1 Me ul ul ngay ni ga’ar, “Mu ted fanmediyan ko re bugithin ni ba’aray! Bay boch e girdi’ u roy ni dab ra m’ad me yan i taw ko ngiyal’ ni bay ra guyed e gagiyeg rok Got nike taw ni bay gelngin nib gel.”

2 Ma nel’ e rran nga tomuren me fek Jesus Peter, nge James, nge John ngranod nga daken bburey nib tolang ni go’ yad. Ma nap’an ni yad be changar ngak me thil ya’an, 3 me pig ram’en e mad rok ngari galgal ram’en me wechwech; ndariy be’ u roy u fayleng nrayag ni nge wechwechnag ni aram rogon. 4 Ma fa dalip i gachalpen e ra guyed Elijah nge Moses, ni yad be non Jesus. 5 Ma aram me ga’ar Peter ngak Jesus, “Tamchib, rib manigil ni kadbad ngaray. Nggu toyed dalip i tent, nreb e ngam par ngay, ma reb e nge par Moses ngay, ma reb e nge par Elijah ngay.” 6 Ya kari gel e tamdag ngak Peter nge fa gali cha’ ndaki nang Peter e n’en ni nge yog.

7 Me yib i m’ug bangi manileng nge tagalul’ nagrad, me yib ba lam u fithik’ fa gi manileng ni ga’ar, “Ireray Fakag nrib t’uf rog, ere mu telmed ngak!” 8 Miyad chachangar u to’obrad ma dar guyed yugu be’ ni bay rorad; ya kemus ni go’ Jesus e ra guyed ni bay rorad.

9 Ma nap’an ni yad be yib u daken fare burey nga but’ me tay Jesus chiylen ngorad ni ga’ar, “Dab mogned ku be’ e tin ni kam guyed nge yan i mada’ ko ngiyal’ ni kan faseg e en ni Fak e Girdi’ ko yam’.”

10 Miyad fol ko tin keyog Jesus ngorad, machane miyad tabab i weliy rorad e re bugithin nem ni be lungurad, “Mangfan e re bugithin nem nike yag ni ngan faseg ko yam’?” 11 Miyad fith ngak Jesus ni lungurad, “Mangfan ni ga’ar e pi tamchib ko Motochiyel e Elijah e ra yib nsom’on?”

12 Me fulweg Jesus ngorad ni ga’ar, “I Elijah e ir e ra yib nsom’on ni bochan e nge fal’eg rogon urngin ban’en nge tay. Machane mangfan ni be yog e babyor nib thothup ni en ni Fak e Girdi’ e bo’or e gafgow ni bay tay ma bay ndarifannag? 13 Machane nggog ngomed, nike yib Elijah ke rin’ e girdi’ urngin e tin ni yad ba’adag ni ngar rin’ed ngak, ni bod rogon ni yog e babyor nib thothup murung’agen.”

14 Ma nap’an nra sulod ngak fa tinem i gachalpen, miyad guy e girdi’ ni pire’ ni pire’ ni kar mu’ulunggad ngorad, ni be tugthin boch e tamchib ko Motochiyel ngak pi gachalpen Jesus. 15 Ma nap’an ni guy fapi girdi’ ni gubin Jesus miyad gin ngak, miyad mil i yan ngak ni kar felfelan’gad. 16 Me fith Jesus ngak pi gachalpen ni ga’ar ngorad, “Mang e gimed be tugthinnag?”

17 Me fulweg be’ u fithik’ fapi girdi’ ni aram urngin ngak Jesus ni ga’ar, “Tamchib, kug fek fakag ni pumo’on i yib ngom, ya ke ying ba mo’onyan’ ngak ndabkiyag ni nge non. 18 Demturug e gin nra yib riy ngak me aw nga but’, ni be yib e wuth u l’ugun, ma be wochar’iy nguwelen nike margey. Me ere kug wenig ngak e pi cha’ney ni gachalpem ni ngar tulufed e re mo’onyan’ ney nge chuw rok, ma de yag rorad.”

19 Me fulweg Jesus ngorad ni ga’ar, “Ri der mich Got u wun’med! Uw n’umngin nap’an nthingar gu par romed? Uw n’umngin nap’an ni nggu k’adan’ug romed? Mfeked fachi pagel i yib ngog!” 20 Miyad fek fachi pagel nike ying ba mo’onyan’ ngak i yan ngak Jesus.

Ma nap’an ni guy fare mo’onyan’ Jesus, me gelnag fare mo’onyan’ e m’ar rok fare pagel nge margey ni be da’da’, me thig nga but’ ngi i leapleap u but’, ma be yib e wuth u l’ugun. 21 Me fith Jesus e chitamngin fare tir ni ga’ar, “Uw n’umngin nap’an ni be yib e ren’ey ngak?”

Me ga’ar, “Ka nap’an ni kab bitir. 22 Ma ke yo’or yay nike yin’ nga fithik’ e nifiy nge nga fithik’ e ran ni be guy rogon ni nge li’ ngem’. Machane fa’anra bay ban’en nrayag rom ni ngam rin’ ngak, me ere mu runguymow ngam ayuwegmow!”

23 Me ga’ar Jesus ngak, “Ke lungum, fa’an rayag rom! Urngin ban’en mrayag rok be’ ni fa’an ra bay e michan’ rok.”

24 Ma ka chingiyal’ nem me non e chitamngin fare pagel ni ba ga’ gaman ni be ga’ar, “Bay e michan’ rog, machane de gaman, ere mu ayuwegneg nge gel e michan’ rog!”

