29
1 Ko e lea ʻoku kau ki he pule fakamaama, 15 Mo e pule ki he fānau. 22 Ko e lea ki he ʻita, mo e fielahi, mo e kaihaʻa, mo e foʻi, mo e fai kākā.
1 Ko ia kuo liunga lahi hono valokiʻi kae fakakekeva ʻe ia hono kia,
ʻe fakaʻauha fakafokifā ia, pea ʻe ʻikai ha fakamoʻui ki ai.
2 ʻOka pule ʻae māʻoniʻoni ʻoku fiefia ai ʻae kakai:
ka ʻoka maʻu ʻae pule ʻe he angahala ʻoku mamahi ai ʻae kakai.
3 Ko ia ʻoku manako ki he poto ʻoku ne fakafiefiaʻi ʻa ʻene tamai:
ka ʻoku maumauʻi ʻene koloa ʻe ia ʻoku kaumeʻa mo e kau faʻa feʻauaki.
4 Ko e meʻa ʻi he fakamaau totonu ʻae tuʻi ʻoku fokotuʻumaʻu ai ʻae fonua:
ka ko ia ʻoku ne faʻa maʻu ʻae ngaahi foaki ʻoku ne fakamalaʻia ia.
5 Ko e tangata ko ia ʻoku lea lapu ki hono kaungāʻapi,
ʻoku ʻaʻau ʻe ia ʻae kupenga ki hono vaʻe.
6 Ko e fai angahala ʻae tangata angakovi ko e tauhele ia:
ka ʻoku hiva mo fiefia ʻae māʻoniʻoni.
7 ʻOku tokanga ʻae māʻoniʻoni ki he masiva:
ka ʻoku ʻikai tokanga ʻae angakovi ke ʻiloʻi ia.
8 ʻOku tutu ʻae kolo ʻe he kau tangata manuki;
ka ʻoku taʻofi atu ʻae houhau ʻe he kakai poto.
9 Kapau ʻoku fakakikihi ʻae tangata poto mo ha tangata vale,
neongo ʻene lili pe kata, ʻe ʻikai ha fiemālie ʻe tupu ai.
10 ʻOku fehiʻa ki he angatonu ʻaia ʻoku fieinu ki he toto:
ka ʻoku kumi hono laumālie ʻe he māʻoniʻoni.
11 ʻOku fakahā ʻe he vale ʻa hono loto kotoa pē:
ka ʻoku fakalaulauloto ʻe he poto ki he ʻamui:
12 Kapau ʻoku faʻa tokanga ʻaia ʻoku pule ki he ngaahi loi,
ʻe hoko ʻo kovi ʻa ʻene kau tamaioʻeiki kotoa pē.
13 ʻOku faʻa fakataha pe ʻae masiva pea mo e kākā:
pea ʻoku fakatou māmangia hona mata meia Sihova.
14 ʻE fokotuʻumaʻu ke taʻengata ʻae nofoʻa fakaʻeiʻeiki ʻoe tuʻi,
ko ia ʻoku fai totonu ʻae fakamaau ki he masiva.
15 ʻOku tupu ʻae poto mei he meʻa tā mo e valoki:
ka ko e tamasiʻi ʻoku tuku pe ki heʻene faʻiteliha ʻoku ne fakamaaʻi ʻa ʻene faʻē.
16 ʻOka tupu ʻo tokolahi ʻae kakai angahala,
ʻoku tupu mo e fai kovi: ka ʻe mamata ʻae māʻoniʻoni ki heʻenau hinga.
17 Ke ke tauteʻi ho foha, pea te ke fiemālie ʻiate ia:
ʻio, te ne fakafiefiaʻi ho laumālie.
18 ʻOka ʻikai ʻi ai ha kikite ʻoku malaʻia ʻae kakai;
ka ʻoku monūʻia ia ʻaia ʻoku fai ki he fono.
19 ʻE ʻikai poto ʻae tamaioʻeiki ʻi ha lea valoki:
he naʻa mo ʻene ʻiloʻi ʻe ʻikai te ne talangofua.
20 ʻOku ke mamata ki ha tangata ʻoku faʻa lea vave?
ʻOku tau ʻamanaki lelei hake ki he vale ʻiate ia.
21 Ko ia ʻoku fakahikihiki ʻa ʻene tamaioʻeiki talu ʻene kei tamasiʻi,
ʻe faifai pea hoko ia ʻamui ko hono foha.
22 ʻOku fakatupu ʻae fekeʻikeʻi ʻe he tangata faʻa ʻita,
pea ʻoku lahi ʻae fai hala ʻae tangata loto fili.
23 Ko e fielahi ʻae tangata, ʻe fakahifo ai ia ki lalo;
ka ʻe poupou hake ʻae laumālie ʻoe angavaivai ʻaki ʻae ongoongolelei.
24 Ko ia ʻoku kaumeʻa mo e kaihaʻa ʻoku fehiʻa ia ki hono laumālie ʻoʻona:
pea ʻoku fanongo ʻe ia ki he kape, ka ʻe ʻikai te ne fakahā ia.
25 Ko e manavahē ki ha tangata, ʻoku hoko ia ko e tauhele:
ka ʻe moʻui pe ia ʻaia ʻoku falala ki Sihova.
26 ʻOku kumi ʻe he tokolahi ki he loto lelei ʻo ia ʻoku pule;
ka ʻoku meia Sihova ʻae fakamaau ki he tangata taki taha.
27 Ko e tangata taʻefaitotonu ʻoku fakalielia ia ki he angatonu.
Pea ko ia ʻoku fai totonu ʻi hono hala ʻoku fakalielia ia ki he angahala.