1 I SOMOL ni Th’abi Tolang e ga’ar, “Fak e girdi’, mu non nib togopluw ngak Gog, ni ir e ga’ ko gagiyeg ko fagal nam nu Meshek ngu Tubal, ni ngamog ngak ni gag e to’ogor rok. 2 Bay gu soreg nga bang nib be’ech nggu gafaliy nga orel u lan e lel’och nge yib i taw ko fapi burey nu Israel. 3 Ma aram e bay ggad e gat’ing nge mul u ba’ ni gil’ay i pa’ nge pi gan e gat’ing u ba’ ni mat’aw i pa’. 4 I Gog nge raba’ i salthaw rok nge pi’in karmanged ngak e bay ra thiggad ni karm’ad u daken fapi burey nu Israel, ma bay gu pag e ldow rorad nge mang ggan ko urngin e arche nge gamanman ni malboch. 5 Bay ra thiggad ni yad ba yam’ u lan bang i tafelfel’. I Gag SOMOL ni Th’abi Tolang e gu be non. 6 I gag e bay gup’ e nifiy u daken e but’ nu Magog nge ga’ngin dap’el’ay ni gin ma par e girdi’ riy ni dariy ban’en nma magawon nagrad, ma urngin e girdi’ ni bayi nang ni Gag fare SOMOL. 7 Bay gguy rogon ni nge urngin e girdi’ rog nu Israel me nang fithingag nib thothup, ma dab kug pag fithingag ngu’un dariyfannag. Ma aram e bayi nang e pi nam, ni Gag fare SOMOL, ni gag fare Got nib thothup rok piyu Israel.”

8 I SOMOL ni Th’abi Tolang e ga’ar, “Re rran ni gu be weliy murung’agen e rib mich ni bayi taw ngay. 9 Fapi girdi’ ni yad be par u lan e pi binaw nu Israel e bay ranod ra kunyed e talin e cham ni kann’ag ni nge mang l’ud rorad. Bay u ra urfiyed yung i shield, gat’ing, gan e gat’ing, sarey, nge gul, nib gaman e l’ud riy u lan medlip e duw. 10 Dakriy fan ni ngkur kunyed e l’ud u lan e yungi flang fa ku ra th’abed e gek’iy u lan e loway, ni bochan e bay fapi talin e cham ni kann’ag ni yad ra fanay ni l’ud. Bay ra giliw niged e pi’in u ra giliw niged yad.” Fare SOMOL ni Th’abi Tolang e be non.

11 I SOMOL e ga’ar, “Nap’an nra buch urngin e pin’ey, ma bay gu pi’ ngak Gog bang ntagil’ e gum’eyag u Israel, u lan e Loway ko Milekag nib loway ni bay ko ngek ko fare Dead Sea. Gog nge urngin e salthaw rok e bay ni k’eyagrad u rom, ma fare loway e bay un pining fithingan ni ‘Fare Loway Ko Salthaw Rok Gog.’ 12 Ra gamen medlip e pul nra k’eyag piyu Israel gubin fapi ldow mfini be’ech bayay fare but’. 13 Urngin e girdi’ u lan fare binaw ni bayi un ko ayuw ngan k’eyagrad, ma bay ni tay farad ko ren’ey ko rofen ni gu ra gel. I Gag SOMOL ni Th’abi Tolang e kugog e pi thin ney. 14 Tomuren nike m’ay fa medlip i pul, ma bay ni mel’eg boch e pumo’on ni nge milekag u daken fare nam ni ngar pir’eged e tin ke magay e ldow u but’ ngar k’eyaged, ya nge yag ni ngar be’ech niged fare but’. 15 U ranod nga talang nge nga pe’ening ko fare binaw, ma gubin ngiyal’ ni yad be pir’eg yilen e girdi’, ma bay ra ted e pow nga charen ya nge yib e pi’in nma ker e low ko yam’ miyad k’eyag ngalan Fare Loway Ko Salthaw Rok Gog. 16 (Bay bochi binaw nib chugur ni kan tunguy fithingan fare raba’ i salthaw ngay.) Ma aram e fare but’ e bay kun be’echnag bayay.”

17 I SOMOL ni Th’abi Tolang e ga’ar ngog, “Fak e girdi’, mu pining urngin e arche nge gamanman ngarbad u gubin yang ngar longuyed fare maligach ni kug fal’eg rogon ni fan ngorad. Ireram ba madnom nib ga’ u daken fapi burey nu Israel, ni gin bay ra longyed e ufin riy miyad be unum e racha’. 18 Yad e ngar longyed downgin e fapi salthaw miyad unum racha’en e pi tayugang’ nu fayleng, ni pi’in ni ngan li’rad ni bod e saf ni pumo’on nge saf ni kab bitir ara kaming ara garbaw ni pumo’on nib sugsug. 19 Nap’an ni gu ra thang e pogofan rok e pi girdi’ ney ni bod rogon ni ngani maligach ngorad, ma fapi arche’ nge gamanman e ngar longyed urngin e mam nrayag nga yinrad, miyad unum e racha’ nge taw ko ngiyal’ ni kar chinggad ngay. 20 U daken e tebel rog e bay ra languyed urngin e tin nrayag rorad e os nge pi’in yad ma yan u os, nge salthaw nge pi girdi’en e mael. I Gag SOMOL ni Th’abi Tolang e kugog e pi thin ney.”

21 I SOMOL e ga’ar, “Bay gu gagiyegnag fapi nam ngar guyed gil’ilungug mug dag ngorad rogon ni gu ma maruwel nga gelngig nggu rin’ e tin kug duwgiliy nib mat’aw. 22 Piyu Israel e bay ra nanged i yan ngaram ni Gag fare SOMOL ni Got rorad. 23 Ma aram e bayi nang e pi nam ni piyu Israel e ranod ni kalbus nga wuru’ e nam ni bochan e pi denen nra ngongliyed nib togopluw ngog. Gu cheal nggu pi’ keru’ug ngorad mu gu pag e to’ogor rorad ngar gelgad ngorad mi ni thang e pogofan rorad u fithik’ e mael. 24 Gu pi’ ngorad e tin ndabisiy ni nge aw ngorad ni fan ni yad ba ta’ay nge gafarig rorad nib kireb, ma aram mu gu pi’ keru’ug ngorad.”

25 I SOMOL ni Th’abi Tolang e ga’ar, “Machane chiney e bay gu par ni bay e marnguy rog nga daken e pi’in owchen Jakob, ni fapi girdi’ nu Israel, ma bay gu gagiyegnag ngar fla’abgad bayay. Bay gu yororiy fithingag nib thothup. 26 Nap’an ni yad ra par bayay ni dakriy ban’en ni be buch rorad u lan taferad, ma dariy be’ ni ku be togopluw ngorad, ma rayag ni ngar paged talin rogon ni un dariyfan nagrad ni fan e ra pagedgag. 27 Rogon ni nge m’ug ngak e pi nam nib yo’or ni gub thothup, e bay gu fulweg e girdi’ rog rok urngin fapi nam nma par e to’ogor rorad riy. 28 Ma aram e bayi nang e girdi’ rog ni Gag SOMOL ni Got rorad. Yad ra nang e ren’ey ni bochan e gu pi’rad ngar kalbusgad ma chiney e kug kunuyrad kug fulwegrad ngalan e nam rorad, ni dab gu pag bagyad. 29 Bay gu pu’og e kan nthothup rog nga daken e girdi’ nu Israel ma dakriy bingyal’ ni gu ra pi’ keru’ug ngorad. I Gag fare SOMOL ni Th’abi Tolang e kugog e pi thin ney.”