1 “Fa’anra iring be’ ba garbaw fa ba saf nge li’ ngem’ ara pi’ nchuway’, ma thangri fulweg labgen nra ta’reb e garbaw ma lal e garbaw, mra ta’reb e saf ma aningeg e saf ni nge tay nga luwan. 2-4 Thangri fulweg labgen e tin ke iring. Ma fa’anra dariy ban’en rok nrayag ni nge tay nga luwan ma ir e yira pi’ nchuway’ nge mang sib nge yan nga luwan e n’en ke iring. Demturug ko mang gamanman e ke iring, ko ba garbaw, dongki, ara ba saf ni fa’an yira pir’eg ni kabfos u fithik’ e tin nib milfan ngak, ma nge fulweg labgen fare gamanman ni l’agruw e nge tay nga luwan.

“Fa’anra ni pir’eg ba mororo’ nike sifthiy e naun nnep’ ke yan nga langgin min li’ nge yim’, ma en ni li’ nge yim’ e de buch e rok ko mthang pogofan nike tay. Machane fa’anra buch ni rran, ma facha’ nike thang e pogofan e bbuch e rok ko mathang pogofan ni tay.

5 “Fa’anra pag be’ e gamanman rok ngar ked e pan u daken bangi flang ara bang i milay’ ni grape, mikyad thum’ nga daken e woldug rok yugu be’ ngar ked wom’ngin, ma thangri sulweg labgen e tin ke kay fare gamanman ko tin th’abi fel’ e grape ni fi’in nge grain.

6 “Fa’anra be mo’oruf be’ u daken e milay’ rok me yan e nifiy u fithik’ e pan nge af ko milay’ rok be’ nge mo’oruf e woldug rok ni grain ni be tugul ara tin kan th’ab kan ulunguy nga but’, ma en ni tababnag fare nifiy e nge fulweg labgen e mogothgoth nike tay fare nifiy.

7 “Fa’anra pining be’ e kefel’ ngay ni nge ayuweg e salpiy ara tin ba tolang puluwon ni fen be’, min iring e pin’ey u naun rok, ma fa’an yira pir’eg e en nike mororo’ ma nge fulweg labgen ni l’agruw yay. 8 Machane fa’anra dan pir’eg e en ni mororo’, ma fa en ni i cha’riy fapi chugum nib tolang puluwon e ngan fek i yan nga tagil’ e meybil, nge micheg u fithingan Got ni gathi ir e ke iring e chugum ni i cha’riy ni fen facha’.

9 “Gubin pa’ e oloboch ni murung’agen e tin nib milfan ngak be’ ndemturug ko garbaw, dongki, saf, fa mad, fa demturug e ren’en ni fen be’ nike yan nga bang, ma fa gali cha’ nra bagyow ma be yog ni ir e fen fa pi chugum, ara fak fapi gamanman e ngan fek row nga tagil’ e meybil. Ma cha’ rorow nra gagyelnag Got nib buch e rok e nge fulweg labgen fa pin’en ngak bagyow ni l’agruw yay.

10 “Fa’anra pi’ be’ ba gamanman rok nib dongki, fa ba garbaw, fa ba saf, fa yigub mit e gamanman ngak yug be’ ni nge ayuweg, me yim’ fare gamanman, fa maad’ad ara yan nga bang, ma fa’anra dariy be’ nra mang mich riy, 11 ma fa cha’ e nge yan nga tagil’ e meybil nge micheg u fithingan Got ndawori iring e gamanman rok fa’anem. Ma fa’anra fare gamanman e dan iring ma cha’ ni fak e nge fel’ u wan’ e tin ke micheg facha’, ma cha’ ni i ayweg fare gamanman e dabi fulweg labgen; 12 machane fa’anra kan iring fare gamanman, ma facha’ ni i ayweg fare gamanman e nge fulweg labgen ngak facha’ ni fak fare gamanman. 13 Ma fare gamanman e fa’anra gamanman ni malbach e ke li’, ma thangri fek facha’ e gin nike magay ko fare gamanman nge mang mich riy nike li’ e gamanman ni malboch; ma dabi fulweg labgen.

