1 Ekꞌu ri Saulo na karoqꞌotaj taj kuxibꞌij kipa rukꞌ kamik janipa ri kikojom rubꞌiꞌ ri Qanimajawal. Xeꞌek kꞌu rukꞌ ri kajawal raj chakunel pa Rocho Dios 2 y xutzꞌonoj bꞌi uwujil chaꞌ kayaꞌiꞌ puqꞌabꞌ kok pa taq ri sinagogas re ri tinamit Damasco. Jekꞌulaꞌ, we keburiq achijabꞌ o ixoqibꞌ e kukꞌil ri kitaqem wa kꞌakꞌ Bꞌe, kꞌo kꞌu puqꞌabꞌ riꞌ kebꞌuyut loq y kebꞌukꞌam lo Jerusalem.

3 Ekꞌu ri Saulo e riꞌ kꞌo pan chi bꞌe che uꞌanik waꞌ, katajin kꞌu roponik chunaqaj ri tinamit Damasco, echiriꞌ xaqikꞌateꞌt ruwonibꞌal jun aqꞌ xpe chilaꞌ chikaj, xwol kaꞌn puwiꞌ y xusut rij. 4 Ri Saulo xtzaq pulew y xuta kꞌu jun qulaj, jewaꞌ kubꞌiꞌij che:

—Saulo, Saulo, ¿suꞌchak katchꞌoꞌjin chwij? —xcha che.

5 Ri Saulo xutzꞌonoj che:

—¿Lal china rilal, Wajawal? —xchaꞌ.

Jekꞌuwaꞌ xkꞌul uwach che:

—Riꞌin in Jesús, ri Jun katchꞌoꞌjin chirij. Yey riꞌat, atukel nenareꞌ lik kaꞌan kꞌax che awibꞌ, jelaꞌ pachaꞌ juna bꞌoyex echiriꞌ kuya aqan che ri puya kachꞌik lo che —xuchixik.

6 Kabꞌirbꞌot kꞌu ri Saulo y uxiꞌim ribꞌ, jewaꞌ xubꞌiꞌij che:

—Wajawal, ¿saꞌ ri kaꞌaj la kanꞌano? —xchaꞌ.

Ri Qanimajawal xukꞌul uwach:

—Chatyaktajoq y jat chupa ri tinamit, ma chiriꞌ kabꞌiꞌx wi chawe saꞌ ri chirajawaxik kaꞌano —xchaꞌ.

7 Ekꞌu rachijabꞌ e rachbꞌiꞌil ri Saulo lik kixiꞌim kibꞌ xetakꞌiꞌik; ma xkita ri qulaj, noꞌj na jinta junoq xkil uwach.

8 Ri Saulo xyaktaj chwa rulew y xujaq kꞌu ruwach, pero na jinta chi kꞌo karilo ma xkanaj kan potzꞌ. Ewi xa xchꞌelex bꞌi che ruqꞌabꞌ kuma ri erachbꞌilam y xkꞌam bꞌi chupa ri tinamit Damasco. 9 Xkꞌojiꞌ kꞌu chilaꞌ oxibꞌ qꞌij; e laꞌ na katzuꞌn taj, na xwaꞌ taj y na jinta ne umiqꞌinaꞌ xutijo.

10 Chilaꞌ kꞌu riꞌ Damasco kꞌo jun achi Ananías rubꞌiꞌ; rire ukojom rubꞌiꞌ ri Cristo. Kꞌo kꞌu jun kꞌutubꞌal re ri Dios xqꞌalajisax chwach. Ri xrilo e ri Qanimajawal xukꞌut uwach chwach y jewaꞌ xubꞌiꞌij che:

—¡Ananías! —xcha che.

Rire xukꞌul uwach:

—Riꞌ in kꞌolik, Wajawal —xchaꞌ.

11 Xubꞌiꞌij kꞌu ri Qanimajawal che:

—Chatyaktajoq y jat chupa ri bꞌe kabꞌiꞌx “Jusukꞌ” che. Yey chirocho kꞌu ri Judas, chatzꞌonobꞌej puwi jun achi aj Tarso, Saulo rubꞌiꞌ. Rire katajin pa oración 12 y qꞌalajisam chi kꞌu jun kꞌutubꞌal re ri Dios chwach. Chupa waꞌ xril jun achi Ananías rubꞌiꞌ, e riꞌ kok bꞌi y kuya ruqꞌabꞌ puwiꞌ chaꞌ jelaꞌ katzuꞌn tanchik —xchaꞌ.

13 Xubꞌiꞌij kꞌu ri Ananías che ri Qanimajawal:

—Wajawal, lik nutom ronoje ri na utz taj uꞌanom waꞌ waꞌchi chike ri kikojom ri bꞌiꞌ la chilaꞌ Jerusalem. 14 Yey yaꞌtal ne lo puqꞌabꞌ kuma ri nimaq e aj chakunel pa Rocho Dios kebꞌukꞌam bꞌi pa cárcel konoje ri kikojom ri bꞌiꞌ la —xchaꞌ.

