1 Irera’ e n’en ni yog SOMOL u murung’agen Ammon: “Bu uw fapi pumo’on nu Israel? Dakriy be’ nra ayweg e nam rorad? Mang ni karpaged e girdi’ nma tay fan Molek kar pired ko fa gin tafen e ganong rok Gad? 2 Machane bayi taw nga bingyal’ ni bay gu gagiyegnag nge rung’ag e girdi’ ko fare binaw ni tochuch u Rabbah lingan e mael, bay ni pag yu Rabbah nike mogoth ni yochi binaw riy e kan urfiy nga but’. Ma aram e yu Israel e bay ra sulwegned taferad u pa’ e pi’in ra feked. 3 Girdi’ nu Heshbon, mu yorgad ngalang! Ai e kan buthug! Pi’in ni ppin nu Rabbah, mu mowawgad! Moned e mad ni tutuw ko mowaw ni ngam ted. Mmilgad i yan nike wagagey lanin’med. Fare got romed i Molek e bay ni fek nib kalbus nga wuru’ e nam, nib chagil e pi prist rok ngak nge fapi pumo’on ni fak e pilung. 4 Gimed e girdi’ ni dam yul’yul’gad mang ni gimed be ufan sorok? Ya gelingmed e dakriy. Mangfan ni gimed be pagan’ nga gelingmed gimed be yog ni dariy be’ nrayag ni cham ngomed? 5 Bay gu kar marus ngomed u gubin yang. Gimed gubin ni bay mmilgad. Ra bigmed ma be milnag e pogofan rok, ni dakriy be’ ni ku ra kunuy e yu ulung i salthaw romed nga ta’bang bayay.

6 “Machane ra bingyal’ ma bay gu gagiyegnag yu Ammon nge fel’ rogon bayay. I Gag SOMOL e kugog e pi thin ney.”

7 Irera’ e n’en ni yog SOMOL ni Gubin ma Rayag Rok u murung’agen yu Edom: “Gur, girdi’ nu Edom e ke man lanin’rad? Gur, dakir yog e pi tafanow rorad e n’en ni ngar rin’ed? Gur, gubin e gonop rorad ma ke chuw? 8 Girdi’ nu Dedan, mu pigichealgad ngam milgad ngam mman mithgad! Arame nggu thang mit e pi’in owchen Esau ni bochan e ke taw nga nap’an rog ni nggu gechig nagrad. 9 Nap’an nra kunuy e girdi’ e grape, miyad pag in u papa’ngin, ma nap’an nra yib e mororo’ nnep’ miyad fek e tin yad ba’adag riy. 10 Ma aram mu gu chuweg e upong u daken e pi’in owchen Esau ni dagpag buchu’uw mug m’ugnag e yungin ni yad ma mith riy, ya ngar pired ni dabkiyag nra mithgad. Gubin e girdi’ nu Edom e kan thang owcharad. Dariy bagyad ni magach. 11 Mu paged e pi aromed ni kanim’ rok rog, bay gu chothowliyrad. Pi aromed nike yim’ figirngin e rayag ni ngar toergad ngog.

12 “Fa’anra mus ngak e pi’in dariy rogon ni ngan gechignag ma dabisiy ni ngar unumed e n’en ni bay ko fare kap ko gechig, ma gimed be leamnag ni gimed ra thay ko gechig? Danga’, thingar mu unumed e n’en ni bay ko fare kap! 13 I gag e kug micheg ni fare binaw nu Bozrah e ra tamdag ya’an me par ni bangi daken e ted; girdi’ e bayi moningnag mu u roged fithingan nike mang ba yaba’. Gubin e yochi binaw u charen e ra mogothgoth ni dabki fel’ bi’id. I Gag SOMOL e kugog e pi thin ney.”

14 Mug ga’ar, “Edom, ke taw e thin rok SOMOL ngog. Ke pi’ e mol’og ni nge yog ko pi nam ni ngar kunuyed e salthaw rorad ngar fal’egned rogorad ni ngar cham gad ngom. 15 Bayi me’waer nagmed SOMOL, ni dakuriy be’ nra tay famed. 16 Yowlop romed e ke ban nagmed. Ma dariy be’ ni be rus ngomed ni bod rogon ni gimed be leamnag. Gimed ma par u pe’bugul e war nib tolang u daken e burey; ma yug aram rogon ni gimed ba tolang ngalang ni bod e manuw, ma SOMOL e bayi piligmed nga but’. I SOMOL e keyog e pi thin ney.”

