27
Pi motochiyel nib l’ag rogon ko tow’ath ni ngan pi’ ngak SOMOL
1 Me pi’ SOMOL ngak Moses 2 e pi gafan ni ba’aray ni fan ngak e girdi’ nu Israel. Nap’an ni yira pi’ demturug bigimed ngak SOMOL ni bochan ba mow nni micheg, mrayag ni ngam puf riy ni fa’ani yira pi’e salpiy ni ba’aray, 3-7 rogon ni kan duwgiliy:
•Be’ ni pumo’on ni duw rok e rliw’ nge mada’ ko nel’ i ragag: wugem yang e silber
•Be’ ni bpin nike pi’lal: guyey yang e silber
•Be’ ni pagel ni lal e duw rok nge mada’ ko rliw’: rliw’ yang e silber
•Be’ ni bpin ni kab bitir: ragag yang e silber
•Bochi pagel ni dawori gaman lal e duw rok: lal yang e silber
•Bochi bulyel: dalip yang e silber
•Be’ ni pumo’on ni gonap’an nel’ i ragag e duw rok: ragag nge lal yang e silber
•Be’ ni bpin ni gonap’an nel’ i ragag e duw rok: ragag yang e silber
8 Fa’anra mow bigimed ma ba gafgow ni nge pi’ ni bod rogon puluwon ni kan duwgiliy, ma ngan fek facha’ i yan ko prist, ma fare prist e nge duwgiliy reb e puluwon ni sobut’, nrogon nrayag ni pi’ facha’ ni mow.
9 Fa’anra micheg be’ ba gamanman ni bfel’ ni nge mang maligach ngak SOMOL, ma aram e urngin e tow’ath ni kan pi’ ngak SOMOL e ba tabgul, 10 ma facha’ nike micheg fare gamanman e dabi thilyeg nge yon’ reb nga luwan, fa’anra rin’, ma gal gamanman nem e ke mil farow ngak SOMOL. 11 Machane fa’anra fare gamanman e de be’ech ni de fel’ ni ngan pi’ ngak SOMOL, ma aram e nge fek facha’ i yib ngak fare prist. 12 Fare prist e nge turguy puluwon, nib m’ag nga rogon feni fel’ ara feni kireb, ma ireram puluwon ndab kun thilyeg. 13 Fa’anra ba’adag fare mo’on ni nge chuw’iy fare gamanman nge sul ngak, ma thangri pi’ fare puluwon nike turguy e prist miki puthuy rliw’ e pasent ngay.
14 Nap’an nra ognag be’ e nu’an rok ngak SOMOL, ma prist e ra turguy puluwon nib m’ag rogon feni fel’ ara feni kireb, ma ireram puluwon ndab kun thilyeg. 15 Fa’anra ba’adag facha’ nike ognag fare naun ngak SOMOL ni nge chuw’iy ngki sul ngak, ma thangri pi’ puluwon ni bod ni kan turguy me puthuy rliw’ e pasent ngay.
16 Fa’anra ognag be’ nib mo’on bang ko binaw rok ngak SOMOL ma puluwon ni yira turguy e be yan u rogon urngin e awoch nrayag nni yung nga daken fare gi but, ragag e salpiy ni silber ma reb e barril e awochngin e woldug ni barley. 17 Fa’anra pi’ fare gi binaw nga tomuren ni kaf ni thumur fare Duwan e Felfelan, ma aram e ra pi’ puluwon fare gi binaw ndabi mul ban’en riy. 18 Ma fa’anra pag nap’an mfin ni pi’ fagi binaw ngak SOMOL, ma ra sumarnag e prist puluwon ni be yan u rogon e tin kabay e duw nga m’on mfin ni taw ko Duwan e Felfelan’, miyad duwgiliy puluwon nib sobut’. 19 Fa’anra leamnag fare mo’on ni nge chuw’iy e flang rok nge sul ngak, ma thangri pi’ puluwon miki puthuy rliw’ e pasent ngay. 20 Ma fa’anra pi’ fa gi flang nchuway’ ngak yug be’ u m’on ni dawri chuw’iy rok SOMOL, ma aram e dakuriy mat’wun ni ngki chuw’iy nge sul ngak. 21 Ma ra bin migid e Duwan e Felfelan’ ma fare gi flang e bayi par nike fanay SOMOL, ni aram e ke milfan ngak e pi prist.
22 Fa’anra pi’ be’ bangi flang ni chuw’iy ngak SOMOL, 23 ma en nib prist e ra sumarnag puluwon ni be yan u rogon urngin e duw ni kabay mfini taw ko Duwan e Felfelan’, ma fare mo’on e thangri pi’ puluwon ni krofen nem; ma salpiy riy e fen SOMOL. 24 Ma ra taw ko fare Duwan e Felfelan’ ma fare gi flang e ra sul ko en nri tafen fa ngak e pi’in owchen. 25 Urngin puluwon ban’en ma yibe duwgiliy ni bod rogon nike m’ay i turguy.
26 Bin nganni’ i pifak e gamanman e bmilfan ngak SOMOL, are dariy be’ ngki ognag ngak SOMOL ni yug ir e leam rok. Demturug ko ba fak e garbaw, ara ba saf, ara ba fak e kaming mab milfan ngak SOMOL, 27 machane bin nganni’ u fak ba gamanman nib alit e rayag ni ngan chuw’iy ni rogon puluwon ni kan turguy, ma ku yira puthuy rliw’ e pasent ngay. Fa’anra dan chuw’iy nge sul ngak e en ni fak, ma rayag ni ngan pi’ ngak yug be’ nchuway’ ni bod rogon puluwon ni kan duwgiliy.
28 Dariy be’ nra pi’ nchuway’ fa chuw’iy nge sul ngak e n’en ni ir e kemu’ i turguy ni nge pi’ ngak SOMOL, ndemturug ko ba girdi’, fa ba gamanman, fa bang i binaw. Ma ke par ni SOMOL e ke milfan ngak. Num 18:14 29 Mus ngak ba girdi’ ni kan mu’ i ognag ma dab kun chuw’iy ngan sulweg; thingar ni thang e pogofan rok.
30 Ragag e pasent ko urngin e tin lemmun e but’, ni demturug ko grain ara wom’ngin e gek’iy, ma SOMOL e ba milfan ngak. Num 18:21; Deu 14:22–29 31 Fa’anra ba’adag be’ ni ngki chuwiiy boch riy nge sul ngak, ma thangri pi’ puluwon nrogon ni kan mu’ i duwgiliy ma ku ra puthuy rliw’ e pasent ngay. 32 Ta’reb ko yu ragag i gamanman ni fakay e bmilfan ngak SOMOL. Nap’an ni yira the’eg e gamanman, ma gubin e tin nra gaman e ragag ngay e bmilfan ngak SOMOL. 33 En ni fak fapi gamanman e dabi yarmiyrad u but’ ni bochan e nge yag nmel’eg e tin nib kireb, ma ku dabi yin’ reb e gamanman nga luwan reb e gamanman. Fa’anra yin’ luwan reb e gamanman nga reb, ma aram e l’agruw fa gal gamanman nike milfan ngak SOMOL ma dabki chuw’iy ngki sul ngak.
34 Irera’ e tin ni yog SOMOL ngak Moses u daken e Burey ni Sinai ni fan ngak e girdi’ nu Israel.
DRAFT VERSION — Proofreading in progress