3
Da man ane da oman no pole oda blo God
1 Wa. Da sneik i bin prapa smat prom ol dem nada animal wea da AntapGod i bin mekem. Da sneik i bin tok diskain po da oman, ‘Ei, lisen pas. God bin spik dis tok a? “Yu no lau po kaikai eni prut prom ebri tri insaid lo gadan a?” ’
2 Dat oman i bin ansabaik po da sneik ane spik diskain, ‘Mitu ken kaikai prut prom eni tri insaid lo da gadan, 3 bat God i bin spik diskain, “Yutu no lau po kaikai prut prom dat tri wea i melen lo gadan, ane yutu no lau po tasem, bambai yutu go ded.” ’
4 Bat da sneik i bin spik diskain po da oman, ‘Nono, i no tru! Yutu nogo ded. 5 God i sabe wen yutu go kaikai prut prom dat tri, yutu go sabe niu samting: yutu go kam wase God. Yutu go gad sabe blo gud ane sabe blo nugud.’
6 Wen da oman i bin luk dem prut blo dat tri, i prapa gud po kaikai, ane i prapa nais po luk ane dat tri i ken prapa meke sambodi sabe niu samting, da oman i bin nake sam prut ane em bin kaikai. Em bin wantaim gibe sam prut po man blo em ane em bin kaikai tu. 7 Stretwei nau wen demtu bin pinis kaikai, demtu bin sabe ol niu samting, ane demtu bin pil sem bikoz demtu bin neket. Demtu bin teke ol lip blo pigtri, somapem tugeda wase klos po kabare demtuselp.
8 Lo da smolwin blo naittaim, da man ane oman i bin lisen da noiz blo da AntapGod wagbaut insaid lo da gadan. Demtu bin aide demtuselp melen wea ol tri solong da AntapGod nogo paine demtu. 9 Den da AntapGod i bin singaut po da man ane spik diskain, ‘Oi! Wea yu?’
10 Da man i ansa po em ane spik diskain, ‘Ai bin lisen noiz blo yu wagbaut lo da gadan, ane ai bin prait nau bikoz ai neket, ane ai bin go aid.’
11 Da AntapGod i askem, ‘Wiskain yu sabe yu neket? Uda bin spik po yu? Yu mas bin kaikai sam prut, prom dat tri wea ai bin oda yu no po kaikai?’
12 Da man i bin ansa, ‘Da oman wea yu bin gibem po stap lo mi, em bin gibe mi sam prut blo dat tri, ane ai bin kaikai dat prut.’
13 Den da AntapGod i bin spik diskain po da oman, ‘Wanem yu bin meke demkain po?’
Da oman i bin ansarem, ‘Da sneik i bin lai mi ane ai bin kaikai prut blo dat tri.’
14 Den da AntapGod i bin tok diskain po da sneik:
‘Bikoz yu bin meke diswan,
panis blo mi i go poldaun antap wea yu
po splitap yu prom ebridem teimanimal,
ane prom ebridem wailanimal.
Prom distaim nau yu go krol lo beli blo yu
ane yu go kaikai dast prom graun antil laip blo yu go pinis.
15 Prom distaim nau yu ane da oman i gobi ol enami.
Ane pikinini blo yu ane pikinini blo em i gobi ol enami tu.
Pamlelain blo em i go smase ed blo yu,
ane yu go baite put blo pamlelain blo em.’
16 Da AntapGod bin spik po da oman diskain:
‘Yu go gad prapa adtaim wen yu pamle
ane i gobi prapa nadakain bigpein wen yu go bone pikinini.
Bat yu go stil wande man blo yu,
ane em gobi bos blo yu.’
17 Ane God i bin spik diskain po da man:
‘Yu bin lisen po tok blo oman blo yu,
ane yu bin mekem wanem em bin spik.
Yu bin mata kaikai dem prut blo dat tri
wea ai bin oda yu no po kaikai.
Bikoz prom wanem yu bin mekem,
da graun i go gad panis blo mi.
Yu go meke adwok groe ol kaikai blo yu prom da graun,
antil da dei yu go ded.
18 Da graun i go lego go ausaid po yu
ol plant wea i gad ol sap samting ane ol bainplant,
bat yu go kaikai ol plant wea i lego olkain sid,
ane ebri pruttri wea i lego ol prut gad sid insaid.
19 Yu go adwok lo laip blo yu
po groe ol kaikai blo yu
antil da dei wen yu go ded
ane wen yu ded
bodi blo yu go gobaigen po da graun.
Ai bin meke yu prom da graun
ane yu go gobaigen po da graun.’
Zazment blo God
20 Adam i bin kole oman blo em Ib* Ib wea langus blo dem Zuwispipol i min ‘laip’., bikoz em gobi mama blo ebri pipol ebriwea. 21 Ane da AntapGod i bin meke klos prom skin blo animal po Adam ane oman blo em.
22 Den da AntapGod i bin spik diskain po emselp, ‘Prapa tru! Dat man i bin kam wase yumpla, sabe ebriting blo gud ane sabe ebriting blo nugud. Mait demtu go kaikai prut blo da tri i gibe laip, ane den demtu go gad longlaip poeba.’ 23 Da AntapGod i bin sanewei Adam ane Ib go ausaid prom da gadan blo Iden, po digemape graun, plante gadan kaikai. I bin prom graun wea da AntapGod i bin meke man. 24 Em bin oda demtu po go ausaid prom da gadan ane da AntapGod i bin pute ol prapa strongeinzel lo istsaid blo da gadan blo Iden. Da AntapGod i bin wantaim pute wan sod wea i gad paia ban raun dat sod, ane dis sod i tan ebriwea po stape enibodi uda wande go po da tri i gibe laip.