1 Me milekag Paul nga Derbe nge nga Lystra. Ma bay be’ nib mich Jesus u wan’, ni Timothy fithingan nma par u rom; ma ku errogon e chitiningin ni ku ir be’ nib mich Jesus u wan’ ni ku be’ u Israel, machane chitamngin Timothy e be’ u Greece. 2 Ma urngin e walag ni girdi’en Kristus ni yad ma par u lan yu Lystra ngu lan yu Ikonium e ra weliyed murung’agen Timothy ni be’ ni bfel’. 3 Ma ba’adag Paul ni nge fek Timothy nge un ngak, ma aram me maad’adnag. I rin’ ni aram rogon ni bochan e urngin piyu Israel ni yad ma par ko yungi n’em i yan e yad manang ni chitamngin Timothy e be’ u Greece. 4 Ma nap’an nranod u lan fapi binaw miyad weliy ngak e pi’in ke mich Jesus u wun’rad fapi motochiyel nike turguy e pi apostel nge pi’in pi’ilal ko galesiya u Jerusalem, miyad yog ngorad ni ngu’ur folgad ko pi motochiyel nem. 5 Ma aram mi i gel i yan e michan’ rok girdi’en e galesiya ma yad be yo’or i yan ni gubin e rran.

6 Miyad milekag u lan yu Frygia nge yu Galatia; ya de pagrad fare Kan Nthothup ni ngar machibgad u lan e nug nu Asia. 7 Ma fa’anra tawgad ko mathil u Mysia, miyad guy rogon ni ngranod ngalan e nug nu Bithynia, machane de pagrad e Kan Nthothup ni ngranod ngaram. 8 Ma aram miyad yan u rom nga Mysia miyad log u rom nga Troas. 9 Mi ni piliyeg e changar rok Paul e re neap’ i n’em nge guy be’ nib mo’on u Macedonia nib sak’iy ni be wenig ngak Paul ni be ga’ar, “Moy nga Macedonia ngam ayuwegmad!” 10 Nap’an nni piliyeg e changar rok Paul, nge guy e ren’em ma gamad fal’eg rogomad ni nggu warod nga Macedonia, ya ke muturug u wun’mad nike piningmad Got ni nggu machib niged fare Thin Ni Bfel’ ngak e girdi’ ko gin’em.

11 Ma gamad af nga barkow u Troas nggu warod nga Samothrace, me reb e rran riy ma gamad yan nga Neapolis. 12 Ma gamad yan u rom nga Filippi, ni ireram e binaw ni ba ga’ ko gin nsom’on e nug nu Macedonia; ma ku errogon ni ku reb e kolonia rok yu Roma. Ma gamad par u lan e re binaw nem nri in e rran. 13 Me chirofen ni Sabbath ma gamad yan nga wuru’ e re binaw nem nga to’oben e lul’, ko gin ni kug fineyed ni ra moy bang riy nma mu’ulung piyu Israel ngay ngu’ur meybilgad. Ma gamad yan gu pired nga but’ ngu’ug welthingad ngak bogi ppin ni kar mu’ulunggad ngaram. 14 Ma bagayad e pi cha’nem ni i motoyil ko thin ni gamad be yog e Lydia ni yib u Thyatira, nma folchuway’ ko mad nib purple ram’en. I ir be’ ni bpin nma meybil mma liyor ngak Got, me tamilangnag Somol laniyan’ ni nge uthum tel ko n’en ni be weliy Paul. 15 Ma aram min tawfenag e re pin nem nge girdi’ nu tabinaw rok. Me yog ngomad ni nggu warod nga tabinaw rok ni ga’ar, “Ngambad ngam pired u tabinaw rog, ni fa’anra ke muturug u wun’med nike mich u wun’ug Somol.” Me wenig ngomad ni nggu warod.

