan tiamiyá uno. Ínaimpáké tiretí onesin maen inaru ona yivintin Tiyarafenui enisori kayo ano Banta Anintá ódiven eraven inten mino.”
*1:1: Yon 17:5; 1Yn 1:1-2; Rev 19:13
*1:3: 1Ko 8:6; Kor 1:16-17; Ibu 1:2
*1:6: Mat 3:1; Ruk 1:13-17, 76
*1:13: Yon 2:11; 3:3-6; 1Pi 1:23
*1:18: Eks 33:20; Yon 6:46; 1Ti 6:16
*1:19: Rivai e ma siyain maen mai monó doran banta kékái ayain banta kayo ino.
*1:21: Diu 18:15, 18; Mat 11:14
*1:29: Ais 53:6-7; 1Pi 1:18-19
*1:42: Máí kan bíi ana mai onámana sen tikhen mino.
*1:45: Diu 18:18; Ais 7:14; 9:6; Yer 23:5; Isi 34:23
*1:49: Mat 14:33; 16:16; Mak 3:11
*1:51: Esé 28:12