1 “Nggog e tin riyul’ ngomed: en ni dabi yan u langan e mab nga fithik’ bran’ i saf, machane me yan nga fithik’rad u yugu bang u daken p’ebugul e yoror e be’ nib moro’ro’ fa be’ nma moro’ro’ u fithik’ e yargel. 2 Ma en nra yan u langan e mab nga fithik’ fare ulung i saf e eram e en ni ir e ma gafaliy fapi saf. 3 En nma matnagiy langan e garog e bing e garog ngak fa’anem, ma fapi saf e rrung’aged laman ni be pining fithingan e saf rok ntata’reb, me fekrad nga wuru’ e yoror. 4 Ma nap’an ni fekrad nga wuru’ e yoror me m’on rorad, mi i lay fapi saf u keru’, ya yad manang laman. 5 Ma dab ra leked yugu be’; ya yad ra mil rok, ya dar nanged laman.”

6 I weliy Jesus e re fanathin ney ngorad, machane dar nanged fan e n’en ni be weliy murung’agen ngorad.

7 Ma aram me ga’ar Jesus bayay, “Nggog e tin riyul’ ngomed: i gag fare mab ni fan ngak e saf. 8 Urngin e pi’in nrabad ni yad mm’on rog e yad e moro’ro’ nma mith, nge pi’in nma moro’ro’ u fithik’ e yargel, machane fapi saf e dar motoyilgad ngorad. 9 I gag e re mab nem. En nra yib ngog nge yan ngalan e yoror e ra thap; bay yib ngalan e yoror me sul nga wuru’, me pir’eg e pan ni nge kay. 10 Ma fare moro’ro’ e be yib ni kemus ni bochan e nge iring e saf, me li’ ngem’ me kirebnag. Me gag e ku gub ni bochan e nge yag e yafos ngorad, ni yafos nike yan i mus ngarogon.

11 “I gag fa’anem ni bfel’ rogon ni gu ma gafaliy e saf. En nma gafaliy e saf ni bfel’ rogon e dabisiyeg ni nge yim’ ni fan ko fapi saf. 12 Re mo’on ni kan pi’ puluwon ni nge maruwel ni gathi ir be’ nma gafaliy e saf ma gathi ir e fak fapi saf e ra guy ba wolf nike yib me pag fapi saf nge mil; me yib e wolf i leag e saf me weregrad. 13 Ma fare mo’on nni pi’ puluwon ni nge maruwel e mil, ya ir e kemus ni be’ nni pi’ puluwon ni nge maruwel ma dariy amthun fapi saf u wan’. 14-15 I gag fa’anem ni bfel’ rogon ni gu ma gafaliy e saf. Rogon ni manangeg e en ni Chitamangiy ma gu manang e en ni Chitamangiy e ku aram rogon ni gu manang e saf rog ma yad manangeg. Ma dab gu siyeg ni nggum’ ni fan ngorad. 16 Bay yugu boch e saf ni saf rog, machane dar moyed u fithik’ e tiney e saf. Ere thingar kug fekrad i yib; ya bay ra matealgad nga lungug, miyad peth ko tiney ngar pired nta’ab ran’ i saf ma ta’abe’ e be gafaliyrad.

17 “En ni Chitamangiy e gub t’uf rok, ni bochan e dab gu siyeg ni nggu pi’ e pogofan rog ni fan e ngku ni pi’ ngog bayay. 18 Dariy be’ nra chuweg e pogofan rog. Ya gu ra pi’ ni gag e lanin’ug. Ya bay mat’wug ni gu ra pi’ e pogofan rog, ma bay mat’wug ni gu ra fulweg ngog. Ireray e n’en nike yog e Chitamag ngog ni nggu rin’.”

19 Ma aram miki ruw raba’ fa pi’in nu Israel bayay, ni bochan e pi thin ney. 20 Ya bo’or i yad e yad be ga’ar, “Bay ba mo’onyan’ nike ying ngak! Ma ke aliliy! Ere mang ni gimed be motoyil ngak?”

