1 “Kugog ngomed e re bugithin ney ni bochan e nge dab mu thaygad ko michan’ romed. 2 Bay rogned ndab kum uned ko mu’ulung u tafen e mu’ulung rorad. Ma bayi taw nga ba ngiyal’ ni en nra thang e fan romed e bayi finey nra rin’ ni aram rogon ma aram e be pigpig ngak Got. 3 Bay rrin’ed e pin’ey ngomed ya dawor ra nanged e en ni Chitamangiy ara gag. 4 Machane kugog ngomed e re bugithin ney, ya nge yan i taw nga nap’an ni ngar rin’ed e pin’ey me yib ngan’med ni kugog ngomed.”

“Da ka’a gog e pin’ey ngomed ko som’on, ya gu bay romed. 5 Machane chiney e nggu wan ngak e en nike l’oegeg ku gub; machane dariy bigimed nike fitheg ni ga’ar, U uw e ngam man ngay? 6 Me ere chiney ni kug weliy ngomed e ke taganan’med. 7 Machane nggog e tin riyul’ ngomed: kabfel’ ngomed ni gu ra yan, ya fa’anra dab gu wan, ma en ni nge ayuwegmed e dabi yib ngomed. Ma fa’an gu ra yan ma gu ra pi’ nge yib ngomed. 8 Ma ngiyal’ nra taw riy e ra dag ko girdi’ nu fayleng ni yad be oloboch u murung’agen e denen, ngu murung’agen e tin nib mat’aw, nge rogon nma turguy Got e gechig. 9 Yad be oloboch u murung’agen e denen, ni bochan e dagur mich u wun’rad; 10 ngu murung’agen e tin nib mat’aw, ni bochan e bay gu wan ngak e en ni Chitamangiy ma aram e dab kum guyed gag; 11 nge rogon nma turguy Got e gechig, ya en ni be gagiyegnag e girdi’ u roy u fayleng e ke mu’ Got i duwgiliy e gechig rok.

12 “Ka bo’or ban’en ni nggu weliy ngomed, machane yugu ra yo’or ngomed e chiney. 13 Ngiyal’ nra yib fare Kan Nthothup nma dag e tin riyul’ e bayi pow’iymed ngam nanged urngin e tin riyul’. Gathi tin be leamnag e ra weliy ngomed, ya tin ke rung’ag e ra weliy ngomed, mra weliy ngomed e pin’en ni bay yib. 14 Bayi tayfag, ya bayi fek e tin ni nggog ngomed nge weliy ngomed. 15 Urngin e tin ni bay ko Chitamag e fenag; aram fan ni kugog ni bayi fek fare Kan Nthothup e tin bay gu pi’ ngak nge weliy ngomed.”

16 “Dabki n’uw nap’an ma aram e dab kum guyed gag; ma bayi n’uw nap’an boch mikigimed guyeg.”

17 Me ga’ar boch i gachalpen ngak boch i yad, “Mangfan e re bugithin nem nike yog ngodad ni dabki n’uw nap’an ma dab kuda guyed, ma bayi n’uw nap’an boch makagad guy. Ma mangfan nike ga’ar, ‘Ren’ey e bochan e nggu wan ngak e Chitamag.’ ” 18 Miyad fithrad rorad ni lungurad, “Mangfan e re bugithin nem ndab ki n’uw nap’an? Dad nanged fan e n’en ni be yog!”

19 Me nang Jesus ni yad ba’adag ni ngar fithed, ma aram me ga’ar ngorad, “Ke lungug dabki n’uw nap’an ma dab kum guyed gag, ma aram e bayi n’uw nap’an boch nga tomuren mikigimed guyeg. Ireray e n’en ni gimed be fithmed riy fa? 20 Nggog e tin riyul’ ngomed; bay um yorgad ma gimed be dololoy’, machane girdi’ nu fayleng e bay ra felfelan’gad; ma gimed e bayi kireban’med; machane kireban’ romed e bayi piliyeg ko felfelan’. 21 Ra be n’en ni nge gargelnag be’ ni bpin reb e bitir me yib magaren ngak, ni bochan e re awa ni nge gafgow riy e ke taw, machane nap’an nra gargeleg fare tir me pag talin e gafgow nike tay, ya ke felfelan’ nike gargeleg reb e bitir nga fayleng. 22 Ere ku ireray e n’en ni bay mu rin’ed: chiney e ke kireban’med, machane bay kug guymed bayay, ma bay mfelfelan’gad, ni fa mit nem e felfelan’ ndariy be’ nrayag ni nge fek romed.

23 “Ra taw ko chirofen nem ma dakuriy ban’en ni bay mfithed ngog. Nggog e tin riyul’ ngomed: tin ni gimed ra ning ngak e en ni Chitamangiy u fithingag e ra pi’ ngomed. 24 Ka faram i yib ke mada’ ko chiney ma dawor mu ninged ban’en u fithingag; ere mu ninged me yag ngomed nge yan i aw ngarogon e felfelan’ romed.”

25 “Kugog ngomed e pin’ey u fithik’ e fanathin. Machane bayi taw nga ba ngiyal’ ni gathi bay kug welthin ngomed u fithik’ e fanathin, machane bay gu weliy murung’agen e en ni Chitamangiy ngomed nib tamilang. 26 Ra taw ko chirofen nem ma bay mu ninged e tin ni ngam ninged ngak u fithingag; ma dagur yog ni bay kug wenignag ban’en ngak ni fan ngomed, 27 ya en ni Chitamangiy e gimed ba t’uf rok. Gimed ba t’uf rok ni bochan e gub t’uf romed ma ke mich u wun’med ni gub rok. 28 Ku gub rok e en ni Chitamangiy ngaray nga fayleng; me ere chiney e bay gu chuw u roy u fayleng nggu sul ngak e en ni Chitamangiy.”

29 Ma aram me yog pi gachalpen ngak ni lungurad, “A mu guy, chiney e kam welthin ngomad nrib tamilang, ni gathi ka ga be non u fithik’ e fanathin. 30 Kug nanged e chiney ni urngin ban’en ma ga manang; ndakuriy fan ni nge fith be’ ban’en ngom. Ya ireray e ren’en nike micheg u wun’mad ni mub rok Got.”

31 Me fulweg Jesus ngorad ni ga’ar, “Kug mich u wun’med e chiney? 32 Bay ba ngiyal’ ni bay yib, nike taw e chiney, ni ireram e ngiyal’ ni bay mu wergad, nge bigimed me yan nga tafen, mi gimed pageg nggu par ni go’ gag. Machane gathi go’ gag ni bay gu wan gu par, ya en ni Chitamangiy e bay rog. 33 Kugog e re bugithin ney ngomed ni bochan e nge pagan’med ni fan e kad ta’ab girdi’gad. Bayi gafgow nagmed e fayleng. Machane dab mu rusgad! Ya kug gel ko fayleng!”