1 Me ngongliy Bezalel fare Kahol ko M’ag ko ren ni acacia, ni aningeg ni ragag nge lal e inch n’umngin, ma rliw’ nge medlip e inch radan, ma rliw’ nge medlip e inch tolngin. 2 Me ing e gol ni go’ gol u langgin ngu ba’ ni wuru’, me liyeg e gol u mirichlen i yan. 3 Me ngongliy aningeg i luwaw nib ga’ ni gol ni fen fare Kahol nge puthuy nga tungun ay u but’, nra barba’ i ay me yin’ reb fare luwaw ngay. 4 Me ngongliy l’agruw ley i mat’ ko ren ni acacia me ing ko gol ni go’ gol, 5 me yin’ fa gal ley i ren u langgin fapi luwaw u barba’ ngu barba’ fare Kahol. 6 Me ngongliy upongen ko gol ni go’ gol, ni aningeg ni ragag nge lal e inch n’umngin ma rliw’ nge medlip e inch radan. 7 Me pirdi’iy e gol nge ngongliy l’agruw i kerubim riy, 8 reb nga daken u baley fare upong ma reb nga baley. I ngongliy e gali n’ey nib peth ko fare upong. 9 Ma fa gali kerubin e yow ba sabal ni yow ba sap nga but’, nib puf porow nike upunguy daken upongen fare kahol.

10 Me ngongliy fare tebel ko ren ni acacia, ni guyey nge nel’ e inch n’umngin, ma ragag nge meruk e inch radan, ma rliw’ nge medlip e inch tolngin. 11 Me ing wuru’ ko gol ni go’ gol, me gad ba thal i gol u mirichlen i yan. 12 Me chamiy mirichlen fare tebel, ni dalip e inch radan me ing e gol nga daken. 13 Me ngongliy ko gol aningeg i luwaw ni fen. Ra reb fapi luwaw me puthuy nga reb i ay fare tebel. 14 Fa pi luwaw ni gil’ e mat’ e tay nib chugur nga mirichlen fare tebel. 15 I ngongliy e mat’ ko ren ni acacia, me ing ko gol. 16 I ngongliy urngin tatalin fare tebel ko gol ni go’ gol: plet riy, kap riy, pi rume’ riy nge yochi dabiy ni fen, ni ngu’un fanay ko wayin ni maligach.

17 Me ngongliy fare tagil’ e magal ko gol ni go’ gol. Me pirdiiy e gol nge ngongliy tagil’ fare magal nge kolngin; me tay e fel’ ya’an riy ni bogi floras ni tin ke puf nge tin ndawori puf nga downgin. 18 Ma nel’ pa’ngin, ra barba’ ma dalip pa’ngin ni bay riy. 19 Ma ra bpa’ fa nel’ i pa’ngin ma bay dalip i floras riy ni fel’ ya’an riy ni bod e floras ko gek’iy ni almond ni tin ke puf nge tin dawor. 20 Ma kolngin fare tagil’ e magal e bay aningeg i floras riy ni bfel’ ya’an ni bod e floras ko almond ni tin ke puf nge tin dawor. 21 Tanggin reb fa dalip i pa’ngin ma bay reb e floras riy ni dawor i puf. 22 Fapi floras ndawori puf nge fa yupa’ i pa’ngin, nge fare tagil’ e magal e ni ngongliy u ta’bang i gol nni pirdi’iy. 23 Me ngongliy medlip i magal ni fen fare tagil’ e magal, nge pi fen e mthang nifiy riy, nge yu raba i plet ni go’o gol. 24 Medlip i ragag nge lal e pawn e gol ni fanay ko fare tagil’ e magal nge gubin ban’en ni tatalin.

25 I ngongliy ba altar ko gik’iy ni acacia ni fen e incense ni ngan urfiy riy. Re altar ney e aningeg raba’ ni ta’reb n’umngin nga radan, ya ragag nge meruk e inch n’umngin ma ragag nge meruk e inch radan, ma guyey nge nel’ e inch tolngin. Ma aningeg i gagey ko aningeg i tabthung riy e ba ta’reb ngay. 26 Me ing daken ko gol, ni aningeg raba’ ni ing, ni fapi gagey riy, me gabdiy bathal i gol u mirichlen nge liyeg. 27 Me ngongliy l’agruw i luwaw nifan ko feak nge puthuy reb nga barba’ nga tan fare thal i gol nib liyeg ma reb nga barba’, ni luwan e mat’ ko fare altar ni ngu’un fek. 28 I ngongliy e m’at riy ko ren ni acacia nge ing e gol u wuru’.

29 Miki ngongliy fare gapgep ni fen e mathiy ni nge tabgul nigey, nge incense ni bfel’ bon, ni yima athkuy ni bod e florida.