1 Pi girdi’ ni ba’aray fithing’rad e bogi prist nge Levite ni ur kalbusgad nra sulod ni karu’ned ngak Zerubbabel nib mo’on ni fak Shealtiel nge Joshua ni ir fare Prist ni Th’abi Ga’: Serayah, Jeremiah, Ezra, 2 Amariah, Malluk, Hattush, 3 Shekaniah, Rehum, Meremoth, 4 Iddo, Ginnethoi, Abijah, 5 Mijamin, Maadiah, Bilgah, 6 Shemayah, Joyarib, Jedayah, 7 Sallu, Amok, Hilkiah, nge Jedayah.

Pi pumo’on ney e tayugang’ ko prist u nap’an Joshua. 8 Ma pi Levite: Jeshua, Binnui, Kadmiel, Sherebiah, Judah, nge Mattaniah, e yad e ba milfan e tang ko ogmagaer ngorad.

9 Ma pi’in ba’aray e yad ma yon’ e fulweg ko fare tang: Bakbukiah, Unno, nge pichongrad ni Levite.

10 I Joshua e chitamngin Joyakim; me Joyakim e chitamngin Eliashib; me Eliashib e chitamngin Joyada; 11 me Joyada e chitamngin Jonathan; me Jonathan e chitamngin Jaddua.

12 Nap’an ni Joyakim e Prist ni Th’abi Ga’ ma tin ba’aray e prist e yad lolgen e yuke girdi’ ko prist: Merayah, Serayah, Hananiah, 13 Jeremiah, Meshullam, Ezra, Jehohanan, Amariah, 14 Jonathan, Malluchi, Josef, Sebaniah, 15 Adna, Harim, Helkai, Merayoth 16 Zekariah, Iddo, Meshullam, Ginnethon, 17 Zikri, Abijah, Miniamin, Piltai, Moadiah, 18 Shammua, Bilgah, Jehonathan, Shemayah, 19 Mattenai, Joiarib, Uzzi Jedaiah, 20 Kallai, Sallai, Eber, Amok, 21 Hashabiah, Hilkiah, Nethanel nge Jedayah.

22 Un tay babyor e pi’in tolang ko pi tabnaw ko Levite nge pi tabnaw ko prist u nap’an ni kabfos e pi Prist ni Th’abi Ga’ ni ba’aray fithingrad: Eliashib, Joyada, Johanan, nge Jaddua. Re babyor ney e nib ni lebuguy ko ngiyal’ ni Darius e pilung nu Persia.

23 Pi lolgen e tabnaw ko Levite e ni yoloy nga babyor e ngiyal’nem nge mada’ nga nap’an Jonathan, ni tutuw rok Eliashib.

24 U tan e gagiyeg rok Hashabiah, Shrebiah, Jeshua, Binnui nge Kadmiel e ni yu ulungnag e pi Levite ni yu l’al’agruw e ulung ni ngu’ur tang niged e sorok ngak Got ma yad be ognag e magaer ngak, ni bod rogon ni tay David ni pilung chiylen ni fare mo’on ni bay Got rok.

25 Tin ba’aray e matnag nu Tempel e ba milfan ngorad i matnagiy e pi senggil ni tafen e cha’ar ni bay u charen e fapi garog ko Tempel: Mattaniah, Bakbukiah, Obadiah, Meshullam, Talmon, nge Akkub.

26 Pi girdi’ ney e urmed u nap’an Joyakim, nib mo’on ni fak Joshua nib mo’on ni fak Jehozadak, nge nap’an ni Nehemiah e governor, nge nap’an Ezra ni fare prist ni ir e ba tamilangan’ ko Motochiyel.

27 Nap’an nni yibley fare yoror ko binaw nu Jerusalem, min fek e pi Levite ko yungi n’en ni urpired riy ngalan fare binaw, ni bochan e nge yag nra uned i madnomnag fare yoror ni yibe yon’ tangin e ogmagaer ma yibe musiknag ko cymbal nge harp. 28 Fapi tabnaw ko Levite nma tang e ra mu’ulungad ni karbad ko yungi n’en ni urpired riy u charen yu Jerusalem nge fa yochi binaw u charen yu Netofah, 29 Bethgilgal, Geba, ngu Azmaveth. 30 Fapi prist nge Levite e ra bengbeng nigedyad ko be’ech, ma ku aram rogon e girdi’, nge fapi garog nge rungrung ko fare binaw.

31 Mug kunuy e pi tayugang’ nu Judah nga p’ebugul fare rungrung mug tarad ni nge milfan ngorad l’agruw i ulung nib ga’ ni ngar liyeged fare binaw ni yad be pining e magaer ngak Got.

