17
Kugela Kumgongo Vilozo
(Mat. 18:6-7, 21-22; Mlk. 9:42)
1 Yesu kawalongela wanahina zake, “Mbuli ziwatendaga wanhu watende vilozo hazilekaga kulawilila, ila kojona ng'hani munhu ija yondayazitende zilawile! 2 Vihamnogele munhu ija yafungigwe msingo dibwe kulu da kusiginhila, abaho, yakasigwe m'bahali kubanza kumtenda imwe wa wanhu wano wadodo kuloza. 3 Avo teganyeni!
“Kamba ndugu yako yahaloza, mkomhokele, yahaleka kuloza, mgele kumgongo. 4 Kamba yahakutendela vilozo mianza saba mdizua dimwe, na mianza yose saba keza kumwako yolonga, ‘Nileka,’ mgele kumgongo.”
Nhamanila
5 Watumigwa wa Kilisto wamulongela Mndewa Yesu, “Tongezele nhamanila yetu.”
6 Mndewa kawalongela, “Kamba muhawile na nhamanila ndodo kamba mbeyu ya haladali, muhadahile kuulongela mkuyu uno, ‘Ng'ozoka ukaihande m'bahali!’ Na uhawahulike.
Sang'hano za Nyakadala
7 “Tulonge munhu imwe mmwanza wenu kana nyakadala wa kumulimila ama kumchungila ng'hondolo. Yahabwela kulawa kumgunda, komulongela nyakadala wake yatende hima yeze kuja mandia? 8 Nokona si vivo! Ila komulongela, ‘Nhelekela mandia gangu hima, uisasale unisang'hanikile mbaka niheshiliza kuja na kung'wa, kileka na gweye uje mandia gako.’ 9 Avo, komuheweza nyakadala ija avija viyagatendile gaja gayalagizwe? 10 Vivija na mweye! Muhatenda kila kinhu kimulongeligwe mkitende, longeni, ‘Tweye twa nyakadala tulibule maliho, tutenda gaja gatulondigwe kutenda tu.’ ”
Yesu Kowahonya Wanhu Longo Dimwe
11 Yesu viyakalile yochola Yelusalemu, kabitila muimbaka ya isi za Samalia na Galilaya. 12 Viyakalile yokwingila muna ikiwambo kimwe, wanhu longo dimwe wolumwa dikulu wamwizila, wema kutalitali, 13 wenula dizwi wolonga, “Mndewa, Yesu, utonele bazi!”
14 Yesu viyawawene kawalongela, “Gendeni ha iwakulu wa nhambiko wakawalole goya.”
Viwakalile wochola mnzila wahona. 15 Munhu imwe mmwanza wao viyonile kahona, kabwela, kenula dizwi yomuyenzi Mulungu. 16 Kamfugamila mavindi Yesu na kumgwaa hewela. Na munhu ija kakala Msamalia. 17 Ila Yesu kauza, “Hawakalile wanhu longo dimwe wahonyigwe? Wakwahi wayagwe tisa? 18 Haduhu hata munhu imwe yabwelile kumuheweza Mulungu ila muhenza ino yeiyeka?” 19 Yesu kamulongela, “Ima wima uchole, nhamanila yako ikuhonya.”
Kwiza kwa Undewa wa Mulungu
(Mat. 24:23-28, 37-41)
20 Mafalisayo wayagwe wamuuza Yesu, wolonga, “Zua dilihi Undewa wa Mulungu vondawize?”
Heyo kawalongela, “Undewa wa Mulungu hawiza mkoneka na meso. 21 Haduhu munhu yondayalonge, ‘Loleni wa hano!’ Ama ‘Wa haja!’ Kwavija Undewa wa Mulungu wa mmwenu.”
22 Abaho, kawalongela wanahina zake, “Kipigiti chokwiza vondamusulukile kona zua dondanibwele, nie, Mwana wa Munhu, ila hamujona. 23 Na wanhu wowalongela, ‘Loleni kahaja!’ ama, ‘Loleni kahano!’ Ila sambimuwakweleleze. 24 Kamba vija lumwemwe vulumweka kulawa kuulanga na kumwemwesa kulawa ng'ambu ino mbaka ng'ambu ija, avo vivo vondaiwe mdizua dondanize, nie, Mwana wa Munhu. 25 Ila tanhu nolondigwa nigaye ng'hani na kulemigwa na wanhu wa mulelo uno. 26 Kamba viikalile mkipigiti cha Nuhu vivo vondaiwe mdizua dondanibwele, nie, Mwana wa Munhu.* Nyandiko ziyagwe za umwaka zabule mnhongo wa 26. 27 Wanhu wose wakala woja na kung'wa, wosola na kusoligwa, mbaka zua dija Nuhu viyengile muisafina,† Uhalonda kuitanga nhegulo ya Safina, soma kitabu cha MWANDUSO 6—7. na mvula ng'hulu ng'hani itoa na kumemeza mazi na kuwakoma wanhu wose. 28 Yowa kamba viikalile kipigiti cha Loti. Wanhu wose wakala woja na kung'wa, wogula na kuguza, wohanda na kuzenga, 29 mbaka zua dija Loti viyasegele wambo da Sodoma, moto na baluti vihumuluka hasi kulawa kuulanga na kuwakoma wanhu wose. 30 Vino vivo vondaiwe mdizua dondanigubuligwe, nie, Mwana wa Munhu.
31 “Mdizua dija munhu yali kukiswili cha ng'anda yake sambiyahumuluke hasi yengile mng'anda yakasole vinhu vake, na munhu yali kumgunda sambiyabwele ukae. 32 Kumbukileni gam'vikile mtwanzi wa Loti! 33 Munhu yoyose yogeza kuukombola ugima wake, kowagiza, na munhu yoyose yowagiza ugima wake, koukombola. 34 Nowalongela, ikilo ija wanhu wabili wowasa mulusazi lumwe, imwe kosoligwa na imwe kolekigwa. 35 Watwanzi wabili wokomola ngano hamoja, imwe kosoligwa na imwe kolekigwa. 36 Wanhu wabili wolima mumgunda, imwe kosoligwa na imwe kolekigwa.”‡ Nyandiko ziyagwe za umwaka zabule mnhongo wa 36.
37 Wanahina zake wamuuza, “Mndewa, kwahi?”
Yesu kawalongela, “Hohose hauli mtufi, baho hondawaiting'hanile vimhungu.”