17 I SOMOL e ke ga’ar, “Riya’ ni nge yib nga daken yu Edom e ba gal e marus riy ni gubin e pi’in yad ra yan u charen e yad ra dada’ ngay miyad rus. 18 N’en ni buch rok yu Sodom ngu Gomorrah e aram rogon nra buch rok yu Edom, ni fa’an gubin e yochi binaw u charrow i yan e un ngorow ko mogothgoth. Dakriy be’ ni ku ra par u rom u Edom bayay. I Gag SOMOL e kugog e pi thin ney. 19 Bod ba layon ni yib u fithik’ e gerger u charen e lul’ ni Jordan ngalang ko gin nib galunglung nma abich e gamanman riy, amrogon ni bay gu tuluf e piyu Edom ngar milgad nib tomgin ngar chuwgad ko nam rorad. Re tolang ni gu ra mel’eg e ra gagiyegnag fare nam. Mini’ e rayag ni nge ta’reb rogon ngog? Mini’ e ra math’ magran rok ni nge togopluw ngog? Mini’ e re tagagiyeg nrayag rok ni nge paluwyeg? 20 Ere mmotoyilgad nga rogon ni kug tanomnag ni nggu togopluw ko girdi’ nu Edom, nge n’en ni ku gu leamnag ni nggu rin’ ko girdi’en fare binaw nu Teman. Mus ngak pifakrad ni bay ni chuwegrad, ma gubin e girdi’ nra rus. 21 Nap’an nra mul yu Edom, ma ra rur e fayleng ni ga’ngin nga lingan, mra taw laman e meyor ko fare Nguy nu Aqaba. 22 To’ogor e ra cham nga Bozrah ni bod ba manuw ni ngalol nga but’ nike pithig pon. Rofen nem e pi salthaw nu Edom e ra dugowgad ni bod be’ ni bpin nike k’ad amithun e gargel.”

23 Irera’ e n’en ni yog SOMOL u murung’agen yu Damascus: “Girdi’ u lan e pi binaw nu Hamath ngu Arpad e kar rus gad ma ke wagagay lanin’rad ko tin kar rung’aged. Gafgowan’ e be lobeb u dakanrad ni bod e n’ew, ni dakir paslag lanin’rad. 24 Girdi’ nu Damascus e ke aw parowrad ma kar milgad u fithik’ e marus. Kar awgad nga fithik’ e amith nge gafgow ni bod be’ ni bpin ni nge gargel. 25 Fare binaw nib gilbugwan ni i par nib felfelan’ e kan’ag. 26 Rofen nem e yira thang owchen e pi’in kab pagel u daken e yupa’ i kanawo’ ko fare binaw, ma gubin e salthaw riy ni bay nli’rad. 27 Bay gup e nifiy ko pi yoror nu Damascus mu gu urfiy nga but’ fare tafen e pilung rok Benhadad ni Pilung. I Gag SOMOL ni Gubin ma Rayag Rok e kugog e pi thin ney.”

28 Irera’ e n’en ni yog SOMOL u murung’agen e ganong nu Kedar nge yungi nug u tan pa’ yu Hazor, ni fa’an ni kol Nebukadnezzar ni Pilung nu Babylon: “Ngan cham ko girdi’ nu Kedar min thang owchen e girdi’ ni bay ko ngek! 29 Ngan fek e tent rorad u pa’rad nge yu ran’ i gamanman rorad, nge pi kateng ko tent rorad nge gubin e chugom u lan e tent rorad. Min fek e kamel rorad min ga’ar ko girdi, ‘Marus e keyin’med nga longob!’

30 “Gimed e girdi’ nu Hazor, I Gag SOMOL e gu be yog ngomed ni ngam milgad ngabang nib orel ngam mithgad. Nebukadnezzar ni Pilung u Babylon e ke makath nib togopluw ngomed, ni ba’aray e n’en ni be yog, 31 ‘Mired! Ngad chamgad ngak e girdi’ ni yad be finey nike fel’ rograd ni dakriy ban’en nra buch rorad! Binaw rorad e dariy e garog riy nge lok ni aram e de muyluy u but’.’

32 “Ngan fek e kamel rorad nge gubin e yu ran’ i gamanman rorad! Bay gu wereg fapi girdi’ ni kar th’abed piyan lolugenrad ke ngoch u gubin yang, ma bay gu fek e riya’ nga dakenrad u gubin yang. 33 Yu Hazor bayi par nike daken e ted ni dariy n’umngin nap’an, ni go’ jackal e ri i par riy. Dakriy be’ ni ku ra par bingyal’ u rom. I Gag SOMOL e kugog e pi thin ney.”

34 De n’uw nap’an nike pilung Zedekiah u Judah, ma SOMOL ni Gubin ma Rayag Rok e yog ngog murung’agen e binaw nu Elam. 35 I ga’ar, “Bay gu thang e pogofan rok urngin e pi’in yad ba cheag ko mun gat’ing ni yad e ur gel naged yu Elam. 36 Bay gu gagiyegnag e nifeng nib gel u gubin yang nge gad nga Elam, ma bay gu wereg e girdi’ riy u gubin yang, nge yan i par ni dakriy reb e nam ni dawri mil e girdi’ riy ngay. 37 Bay gu gagiyegnag e girdi’ nu Elam ngar rus gad ko pi to’ogor rorad, ni pi’in yad ba’adag ni ngar thanged e fan rorad. U fithik’ e damumuw rog nib gel e bay gu thirif e girdi’ nu Elam u but’ mug pi’ e salthaw nge togopluw ngorad nge mada’ ko ngiyal’ ni kug thangrad. 38 Bay gu thang owchen e pi pilung rorad nge pi tayugang’, mu gu sunmiy gil’ilungug u rom. 39 Machane tomuren e bay gu gagiyegnag e girdi’ nu Elam ngki fel’ rograd bayay. I Gag SOMOL e kugog e pi thin ney.”