KO E TOHI
ʻAE PALŌFITA KO
SOELI
1
1 ʻOku fakahā ʻe Soeli ʻae ngaahi fakamaau kehekehe ʻae ʻOtua, pea ʻoku ne enginaki ke tokanga ki ai; 8 Pea ke tangi. 14 ʻOku ne tuʻutuʻuni ʻae ʻaukai ke tangi ai.
1 Naʻe hoko ʻae folofola ʻa Sihova kia Soeli ko e foha ʻo Petueli.
2 Fanongo ki he meʻa ni, ʻakimoutolu ko e kau mātuʻa,
pea tokanga homou telinga, ʻae kakai ʻoe fonua.
Kuo ʻai ha meʻa pehē ni ʻi homou ngaahi ʻaho,
pe ʻi he ngaahi ʻaho ʻo hoʻomou ngaahi tamai?
3 Tala ia ki hoʻomou fānau,
pea ke nau tala ki heʻenau fānau,
pea mo e fānau ʻanautolu ki he toʻutangata ʻe taha.
4 Ko ia naʻe tuku ʻe he heʻe kuo kai ʻe he heʻe maumau;
pea ko ia naʻe tuku ʻe he heʻe maumau kuo kai ʻe he ʻunufe fulufulu,
pea ko ia naʻe tuku ʻe he ʻunufe fulufulu, kuo kai ʻe he ʻunufe.
5 ʻAe kau kona, mou ʻā, pea tangi;
pea fakatangiloloa, ʻakimoutolu ʻae kau inu uaine, koeʻuhi ko e uaine foʻou;
he kuo motuhi ia mei homou ngutu.
6 He kuo ʻalu hake ha puleʻanga ki hoku fonua, ʻoku mālohi pea taʻefaʻalaua,
ko hono nifo ko e nifo ʻoe laione,
pea ko hono kouʻahe ko e kouʻahe ʻoe laione lahi.
7 Kuo ne fakalala ʻeku vaine,
pea fohiʻi ʻae kili ʻo ʻeku ʻakau ko e fiki;
kuo ne fakamolemole ia ʻo maʻa;
kuo fakahinehina hono ngaahi vaʻa.
8 Tangi, ʻo hangē ko e taʻahine poloʻi kuo kofuʻaki ʻae tauangaʻa, koeʻuhi ko e ʻunoho ʻo ʻene kei siʻi. 9 Ko e hifo ʻaki ʻae meʻakai, pea mo e hifo ʻaki ʻae meʻainu kuo motuhi ia mei he fale ʻo Sihova;
ʻoku tangi ʻae kau taulaʻeiki, ʻae kau faifekau ʻa Sihova.
10 ʻOku maumau ʻae ngoue,
ʻoku tangi ʻae fonua; he kuo maumauʻi ʻae koane;
ʻoku maha ʻae uaine foʻou,
ʻoku vaivai ʻae lolo.
11 Mou mā, ʻae kau tangata ngoue;
fakatangilōloa, ʻe kau tauhi vaine,
koeʻuhi ko e uite mo e paʻale;
he kuo ʻauha ʻae ututaʻu ʻi he ngoue.
12 ʻOku mōmoa ʻae vaine, ʻoku vaivai ʻae ʻakau ko e fiki;
ko e ʻakau ko e pomikanite, mo e ʻakau ko e ponga,
mo e ʻakau ko e ʻapele foki, ʻio, ko e ʻakau kotoa pē ʻoe ngoue ʻoku mae;
koeʻuhi ʻoku mate ʻae fiefia mei he loto ʻoe ngaahi foha ʻoe tangata.
13 Noʻotaki homou vala, pea tangi, ʻae kau taulaʻeiki:
tangi fakalōloa, ʻae kau faifekau ʻoe feilaulauʻanga;
haʻu, ʻo tokoto ʻi he pō kātoa ʻi he tauangaʻa ʻae kau tamaioʻeiki ʻa hoku ʻOtua:
he ko e feilaulau meʻakai pea mo e feilaulau inu, kuo taʻofi mei he fale ʻo homou ʻOtua.
14 Mou tuʻutuʻuni ʻae ʻaukai,
fanongonongo ʻae fakataha mamafa,
tānaki ʻae kau mātuʻa,
pea mo e kakai kotoa pē ʻoe fonua ki he fale ʻo Sihova ko homou ʻOtua,
pea tangi kia Sihova, ʻo pehē,
15 ʻOiauē ʻae ʻaho!
He kuo ofi ʻae ʻaho ʻo Sihova,
pea ʻe hoko mai ia ʻo hangē ko e fakaʻauha mei he Māfimafi.
16 ʻIkai kuo motuhi ʻae meʻakai mei hotau mata,
ʻio, ko e fiefia mo e nekeneka mei he fale ʻo hotau ʻOtua?
17 ʻOku popo ʻae tenga ʻi he loto kelekele,
ʻoku lala ʻae ngaahi feleoko,
kuo holoki ʻae ngaahi fale koloa; he kuo mae ʻae koane.
18 ʻOiauē ʻae toʻe ʻae fanga manu!
ʻOku feinga ʻae fanga pulu, koeʻuhi ʻoku ʻikai hanau mohuku;
ʻio, ʻoku tuʻutāmaki ʻae fanga sipi.
19 ʻE Sihova, te u tangi kiate koe:
koeʻuhi kuo kai ʻe he afi ʻae mohuku ʻoe toafa,
pea kuo tutu ʻe he ulo afi ʻae ngaahi ʻakau kotoa pē ngoue.
20 ʻOku tangi foki kiate koe ʻae fanga manu ʻoe vao:
koeʻuhi ʻoku mōmoa ʻae ngaahi tafeʻanga vai,
pea kuo kai ʻe he afi ʻae mohuku ʻoe toafa.