12
Ba meybil ko ayuw
1 SOMOL, mu ayuwegmad!
Dariy be’ ni bfel’ nike magay;
girdi’ nib yul’yul’ e dab kun piri’egrad’.
2 Yad gubin ni yad be ban nigedyad;
yad be pi’rad ngalang ko thin.
3 SOMOL, mu taleg e pi balwoth nem ni sasalap!
Mu ning e pi langef ni ufanthin nem nma ga’ar,
4 “Thin romad e ma yagnag ngomad e n’en ni gamad ba’adag.
Bay gogned e n’en ni gamad be finey,
ma dariy be’ nrayag ni talegmad.”
5 Be ga’ar SOMOL, “Chiney e bay gub,
ni bochan e pi’in ba t’uf e ayuw rorad e yibe gafgow nagrad
ma pi’in yibe gafgow nagrad e yad be gel’gel’ u fithik’ e amith.
Bay gu pi’ ngorad e re ayuw ni yad be yim’ ni bochan.”
6 Tin ma micheg SOMOL e rayag ni nge pagan’uy ngay;
bod feni fel’ e silber,
ni kan urfiy ke be’ech u mit e nifiy ni medlip yay.
7-8 Pi’in kireb e leam rorad e yad bay u gubin yang,
ma gubin e girdi’ nma uf ko n’en nib kireb.
A SOMOL, mu ayuwegmad,
u pa’ e miti girdi’ nem.
DRAFT VERSION — Proofreading in progress