2
Zona i bin prea
1 So Zona i bin prea prom insaid da bigpis po da AntapGod blo em. 2 Em prea diskain:
‘Melen wea trabol blo mi ai bin singaut po God,
ane em bin ansa mi.
Prom insaid da greib ai bin singaut po elp,
ane yu bin lisen krai blo mi.
3 Yu bin sakwei mi insaid wea prapa dipwata,
raitandanit wea da batam.
Mata wata ebriwea ane dem prapa bigweib
bin role mi raun ane raun ane ol bin kaba mi.
4 Ai bin tingk nau,
i bin wase God i bin puse mi go longwei prom em.
Ai bin tingk nau ai nogo luk da oli Tempol blo yu gen.
5 ‘Ai bin singdaun wea da prapa dipwata,
sigras pas wea ed blo mi.
6 Ane ai bin rait daun wea stat blo dem maunten,
de andanit insaid wea da solwata.
Ai bin tingk ai go lok ausaid prom laip,
wea dem doa i go mata lok poeba.
Bat yu, AntapGod blo mi,
yu bin seibe mi prom da greib
ane yu bin gibe laip blo mi baigen po mi.
7 AntapGod, wen ai bin klostu pinis,
ai bin tingbaut yu insaid da oli Tempol blo yu
ane yu bin lisen prea blo mi.
8 Demwan uda pole dem laigod
ane tane baik lo God,
no go gede gudlaip wanem God i wande gibe dempla.
9 Po mi nau, ai go mata preize yu ane gibe mina bigeso po yu.
Ai go meke opring, preiz opring po yu.
Ai go kipe ol dem promis ai bin mekem po yu.
Mata yu da AntapGod ken seibe ebribodi.’
10 Den da AntapGod i bin spik po da bigpis po spiu Zona antap lo sanbis.