15 Ekꞌu ri Qanimajawal xubꞌiꞌij che:

—Jat chilaꞌ rukꞌ, ma Riꞌin nuchaꞌom rire chaꞌ kuꞌana jun waj chak re keꞌek che uqꞌalajisaxik ri nubꞌiꞌ chikiwach ri winaq na e ta aj judiꞌabꞌ, chikiwach ri e taqanelabꞌ y chikiwach ri e aj Israel. 16 Yey kankꞌut kꞌu che, janipa ri kꞌaxkꞌolil chirajawaxik kikꞌow wi rire ruma kutzijoj ri nubꞌiꞌ —xuchix ri Ananías.

17 Ri Ananías xeꞌek kꞌut y xok pa ri ja pa kꞌo wi ri Saulo. Xuya kꞌu ruqꞌabꞌ puwiꞌ y xubꞌiꞌij che: «Hermano Saulo, ri Qanimajawal Jesucristo, ri xuqꞌalajisaj ribꞌ chawach chupa ri bꞌe pa at petinaq wi, inutaqom lo awukꞌ chaꞌ kat-tzuꞌn tanchik y kakꞌul kꞌu ri Santowilaj Ruxlabꞌixel ri Dios» xcha che.

18 Chupa kꞌu laꞌ la joqꞌotaj, kꞌo ri pachaꞌ soloꞌt xtzaq che ruwach ri Saulo y xtzuꞌn tanchik. Tekꞌuchiriꞌ, xyaktajik y xukꞌul ri bautismo. 19 Ekꞌuchiriꞌ xwaꞌ ri Saulo, xkꞌojiꞌ tanchi uchuqꞌabꞌ y xkꞌojiꞌ jujun qꞌij kukꞌ ri kikojom rubꞌiꞌ ri Cristo chilaꞌ pa ri tinamit Damasco.

20 Tekꞌuchiriꞌ, ri Saulo xujeq katzijon puwi ri Cristo chupa taq ri sinagogas, jewaꞌ ri kubꞌiꞌij: «Ri Jesús e Ukꞌajol ri Dios» kachaꞌ.

21 Konoje ri ketaw re lik kakam kanimaꞌ che y kakibꞌiꞌij: «¿Na e ta nebꞌa achi waꞌ ebꞌuternabꞌem rukꞌ kꞌax ri kikojom rubꞌiꞌ ri Cristo chilaꞌ Jerusalem; yey kꞌuninaq ne wara re kebꞌuyut bꞌi y kebꞌuꞌyaꞌa pakiqꞌabꞌ ri nimaq e aj chakunel pa Rocho Dios?» kechaꞌ.

22 Pero ri Saulo jalan katajin unimarik ruchuqꞌabꞌ puwi ri kutzijoj. Ekꞌu raj judiꞌabꞌ ejeqel chiriꞌ Damasco xsach kinaꞌoj che ma ri Saulo kuqꞌalajisaj chikiwach: Ri Jesús e ri Cristo, Ruchaꞌoꞌn lo ri Dios.

23 Ikꞌowinaq chi kꞌu ukꞌiyal qꞌij, raj judiꞌabꞌ xkiꞌan tzij junam chikiwach re kakikamisaj ri Saulo. 24 Pero waꞌ xretaꞌmaj ri Saulo. Ekꞌo kꞌu ri kichajim chipaqꞌij chichaqꞌabꞌ taq ri okibꞌal re ri tinamit chaꞌ kakichap ri Saulo y kakikamisaj.

25 Ruma kꞌu riꞌ, ri kikojom rubꞌiꞌ ri Cristo e laꞌ chaqꞌabꞌ xkiqasaj bꞌi ri Saulo chwi ri tapia chupa jun nimalaj chakach.

26 Echiriꞌ xopon ri Saulo Jerusalem, lik xraj kaqibꞌ kukꞌ ri kikojom rubꞌiꞌ ri Cristo. Pero konoje rike lik kakixiꞌij kibꞌ che, ma na kakikoj taj we paqatzij wi ri Saulo ukojom chi rubꞌiꞌ ri Cristo. 27 Ekꞌu ri Bernabé xukꞌam bꞌi y xuꞌyaꞌa chikiwach ri e taqoꞌn re ri Cristo. Xutzijoj kꞌu chike suꞌanik ri Saulo xril uwach ri Qanimajawal pa bꞌe y xchꞌaꞌt rukꞌ. Yey xutzijoj chike puwi ri tzijonik xuꞌan ri Saulo chupa rubꞌiꞌ ri Jesús chilaꞌ Damasco yey rukꞌ unimal uchuqꞌabꞌ xuꞌan waꞌ.

28 Ekꞌu ri Saulo xkanaj kukꞌ chiriꞌ Jerusalem y xerachbꞌilaj pa taq kebꞌek wi. 29 Lik na kuxiꞌij ta ribꞌ katzijon chupa rubꞌiꞌ ri Qanimajawal. Kachꞌaꞌt kꞌu puwi ri Jesús kukꞌ raj judiꞌabꞌ ri kechꞌaꞌt pa ri chꞌaꞌtem griego;* Kil nota Hechos 6:1. ruma kꞌu laꞌ, rike kakitzukuj suꞌanik kakikamisaj. 30 Echiriꞌ ri hermanos xketaꞌmaj waꞌ, xkikꞌam bꞌi ri Saulo kꞌa Cesarea y chiriꞌ kꞌut xkitaq bꞌi chupa ri tinamit Tarso.† Tarso e tinamit pa xalax wi ri Saulo.