14 “Fa’anra ning be’ e gamanman rok be’ nge fek ni kura sulweg, me maad’ad ara yim’ fare gamanman nde moy e en ni fak, ma thangri pi’ puluwon. 15 Fa’anra bay e en fak me buch ban’en rok fare gamanman, ma dabi fulweg labgen. Ma fa’anra ba gamanman ni yibe pi’ puluwon ngi i maruwel me yim’ ara maad’ad, ma puluwon ni kan pi’ ni nge maruwel e aram e ke yan nga labgen fare gamanman.

16 “Fa’anra bannag be’ nib mo’on be’ ni bpin, ni dawri nang e pumo’on ma dawor nnog ni ngar mabgolgow be’, ngar pirew ma thangri pi’ e machaf ni man mabgol me le’engiy. 22:16, 17; Deu 22:28, 29 17 Machane fa’anra siyeg e chitmangin fare pin ni nge le’engiy fak, ma thangri pi’ fare mo’on puluwon fare pin nrogon yalen puluwon e bpin ni dawri nang e pumo’on.

18 “Mu thanged e pogofan rok ere pin ni tamapig. Deu 18:10

19 “Mu thanged e pogofan rok e re mo’on ni kar pirew ba gamanman. Lev 18:23; 20:15, 16; Deu 27:21

20 “Ma en nra pi’ e maligach ngak yugu reb e got ni gathi SOMOL e yira thang e fan rok.

21 “Dab mu gafgow niged ara kireb pa’med nga ba milekag ni be par u fithik’med; ya gimed e ku’um moyed ni gimed bogi milekag u lan fare nam nu Egypt. Exo 23:9; Lev 19:33, 34; Deu 27:19 22 Dab mu gafgow niged e pi’in ke yim’ figirngirad ara bitir ni kanim’ rorad. 23 Ya fa’an gimed ra gafgow nagrad, nri yorgad ngalang ngog ni nggu aywegrad, me Gag SOMOL, e gu ra rung’ag lamrad, 24 ma gu ra damumuw, mug ra li’med u fithik’ e mael. Me par le’engmed ni dakriy figirngirad nge pifakmed ni dakuriy e pi chitamangrad.

25 “Fa’an ga ra pi’ e salpiy ngak reb e girdi’ rog nib gafgow, ma dab mun’ e win rom ngay ni bod be’ ni yima fek e salpiy rok min fulweg ngak nike mun e ris ngay. Lev 25:36, 37; Deu 23:19, 20 26 Fa’an ga ra fek wuru’ e mad rok be’ ni mich riy nra fulweg e salpiy nike fek rom, ma thingar mu fulweg fare mad ngak u m’on ni nge aw e yal’, 27 ya karimus e regi mad nma gulgul ngay. Fa mang e ka bay rok nra mol me gulgul ngay? Nap’an nra yornag e ayuw ngog, ma gu ra motoyil ngak, ya gu ma runguy e girdi’.

28 “Dab mu yabi’iy Got, ma dabmog ni nge buch wa’athan e cha’ nma gagiyeg nagmed. Act 23:5

29 “Mu pi’ed ngog e tin gimed ma ognag ngog nike taw nga nap’an ko grain romed, wayin, nge gapgep ni olive.

“Mu pi’ed ngog e tin ba nganni’ u pifakmed ni pumo’on. 30 Miki gimed pi’ ngog e tin ba pumo’on ma ba nganni’ u pifak e garbaw nge saf romed. Mu paged e bin nganni’ ni pumo’on nge par ko chitiningin ni medlip e rran, ma rofen nra gaman e meruk e rran ngay mi gimed pi’ ngog ni maligach.

31 “Gimed e tirog e girdi’, e thingar dab mu ked ufin ba gamanman nike li’ e gamanman ni malboch; mu pi’ed ko pilis. Lev 17:15