6
1 Ko e taʻofi ki he fetongi, 5 Mo e fakapikopiko, 12 Mo e anga pauʻu. 16 Ko e meʻa ʻe fitu ʻoku fehiʻa ki ai ʻae ʻOtua. 20 Ko e lelei ʻe tupu ʻi he talangofua. 25 Ko e kovi ʻoe feʻauaki.
1 ʻE hoku foha, kapau kuo ke hoko ko e fetongi ki ho kāinga,
kapau kuo ke fekuku nima mo ha muli,
2 Tā kuo tauheleʻi koe ʻaki ʻae ngaahi lea mei ho ngutu,
kuo ke fihia koe ʻi he ngaahi lea ʻa ho ngutu.
3 ʻE hoku foha, ke ke fai eni,
koeʻuhi ke ke hao ʻoka ke ka tō ki he nima ʻo ho kāinga:
ʻalu koe, ʻo fakavaivai koe,
koeʻuhi ke ke lavaʻi ai ho kāinga.
4 ʻOua naʻa tuku ke mohe ho mata,
pe tuku ke tulemohe ho laumata.
5 Fakamoʻui koe ʻo hangē ko e kāseli mei he nima ʻoe tangata tuli manu,
pea hangē ko e manupuna mei he nima ʻoe tangata tauhele.
6 ʻA koe ko e fakapikopiko, ʻalu ki he lō;
tokanga ki heʻene anga, pea ke poto ai;
7 ʻAia ʻoku ʻikai hano fakahinohino, pe enginaki, pe ha pule,
8 Ka ʻoku ne tokonaki ʻene meʻakai ʻi he faʻahitaʻu mafana,
ʻo ne tānaki ʻene meʻakai ʻi he ututaʻu.
9 ʻA koe ko e fakapikopiko, ʻe fēfē hono fuoloa ʻo hoʻo mohe?
Te ke toki tuʻu hake ʻafē mei hoʻo mohe?
10 “ʻE toe siʻi pe ʻae mohe, ʻe toe siʻi mo e moʻumohea,
ʻe toe siʻi mo e fehulunaki ʻoe nima ke mohe:”
11 Pea pehē, ʻe haʻu ai hoʻo masiva ʻo hangē ha taha ʻoku fononga mai,
pea mo hoʻo paea ʻo hangē ha tangata ʻoku toʻo mahafu.
12 ʻOku ʻalu mo e ngutu kovi, ʻae tangata ʻoku angakovi,
mo e tangata angahala.
13 ʻOku kakamo ʻe ia ʻaki hono mata, ʻoku lea ʻaki ʻe ia hono vaʻe,
ʻoku ako ʻaki ʻe ia hono louhiʻi nima;
14 ʻOku ʻi hono loto ʻae kovi,
ʻoku ne fakatupu maʻuaipē ʻae kovi;
ʻoku tūtuuʻi ʻe ia ʻae maveuveu.
15 Ko ia ʻe hoko fakafokifā ai ʻa ʻene malaʻia;
ʻe maumau fakafokifā ia taʻehanofakamoʻui.
16 ʻOku fehiʻa ʻa Sihova ki he meʻa ni ʻe ono:
ʻio, ko e meʻa ʻe fitu ʻoku fakalielia ʻi hono ʻao:
17 Ko e mata fielahi, ko e ʻelelo ʻoku loi,
mo e nima ʻoku lilingi ʻae toto ʻoe taʻehalaia,
18 Ko e loto ʻoku fakatupu ʻae ngaahi mahalo kovi,
mo e vaʻe ʻoku veʻe vave ki he fai kovi,
19 Ko e fakamoʻoni loi ʻoku lea ʻaki ʻae ngaahi loi,
mo ia ʻoku fakatupu maveuveu ʻi he kāinga.
20 ʻE hoku foha, ke ke tauhi ʻae fekau ʻa hoʻo tamai,
pea ʻoua naʻa liʻaki ʻae fono ʻa hoʻo faʻē:
21 Nonoʻo maʻuaipē ia ki ho loto,
pea kahoa ʻaki ia ʻi ho kia.
22 ʻOka ke ka ʻalu, te ne tataki koe;
ʻoka ke ka mohe, te ne tauhi koe;
pea ʻoka ke ka ʻā, te mo alea mo ia.
23 He ko e fekau ko e tuʻunga maama ia:
pea ko e fono ko e maama ia;
pea ko e valoki fakapoto ko e hala ia ʻoe moʻui:
24 Ke fakahaofi koe mei he fefine angahala,
mei he lea fakaoloolo ʻae fefine muli.
25 ʻOua naʻa ke holi ʻi ho loto ki hono fakaʻofoʻofa;
pea ʻoua naʻa tuku ke ne kākaaʻi koe ʻaki hono laumata.
26 He ko e meʻa ʻi he fefine feʻauaki ʻoku fakamasivaʻi ʻae tangata ke toe siʻi ʻene konga mā:
pea ʻe tuli ʻe he tonotangata ʻae moʻui mahuʻinga.
27 ʻE faʻa ʻai ʻe ha tangata ʻae afi ki hono fatafata,
pea ʻikai vela hono ngaahi kofu?
28 ʻE ʻeveʻeva ha taha ʻi he funga maka vela,
ka ʻe ʻikai vela hono vaʻe?
29 ʻOku pehē ʻaia ʻoku ʻalu atu ki he ʻunoho ʻo hono kaungāʻapi;
ʻe ʻikai tonuhia ia ʻoku ala ki ai.
30 ʻOku ʻikai fehiʻa ʻae kakai ki ha kaihaʻa,
ʻo kapau kuo ne kaihaʻa ke fakafiemālie hono loto ʻi heʻene feinga fiekaia;
31 Kā, ʻoka ʻilo ia, ʻe totongi ʻe ia ke liunga fitu;
ʻe ʻatu ʻe ia ʻae meʻa kotoa pē ʻo hono fale.
32 Ka ko ia ʻoku tonofefine, ʻoku masiva poto:
ko ia ʻoku ne fai ia ʻoku fakaʻauha ʻe ia hono laumālie ʻoʻona.
33 ʻE lavea ai ia mo ongoongo kovi:
pea ʻe ʻikai holoholoʻi ʻa hono manukia.
34 He ko e fuaʻa ko e fakalili ia ʻoe tangata:
ko ia ʻe ʻikai te ne toe mamae ai ʻi he ʻaho ʻoe totongi.
35 ʻE ʻikai tokangaʻi ʻe ia ha tukungoue;
pea ʻe ʻikai fiemālie ia ʻi hoʻo foaki lahi.