31 E taq kꞌu ri kikojom rubꞌiꞌ ri Cristo pa ronoje ri luwar re Judea, re Galilea y re Samaria, xekubꞌiꞌ chi utz ma na jinta chi ri keternabꞌex rukꞌ kꞌax. Rike kꞌo xiꞌin ibꞌ kukꞌ chwach ri Qanimajawal. Katajin kꞌu kikꞌiyarik yey yaꞌom kichuqꞌabꞌ y nimarisam kikꞌuꞌx ruma ri Santowilaj Ruxlabꞌixel ri Dios.

32 Xaloqꞌ kꞌu ri Pedro katajin rikꞌowik pa taq riglesias, xopon kukꞌ ri kikojom rubꞌiꞌ ri Cristo pa ri tinamit Lida. 33 Chilaꞌ kꞌu riꞌ xuꞌriqa jun achi Eneas rubꞌiꞌ, yey e wajxaqibꞌ lo junabꞌ riꞌ kꞌo chwa uwarabꞌal ma xuꞌan sik.

34 Ekꞌu ri Pedro jewaꞌ xubꞌiꞌij che: «Eneas, ri Qanimajawal Jesucristo katukunaj. Chatyaktajoq y chayijbꞌaꞌ rawarabꞌal» xcha che.

Chupa kꞌu laꞌ la joqꞌotaj ri Eneas xtakꞌiꞌik. 35 Konoje kꞌu ri ejeqel chupa ri tinamit Lida y pa taq ri luwar re Sarón xkilo ri Eneas kunutajinaq chik; y ruma kꞌu waꞌ, xkiya kibꞌ puqꞌabꞌ ri Qanimajawal.

36 Chupa ri tinamit Jope kꞌo jun ixoq ukojom rubꞌiꞌ ri Cristo, Tabita rubꞌiꞌ. (Pa ri chꞌaꞌtem griego “Dorcas” kecha che.) Waꞌ wiꞌxoq lik uyaꞌom ribꞌ che uꞌanik ri utz y lik kebꞌutoꞌ ri nibꞌaꞌibꞌ.

37 Chupa taq laꞌ la qꞌij ri Dorcas xuchap yabꞌil y xkamik. Ekꞌuchiriꞌ xchꞌaj rucuerpo, xqꞌatisax chikaj pa ri kaleꞌ ja.

38 Ekꞌu ri hermanos e kꞌo Lida xkito kꞌo ri Pedro pa ri tinamit Jope, yey waꞌ xa naqaj kꞌo wuloq. Xekitaq kꞌu bꞌi kaꞌibꞌ achijabꞌ chaꞌ kebꞌeꞌelaj che ri Pedro, jewaꞌ kakibꞌiꞌij: «ꞌAna ko la riꞌ, peta la wara qukꞌ yey mamayin la.»

39 Xyaktaj kꞌu bꞌi ri Pedro y xeꞌek kukꞌ. Echiriꞌ xoponik, xkꞌam bꞌi chikaj pa ri kaleꞌ ja. E taq ri e malkaꞌnibꞌ xkisut rij ri Pedro. Konoje waꞌ kebꞌoqꞌik y kakikꞌut taq ri kꞌul y ri kiqꞌuꞌ xuꞌan ri Dorcas echiriꞌ kꞌa kꞌo kukꞌ. 40 Ekꞌuchiriꞌ, ri Pedro xtaqan che konoje kebꞌel bꞌi. Xuxukubꞌaꞌ kꞌu ribꞌ y xuꞌan orar. Tekꞌuchiriꞌ, xutzuꞌ ri kaminaq, y jewaꞌ xubꞌiꞌij che: «¡Tabita,‡ “Tabita”: Waꞌ e ubꞌiꞌ ri Dorcas pa ri chꞌaꞌtem hebreo. Hch. 9:36 chatyaktajoq!» xchaꞌ. Ekꞌu riꞌ ri Dorcas xujaq ruwach; y echiriꞌ xrilo kꞌo ri Pedro chiriꞌ, asu xtzꞌuyiꞌik.

41 Ekꞌu ri Pedro xuchap ruqꞌabꞌ y xuyako. Tekꞌuchiriꞌ, xebꞌusikꞌij ri kikojom rubꞌiꞌ ri Cristo kukꞌ taq ri hermanas e malkaꞌnibꞌ, y xuya kꞌu chikiwach e laꞌ kꞌaslik. 42 Waꞌ xetaꞌmax chupa ronoje ri luwar re Jope. Ruma kꞌu riꞌ, lik e kꞌi ri xkikoj rubꞌiꞌ ri Qanimajawal Jesucristo. 43 Y ri Pedro xkanaj kan ukꞌiyal qꞌij chupa ri tinamit Jope, chirocho jun achi Simón rubꞌiꞌ, ri kutꞌis tzꞌuꞌum.