25 Me guy Jesus ni be yib e girdi’ ni pire’ ngorad, me non nib gel ngak fare mo’onyan’ ni ga’ar, “I gur e re mo’onyan’ nir ni ga ma ying ko girdi’ ngar bilinggad ma dabkiyag ni ngar nonod, gu be yog ngom ni ngam chuw u fithik’ e cha’nir ma dab kum sul ngak bayay!”

26 Me tolul fare mo’onyan’ me margeynag me da’da’nag facha’ nib gel, me chuw u fithik’ i dow. Me par fare pagel ni gowa ke yim’, ni gubin e girdi’ me lungurad, “Ke yim’!” 27 Machane me kol Jesus pa’ fachi pagel nge sak’iynag, me sak’iy.

28 Ma nap’an ni chuw Jesus nga naun ni go’ yad e pi’in gachalpen, miyad fith Jesus ni lungurad ngak, “Mangfan nde yag romad ni nggu tulufed fare mo’onyan’ nge chuw u fithik’ facha’?”

29 Me fulweg Jesus ngorad ni ga’ar, “Dakuriy ban’en ngabang nrayag ni nge tuluf e mit ney e mo’onyan’, ya kemus ni meybil e rayag riy.”

30 Mranod u rom ngranod u lan yu Galile, ndabun Jesus ni nge nang be’ e gin bay riy, ni bochan e be machibnag pi gachalpen ni be ga’ar ngorad, 31 “En ni Fak e Girdi’ e bay ni pi’ nga pa’ e girdi’, ma bay ra li’ed ngem’; ma fa’an bay nli’ ngem’ ma dalip e rran nga tomuren min faseg ko yam’.”

32 Ma dar nanged fan e re bugithin nem ni yog ngorad, machane ra tamdaggad ni ngar fithed ngak.

33 Me ere rabad nga Kapernaum, ma nap’an nranod nga naun me fith Jesus fa pi’in gachalpen ni ga’ar, “Mang e um tugthin niged u kanawo’?”

34 Ma dar fulweged lungun, ya ur tugthingad u kanawo’ ko arorad ni ir e th’abi tolang u fithik’rad. 35 Me par Jesus nga but’, me pining fa ragag nge l’agruw i gachalpen ngarbad ngak me ga’ar ngorad, “Aromed ni ba’adag ni nge mang ir e m’on e thangri tay ir ni ir e ba tomur u fithik’med, me mang ir e tapigpig romed ni gimed gubin.” 36 Me fek Jesus bochi tir nge sak’iynag u p’eowcherad. Me longobiy pa’ ngak fachi tir me ga’ar ngorad, 37 “En nra ayuweg reb e pi bitir ney ni bochag e ke ayuwegneg; ma en nra ayuwegneg e gathi kemus ni gag e be ayuwegneg, ya ku be ayuweg e en ni ir e ke l’oegeg ku gub.”

38 Me ga’ar John ngak, “Tamchib, kug guyed be’ nib mo’on ni be maruwel nga fithingam ngi i tuluf e mo’onyan’ rok e girdi’, me ere ku gogned ngak ni nge dabki rin’, ya gathi ir be’ ko ba’ rodad e girdi’.”

39 Me ga’ar Jesus ngorad, “Dab mu guyed rogon ni ngam taleged, ya dariy be’ nra maruwel nga fithingag nge ngongliy e maang’ang me tomur riy me yogneg nga dalib. 40 Ya en nder togopluw ngodad e bagdad. 41 Mu ted fanmediyan ko re bugithin ni ba’aray: En nra pi’ ba gaf i ran i unum bigimed ni bochan e gimed pi gachalpeg e rib muduwgil ni yira pi’ puluwon ngak.”

42 “Kabfel’ ni yira the’ gafan ba malang ni ba ga’ nga belel’ugun be’ nga nin’ nga maday ko bin ni nge waliy reb e pi bitir ney ni kug mich u wan’ nge pi’ keru’ ngog. 43 Ere fa’anra waliyem baraba’ i pa’am ngam pi’ keruum ngak Got, ma ga th’ab ngam n’ag! Ya kabfel’ rogom ni ga ra yan ko yafos ndariy baraba’ i pa’am ko bin ni kabay pa’am nruw raba’ ma ga yan nga fithik’ e nifiy ni dabi math bi’id. 44  * Boch e babyor e kan puthuy ngay e verse 44: U rom e fakl’ud ni be longuyem e dar yim’, ma nifiy ni be urfiyem e dabi math bi’id (mu guy e verse 48). 45 Ma fa’anra waliyem baraba’ i em ngam pi’ keruum ngak Got, ma ga th’ab ngam n’ag! Ya kab fel’ rogom ni ga ra yan ko yafos ndariy baraba’ i em ko bin ni kabay em nruw raba’ mi non’em nga fithik’ e nifiy ni dabi math bi’id. 46  † Boch e babyor e kan puthuy ngay e verse 46: U rom e fakl’ud ni be longuyem e dar yim’, ma nifiy ni be urfiyem e dabi math bi’id (mu guy e verse 48). 47 Ma fa’anra waliyem baraba’ i lan owchem ngam pi’ keruum ngak Got, ma ga luf! Ya kabfel’ ni ngam man ko gin nsuwon Got ni ta’ab raba’ i lan owchem ko bin ni kabay lan owchem nruw raba’ mi non’em nga fithik’ e nifiy ni dabi math bi’id. 48 Ko gin nder yim’ e fakl’ud u downgiy riy, ma dabi math e nifiy riy bi’id.

49 “Ya gubin e girdi’ ni bay nsol nagrad ko nifiy.

50 “Sol e bfel’. Machane fa’anra chuw e buday riy, ma mang e ga ra rin’ ngay miki sul e buday nga fithik’ bayay?

“Thingar um pired ni bay e sol u fithik’med, mu um pired ni bfel’ thilmed.”