16 Bay reb e rran ni gamad be yan ko gin ni yima meybil riy, ma gamad mada’nag be’ ni bpin ni ir reb e sib ni keb i ying ba mo’onyan’ ngak nma yog e tin ni bay yib ban’en, ni bo’or e salpiy ni be yagnag ni fan ngak e pi’in nib milfan ngorad, ni bochan e ma yog ko girdi’ e tin ni bay yib ban’en, 17 ni be lek tomuren Paul nge gamad, ni be tolul ni be ga’ar, “Pi cha’ney e tapigpig rok Got Nth’abi Tolang, ni yad be weliy ngomed rogon mi gimed thap ngak Got!” 18 Bo’or e rran ni i yodorom. Ma daki yag ni nge k’adan’ Paul, me cheal nga wuryal me ga’ar ngak fare mo’onyan’ nike ying ngak fare pin, “Gu be non ngom u fithingan Jesus Kristus ni ngam chuw rok e cha’nir!” Ma ka ngiyal’nem me chuw fare mo’onyan’ rok fare pin. 19 Ma nap’an ni nang fa picha’ nib milfan fare pin ngorad ndakuriy e gin ku ra yib e salpiy riy ngorad, miyad kol Paul nge Silas ngar girngiyed yow i yan ngabang ni yima mu’ulung ngay nga p’eowchen e pi’in yad be yog e thin. 20 Miyad fekrow i yib nga p’eowchen boch e tolang nu Roma me lungurad, “Gali cha’ney e l’agruw ni’ u Israel ni yow be k’aring e wagey u lan e binaw rodad. 21 Ma yow be yog boch e yalen nib togopluw ko motochiyel rodad, ma gadad yu Roma e dabiyag ni ngad folgad ko tinem e yalen!” 22 Miki togopluw fapi girdi’ ni yo’or ngorow; me guchthuy fapi tolang e mad u daken Paul nge Silas, ma rogned ni ngan toyrow ko dumow. 23 Ma nap’an nra mu’gad i toyrow nib el merin mi nin’row nga kalbus, minog ngak e en ni pilungen e kalbus ni nge loknag e mab ngorow ni bfel’ rogon. 24 Ma fa’an nog e re bugithin nem ngak, me yin’row ngalan reb e senggil nib kan nga lukngun e kalbus me tay ayrow nga daken ba gek’iy nib dib’ag ni ka ni ker luwan ayiy riy, nge mu’ me tay bang nga daken faginem e gek’iy me loknag.

25 Ma gonap’an e ke lukngun e neap’ mi i meybil Paul nge Silas ma yow be yin’ e tang ni yow be pining e sorok ngak Got, ma be motoyil e pi’in kalbus ngorow. 26 Mi yigi yib ba durru’ nrib gel, nge rurug fare kalbus nge mada’ ko def riy. Ma ka chingiyal’ nem me mab urngin e mab, me mul e chen u downgin urngin e kalbus. 27 Ma nap’an ni od facha’ ni pilungen e kalbus, me guy nike mab urngin e mab ko kalbus, me girengiy e saydon rok nge yan ni nge li’ ir ngay; ya ke finey nike mil urngin fapi kalbus. 28 Machane me tolul Paul ni ga’ar, “Dab mmaad’ad ngom; ya gamad gubin ni ka gamad ba’aray.”

29 Me pong fa en ni pilungen e kalbus ni nga ni fek e nifiy i yan ngak, me yan ngalan e kalbus ni be mil, me yan i pag ir nga but’ u to’oben ay Paul nge Silas ni be da’da’. 30 Me fekrow nga waen me fith ngorow ni ga’ar, “Mang e thingar gu rin’ me yag ni gu thap ngak Got?”

31 Me lungurow ngak, “Nge mich u wun’um Somol Jesus, ma aram e kam thap ngak Got — ni gur nge girdi’ nu tabinaw rom.” 32 Miyow machibnag e thin rok Somol ngak nge ngak gubin e girdi’ ni immoy u lan e naun rok. 33 Ka re ngiyal’nem nneap’ me fekrow fa’anem ni pilungen e kalbus nge luknag e yu yang nike maad’ad u dowrow; nge mu’ min tawfenag ni ka chingiyal’ nem ni ir nge urngin e girdi’ nu tabinaw rok. 34 Me ere fek Paul nge Silas ngalan e naun rok nge pi’ e ggan ngorow. Me ri felfelan’ girdi’en e tabinaw rok nge ir, ni fan e ke mich Got u wun’rad.

35 Me reb e rran riy ni kadbul me pi’ e pi’in nib tolang nu Roma e thin nge yan ngak e pi’in pilungen e polis ni be lungurad, “Mpaged fa gali cha’ ngranow.”

36 Me yog fa en ni pilungen e kalbus fapi thin ngak Paul ni ga’ar, “Ke pi’ fapi tolang e thin ke yib ni ngan pagmew Silas, ere rayag ni ngam marow u fithik’ e gapas.”

37 Me ga’ar Paul ngak fapi pilungen e polis, “Kar toyed gamow u fithik’ e girdi’ ni yo’or, nda ni pufthin nagmow ma gamow girdi’en yu Roma! Ma ka ron’ed gamow nga kalbus. Ere ngar paged gamow e chiney nib mith? Danga’! Pi tolang rok yu Roma e thingar rabad ngaray ngar paged gamow.”

38 Me fulweg fapi pilungen e polis e pi thin ney ngak fapi tolang nu Roma, ma fa’an rrung’aged ni Paul nge Silas e yow girdi’en yu Roma miyad rus. 39 Ma aram marbad ra weniggad ngorow; miyad fekrow nga wuru’ e kalbus miyad wenig ngorow ni ngranow ngar chuwgow u lan e re binaw nem. 40 Me chuw Paul nge Silas u kalbus miyow yan nga tafen Lydia. Miyow mada’nag e pi walag ni girdi’en Kristus u rom, miyow welthin ngorad, ni aram e yow be pi’ e athamgil nga lanin’rad, nge mu’ miyow yan.