Bin m’on e ulung e ranod u ba’ ni mat’aw nga daken fare rungrung ni sor ko Garog ni Dow. 32 I Hoshaiah e lay u tomuren girdi’en e tang, me lek nap’an balay ko pi tayugang’ nu Judah. 33-35 Me lay e prist ni yad be thoy e rappa’, me lay e pi’in ni migid: Azariah, Ezra, Meshullam, Judah, Benjamin, Shemayah, nge Jeremiah. Me migid me yib Zekariah, nib mo’on ni fak Jonathan nib mo’on ni fak Shemayah. (Ni pi ga’ rok e kub mu’un Mattaniah ngay, Mikayah, nge Zaccur ko fare ke girdi rok Asaf.) 36 Me lay boch i chon fare ke girdi’ rok Zekariah — ni aram Shemayah, Azarel, Milalai, Gilalai, Maai, Nethanel, Judah, nge Hanani — ni yad gubin ma yad be fek e pi talin e musik ni fa mitnem ni i chubeg David ni Pilung ni fare mo’on ni ba’ Got rok. Ezra ni fa’en ni rib skul ko motochiyel e gafaliy e re ulungney ko fare thelap ni yibe tay. 37 Nap’an nra tawgad ko fare Garog ni Alublub mar forgad ngalang ko fare tawo’ ni sor ko fare Binaw rok David, mranod ngar paged fare naun rok David ni Pilung ma kar tawgad bayay ko fare yoror ko fare Garog ni Ran u ba’an ngek ko fare binaw.

38 Ma bin kabay e ulung ko fa pi’in ni ur pininged e magaer e ra sorgad ko gilay’ u p’ebugul fare yoror, mug lay nike un ngog gonapan a baley ko girdi’. Magmad ay i salthaw nggu paged fare Wulyang ko fapi Stof nggu warod u rom ko fare Yoror nib Ga’ radan, 39 mag mad yan u rom nggu paged e Garog ni Efraim, nge Garog ni Jeshanah, nge Garog ni Nig, nge Wulyang nu Hananel, nge fare Wulyang ko Raay, min taw ko Garog ni Saf. Mugwan gu taleged e ay i salthaw romad nga charen fare garog ko Tempel. 40 Ma aram me taw fagal ulung i girdi’ ni yad be pining e magaer ngak Got ko gin ni bay fare Tempel riy.

Pi tayugang’ ni ur uned ngog, 41 ko birog e ulung e immoy e pi prist ni ba’aray riy ni ur thoyed e rappa’: Eliakim, Maaseyah, Miniamin, Mikaiah, Elioenai, Zekariah, nge Hananiah; 42 ma be lay i Maaseyah, Shemayah, Eleazar, Uzzi, Jehohanan, Malkijah, Elam, nge Ezer. Pi girdi’en e tang ni i gafaliyrad i Jezrahiah e ur tanggad ni kari musmus ga’ngin i lungurad.

43 Rofen nem e bo’or e maligach nni pi’, ma kesugnag e felfelan’ e girdi’ ni Got e kepi’ ngorad kar felfelan’gad. Me un e pi’in ppin nge bitir ko fare madnom, ma lamrad ni yad gubin e yira rung’ag nga palog.

44 Ngiyal’ nem e nni tay boch e pumo’on ni nge milfan e pi senggil ni tafen e cha’ar ngorad ni aram e gin ni yima cha’riy e pi f’oth nu Tempel riy, nib mu’un e ragag e pasent ni yima pi’ nge tin ni nga’on e grain nge wom’ngin e gek’iy nike lol u reb duw. Pi pumo’on ney e maruwel rorad ni ngar kunuyed ko milay’ i yan nib chugur ko fapi binaw e pi f’oth ni fan ngak e prist nge pi Levite ni bod ni bay ko Motochiyel. Urngin e girdi’ nu Judah mab m’aguwan’rad e maruwel rok e prist nge Levite, 45 ni bochan e yad ma ngongliy e pi madnom ni fan ko machalbog nge ku boch e gaming ni tay Got chiylen. Ma girdi’en e musik nu Tempel nge matnag e ku yad be rin’ e maruwel rorad nrogon ko motochiyel ni ngongliy David ni Pilung nge Solomon nib mo’on ni fak. 46 Ka nap’an i David ni Pilung nge Asaph ni girdi’en e musik kakrom, e i gagiyegnag girdi’en e musik e tang ni yibe pining e sorok nge magaer ngak Got. 47 Nap’an Zerubbabel nga ku nap’an i Nehemiah, e gubin e girdi’ nu Israel nma pi’ e tow’ath ni yu rran ni ayuw ngak girdi’en e musik u Tempel nge pi’in yad ma matnag u Tempel. Girdi’ e ma pi’ e maligach nib tabgul ngak e pi Levite, me mang e pi Levite e pi’ e girok fapi prist e f’oth.