1 I fekeg fare mo’on ko fare garog nib sap ko ngek, 2 mu rom e gguy riy fare ra’en e maluplup’ u tagil’ Got rok yu Israel nike yib ko ngek. Ma lungun SOMOL e bod lingan e day ni be chub, ma fayleng e gal ra’en nib maluplup’. 3 Re ya’an ney e bod fa bin ni gguy ko fa ngiyal’ ni yib Got ni nge gathey yu Jerusalem, nge fa bin ni gguy u charen e l’ul ni Kebar. Ma aram mug palpal nga daken e but’. 4 Fare ra’en nib maluplup’ e yan u langan fare garog ni ngek nge yan ngalan fare Tempel.

5 Me chibiyeg fare kan nthothup rok SOMOL ngalang nge fekeg ngalan e thal ni langgin e yoror, ni aram e gin gguy riy fare Tempel nike suguy fel’ngin SOMOL. 6 Fare mo’on e sak’iy nga chireg u rom, mug rung’ag laman SOMOL nike non ngog nga wuru’ fare Tempel ni ga’ar, 7 “Fak e girdi’, irera’ tagl’ig. Bay gu par u roy u fithik’ e girdi’ nu Israel nggu gagiyeg nagrad ni manemus. Dakriy reb e girdi’ nu Israel fa reb e pilung rorad ni ku ra m’ay nag fan fithingag nib thothup ngi i tayfan yug boch e got ara malang ko yam’ rok fapi pilung rorad nike yim’. 8 Pi pilung e kar toyed e naun rorad nib chugur ko Tempel rog ni kar ta’reb foyin niged e mab rorad ko mab ko Tempel rog, ma ke chugur ni nge chafin langan e mab rorad ko mab ko Tempel rog, kemus ni bang i rungrung e bay u thilmad. Mu ur dariyfan niged fithingag nib thothup ko urngin e pin’en ni ur rin’ed nib sunsonogor, ma aram u fithik’ e damumuw rog mu gu thangrad. 9 Chiney e thingar rtalgad i tayfan yug boch e got miyad pag i tayfan fapi malang ko yam’ rok e pilung rorad. Fa’anra yad ra rin’ ni bod ni kugog, ma bay gu par u fithik’rad ni dariy n’umngin nap’an.”

10 Miki ul ul SOMOL ngay nge ga’ar, “Fak e girdi’, mog ngak e girdi’ nu Israel murung’agen fare Tempel, mag pagrad ngar filed rogon yalen ni yima rin’. Mu gagiyeg nagrad ngar tamra’gad ko gafarig rorad ni kireb. 11 Ma aram e fa’an yad ra tamra’ ko tin kar ngongliyed, mag weliy ngorad rogon ni kan tanomnag fare Tempel: yungin ni ngan yan riy nga langgin nge yungin ngan sul riy nga wean, nge rogon ya’an, nge yarmen urngin ban’en riy, nge gubin e motochiyel riy. Mu yoloy gubin e pin’ey nga but’ ngar guyeg rogon ni kan yarmiy gubin ban’en nge yag ni rrin’ed gubin e gam’ing riy ni rogon ko motochiyel. 12 Irera’ yalen fare Tempel: Gubin yang nib liyeg charen u daken p’ebgul fare burey e ba tabgul mab thothup.”

13 Pin’ey e folen fare altar, nib ta’reb rogon e fol nni fanay ngay nge fare Tempel. Charen e re altar ney u daken e but’ e kan ker ba meab riy nib liyeg, ni rliw’ e inch tom’arngin ma rliw’ e inch radan, ma ragag e inch tolngin e ba’ ni wuru’ i marichalen re meab nem. 14 Thal ni th’abi migid nga but’ ko fare altar e aningeg e fit tolngin ngalang. Ma thal ni migid ngay ni aram e thal ni lukngun e rliw’ e inch ni ba’achig riy u gubin raba’ ma medlip e fit tolngin. Ma thal ni migid ngay ni ir e th’abi ba daken e ku rliw’ nge mereb e inch e ba’achig boch riy ko thal nem nu tanggin. 15 Thal ney ni th’abi p’ebgul, ni ireram fa gin’en ni yima urfiy e maligach u daken e ku medlip e fit tolangin. Fapi nochi gagey ko fa aningeg i tabthung e ir e bm’ug ngalang u daken, ga’ngin yang p’ebgul. 16 Rad u daken p’ebgul e re altar nem e ta’reb n’umngin nga radan, ni go’ rliw’ e fit u gubin raba’ riy. 17 Thal ni lukngun e ta’reb ga’ngin radan nge n’umngin, ni go’ rliw’ nge aningeg e fit n’umngin u gubin raba’, ma kanon’ marichelen i yan ke liyeg ni ragag e inch tolngin. (Meb riy nib liyeg e rliw’ e inch radan.) Tawo’ ngalang ko fare altar e bay ko ba’ ni ngek riy.

18  SOMOL ni Th’abi Tolang e ga’ar ngog, “Fak e girdi’, mmotoyil ko n’en ni nggog ngom. Nap’an ni yira toy fare altar, ma ngam og nag ni aram e ngam pi’ e maligach ni mo’oruf u daken ma ngam atngiy daken nga racha’en fapi gamanman ni kan maligach ngay. 19 Fapi prist ni girdi’en fare ganong rok Levi nrabad ku Zadok e kemus ni yad e picha’ ni yad ra yib nga p’eowcheg ngar pigpiggad ngog. I Gag SOMOL ni Th’abi Tolang e gu be ta’chiylen e ran’ey. Ga ra pi’ ba fak e garbaw ni pumo’on ngorad ni ngan pi’ nib maligach ni fan ko denen. 20 Gur e ga ra fek boch u racha’en ngam thiy nga taban fapi gagey u tabthungen e thal ni daken fare altar, nge tabthungen e thal ni lukngun fare altar, nge ga’ngin yang i mirichren. Irera’ rogon i machalbognag fare altar ni nge tabgul. 21 Me gur e ngam fek fare fak e garbaw ni pumo’on ni kan pi’ ni maligach ni fan ko denen ngam urfiy ko gin’en ni kan duwgiliy u wuru’ e gin ba’ fare Tempel riy. 22 Ma bin migid e rran ma ga fek ba kaming ni pumo’on ni dariy ban’en nib kireb u downgin ngam pi’ nib maligach ko denen. Mu fek e racha’ riy ngam machalbognag fare altar ni bod nim rin’ ko fare garbaw ni pumo’on. 23 Nap’an ni ga ra mu’ i fal’eg rogon e binem, mag fek ba fak e garbaw ni pumo’on nge ba fak e saf ni pumo’on ni dariy bang rorow nib kireb, 24 ngam fekrow i yib ngog. Fapi prist e ngar atngiyed e sol nga daken fagal gamanman min orfeg row ni maligach ngog. 25 Medlip e rran nra reb e pi rran nem ma ngam pi’ ba kaming, nge ba garbaw ni pumo’on, nge ba fak e saf ni pumo’on ni maligach ni fan ko denen. Ni yad urngin ni dariy bang rorad nib kireb. 26 Re medlip i rran nem e fapi prist e ngar thothup niged fare altar miyad t’ar midlin ni aram e ngu’un bangbeng riy. 27 Nap’an nra m’ay fare wik, ma fapi prist e ngar pi’ed u daken fare altar e maligach ni mo’oruf nge maligach ni nge gapaseg thilin Got nge girdi’. Ma aram e bay i felan’ug ngomed ni gimed gubin. I Gag fare SOMOL ni Th’abi Tolang e kugog e pi thin ney.”