21 Ma boch i yad e yad be ga’ar, “Be’ nib mo’on nike yib i ying ba mo’onyan’ ngak e dabiyag ni nge welthin ni aray rogon! Ra di’in me yag rok ba mo’onyan’ ni nge chuweg e malmit rok e girdi’?”

22 Me taw nga nap’an ni ngan madnomnag u Jerusalem e ngiyal’ nni fulweg e altar nu Tempel ngarogon; ma ngiyal’nem e nap’an e garbeb. 23 Nap’an ni be yan Jesus u lan e beranda ko Tempel, nike lunguy e Beranda ku Solomon, 24 me mu’ulung yu Israel ngak ngar cholngobiyed miyad fith ni lungurad, “Uw n’umngin nap’an ni ngam tem ni ga be maruwar u wun’mad? Mog ngomad e tin nib riyul’: i gur fare Messiah fa danga’?”

25 Me fulweg Jesus ni ga’ar, “Ke m’ay i yog rog ngomed, machane der riyul’ u wun’med e thin ni gu be yog. Pi maang’ang ni gu be ngongliy ni Chitamag e pi’ mat’wug ni nggu rin’ e be yogneg; 26 machane dabumed ni nggu mich u wun’med, ya gathi gimed e saf rog. 27 Saf rog e yad ma rung’ag lungug, ma gum nangrad, ma yad ma lekeg. 28 Kug pi’ e yafos ni dariy n’umngin nap’an ngorad ni aram e dab kur m’ad; ma dariy be’ nrayag ni nge lagrad rog. 29 En ni Chitamangiy ni ir e ke pi’rad ngog e dariy be’ ni ba ga’ ngak, ma dariy be’ nrayag ni nge lagrad rok e Chitamag ni ir e be ayuwegrad. 30 Chitamag nge gag e gamow ba ta’reb.”

31 Ma aram miki feng fapi cha’ nu Israel e malang ni ngar paged ngak. 32 Me ga’ar Jesus ngorad, “Bo’or e ngongol ni bfel’ ni kug rin’ u p’eowchemed ni Chitamag e pi’ ngog ni nggu rin’; ere bin ngan u fithik’ e ngam malang niged gag ni bochan?”

33 Me fulweg fa picha’ nu Israel ngak ni lungurad, “Gathi gamad ba’adag ni nggu malang niged gur ni bochan reb fapi ngongol ni bfel’ ni kam rin’, machane bochan rogon ni kam n’ag fan Got! Ya gur e kemus ni gab girdi’, machane ga be guy rogon ni ngam tiyem ni gur Got!”

34 Me fulweg Jesus ni ga’ar, “Bay ni kan yoloy ngalan e Motochiyel romed, ni ga’ar Got, ‘Gimed e pi got.’ 35 Gadad manang ni n’en ni be yog e babyor nib thothup e ba riyul’ ndariy n’umngin nap’an; i pining Got e pi got ngak e pi’in ni pi’ e thin rok ngorad. 36 Mi gag e en ni Chitamangiy e duwgilyeg nge l’oegeg nggub ngaray nga fayleng. Ere ke di’in ma kamogned ni kug n’ag fan Got ni bochan e kugog ni Fak Got gag? 37 Fa’anra dagur rin’ e ngongol rok e Chitamag, me ere dariyfan ni nggu mich u wun’med. 38 Ma fa’anra gu be rin’, ma yugu ra dagur mich u wun’med, ma susun e nge mich u wun’med e ngongol ni gu be rin’, nge yag nri mu nanged ni en ni Chitamangiy e bay u fithik’ag, mi gag e gu bay u fithik’ e en ni Chitamangiy.”

39 Mu ku yad guy rogon bayay ni ngar koled ngar feked, machane me thay u pa’rad.

40 Miki sul Jesus bayay nge yan i th’ab e lul’ ni Jordan nga baraba’ nge yan ko fa gin’en ni i tawfe John riy, me par u rom. 41 Me yib e girdi’ ngak ni pire’. Miyad yog ni lungurad, “I John e da i ngongliy e pi maang’ang, machane urngin e tin ni weliy ni murung’agen e re mo’on ney e yigo’o ba riyul’.” 42 Ma aram e bo’or e girdi’ ko gin’em ni mich Jesus u wun’rad.