1 Xwinaqir kꞌu che ruwa kaj jun nimalaj kꞌutubꞌal: Kꞌo jun ixoq upisom ribꞌ chupa ri qꞌij, waꞌ uꞌanom pachaꞌ uqꞌuꞌ che. Ekꞌu ri ikꞌ chuxeꞌ ri raqan kꞌo wi, y kꞌo jun corona che rujolom yey wa corona kꞌo kabꞌlajuj chꞌumil che. 2 Rire yewaꞌ ixoq y lik kasikꞌinik ma e riꞌ kutzir uwach yey ruma waꞌ lik kꞌo pa kꞌax.

3 Xwinaqir kꞌu jun chik kꞌutubꞌal che ruwa kaj: Waꞌ e jun nimalaj dragón kaq rij, kꞌo wuqubꞌ ujolom y lajuj rukꞌaꞌ. Chujujunal rujolom kojom jun diadema che. 4 Rukꞌ rujeꞌ xebꞌujokokej bꞌi ri urox parte chike taq ri chꞌumil e kꞌo che ruwa kaj y xebꞌukꞌaq bꞌi che ruwachulew. Ekꞌu ri dragón xtakꞌiꞌ chwach rixoq echiriꞌ ya e riꞌ kutzir uwach chaꞌ kutij bꞌi ri ralko ralabꞌ maji chik echiriꞌ kalaxik. 5 Xutzir kꞌu uwach rixoq y xalax jun ralko ralabꞌ. Y ruchak waꞌ wa ralabꞌ e kataqan rukꞌ jun vara chꞌichꞌ pakiwi konoje taq ri tinamit e kꞌo che ruwachulew. Ekꞌu ri ralko ralabꞌ rixoq xkꞌam bꞌi chikaj rukꞌ ri Dios pa kꞌo wi rutzꞌulibꞌal re taqanik. 6 Ekꞌu rixoq xanimaj bꞌi, xeꞌek pa jun luwar katzꞌintzꞌotik pa yijbꞌam wi ruluwar ruma ri Dios, chaꞌ chiriꞌ katzuq wi oxibꞌ junabꞌ rukꞌ nikꞌaj.* Pa ri chꞌaꞌtem griego kubꞌiꞌij “mil doscientos sesenta qꞌij”.

7 Tekꞌuchiriꞌ, xjeqer jun nimalaj chꞌaꞌoj chilaꞌ chikaj: Ri Miguel kukꞌ ri ángeles e kꞌo puqꞌabꞌ xechꞌoꞌjin rukꞌ ri dragón. Y jekꞌulaꞌ ri dragón kukꞌ ri ángeles e kꞌo puqꞌabꞌ xechꞌoꞌjin rukꞌ ri Miguel. 8 Pero ri dragón kukꞌ taq ru ángeles na xkichꞌij ta kichuqꞌabꞌ ri Miguel kukꞌ ri ángeles e kꞌo rukꞌ. Y na xyaꞌ ta chi kꞌu chike kekꞌojiꞌ chilaꞌ chikaj. 9 Xkꞌaq bꞌi ri nimalaj dragón, waꞌ e ri kumatz re ojertan,* Gn. 3:1 ritzel winaq Satanás rubꞌiꞌ, ri katajin che kisokosoꞌxik konoje taq ri winaq che ruwachulew. Xkꞌaq kꞌu bꞌi che ruwachulew junam kukꞌ ru ángeles.

10 Tekꞌuchiriꞌ xinta jun qulaj lik ko xchꞌaw chilaꞌ chikaj, jewaꞌ kubꞌiꞌij:

«Woꞌora ri Dios ebꞌukolobꞌem chi rutinamit yey ri jeqebꞌal re rutaqanik xuꞌan rukꞌ unimal uchuqꞌabꞌ y uyaꞌom chi ri taqanik puqꞌabꞌ Ruchaꞌoꞌn lo Rire. Ma kꞌaqom chubꞌi ri jun kutzꞌaq kichiꞌ ri qa hermanos chipaqꞌij chichaqꞌabꞌ chwach ri Dios. 11 E taq ri qa hermanos xkichꞌij uchuqꞌabꞌ ri dragón ruma rukikꞌel ri Qꞌapoj Bꞌexex y rukꞌ ri Utzilaj Tzij xkitzijoj rike, yey na xkixiꞌij tane kibꞌ chwach taq ri kakikꞌulumaj tobꞌ ne xekamisaxik. 12 E uwariꞌche chixkiꞌkota riꞌix, ri ix jeqel wara chikaj. Pero lik toqꞌoꞌ kꞌu kiwach taq ri e kꞌo che ruwachulew y ri e kꞌo chupa ri mar, ma ritzel winaq qajinaq piwi riꞌix y lik saꞌch ri royowal, ma retaꞌam xa ajilam chi ri qꞌij yaꞌtal che» kachaꞌ.

13 Echiriꞌ ri dragón xrilo esam chi lo chikaj, lik xuternabꞌej rixoq, ruchu ri ralko ala. 14 Pero che rixoq xyaꞌ kaꞌibꞌ nimaq taq uxikꞌ pachaꞌ uxikꞌ águila, chaꞌ jelaꞌ kaxikꞌikꞌik kanimaj bꞌi chwach ri kumatz* Ap. 12:9 pa ri luwar katzꞌintzꞌotik, pa ri luwar yijbꞌam chi che, pa katzuq wi oxibꞌ junabꞌ rukꞌ nikꞌaj. 15 Ekꞌu ri kumatz xuxabꞌej lo yaꞌ puchiꞌ chirij rixoq, waꞌ e pachaꞌ juna nimayaꞌ re kucharej bꞌi. 16 Pero rulew xutoꞌ rixoq, ma xjaqatajik y xutzꞌubꞌ bꞌi ri nimayaꞌ uxabꞌem lo ri kumatz puchiꞌ. 17-18 Ruma kꞌu laꞌ, ri kumatz lik xpe royowal chirij rixoq y xuꞌana chꞌaꞌoj kukꞌ taq ri ralkꞌoꞌal kan rixoq, waꞌ e taq ri kakitaqej Rutzij Upixabꞌ ri Dios y kakitzijoj ri Utzilaj Tzij re ri Qanimajawal Jesucristo.