1 Lan e bin ni medlip e pul ko re duw nem, ma Ishmael nib mo’on ni fak Nethaniah nib mo’on ni fak Elishama, ni be’ ko fare tabinaw nib pilung, ni ir reb fapi tolang ko salthaw rok e pilung e yan nga Mizpah nike un ragag e pumo’on ngak, ni ngranod ra guyed Gedaliah ni governor. Ma nap’an ni ka yad be abich u ta’bang, 2 me girengiy Ishmael nge fa ragag i pumo’on e saydon ngar thanged e pogofan rok Gedaliah. 3 Ku ra thanged e fan rok gubin piyu Israel ni urmed rok Gedaliah u Mizpah nge pi salthaw nu Babylon ni yad bay u rom e ngiyal’nem.

4 Me reb e rran riy u m’on ndawori nang be’ murung’agen Gedaliah ni kan thang e pogofan rok, 5 me taw meruk i ragag e pumo’on nu Shekem, ngu Shiloh, nge yu Samaria. Kar puyed sorbarad ma kar guchthuyed e mad u dakerad ma kar rasayed dowrad. Kar feked e grain nge incense ni ngar pi’ed ni maligach u Tempel. 6 Ma aram me yan Ishmael nga wuru’ yu Mizpah ni be yor nge yan i mada’ nagrad. Nap’an ni taw ngorad me ga’ar, “Wenig ngomed mired ngalan binaw ngam guyed Gedaliah.” 7 Ma yug nap’an nra tawgad ngalan fare binaw, me thang Ishmael nge fapi pumo’on e pogofan rorad nga ron’ed yad ngalan ba luwed.

8 Machane bay ragag e pumo’on ko fare ulung nra ga’argad ngak Ishmael, “Wenig ngom, dab mu thang e pogofan romad! Bay e wheat romad, nge barley, nge gapgap ni olive, nge honey ni kan mithag u daken yung i flang.” Ma aram ma de li’rad. 9 Fare luwed ni yin’ Ishmael e ldow rok fapi pumo’on ngay ni li’rad e rib ga’ ni ker Asa ni Pilung u nap’an ni mael Baasha ni Pilung nu Israel ngak. Ishmael e suguy fare luwed ko fapi ldow. 10 Ma aram me kalbusnag e ppin ni pifak fare pilung nge gubin e tin ni magach e girdi’ u Mizpah, ni pi’in ni tayrad Nebuzaradan ni ir e tolang ko salthaw nga tan pa’ Gedaliah. I fekrad Ishmael ni kalbus ngar sorgad i yan ko gin tafen yu Ammon.

11 I Johanan nge gubin e tolang ko salthaw ni yad bay rok e rrung’aged e re pa’ i oloboch nem nike rin’ Ishmael. 12 Me un e salthaw rorad ngorad ngar lol’ged ngar koled u charen fare lipath nib ga’ u Gibeon. 13 Nap’an ni guy e kalbus rok Ishmael i Johanan nge pi tolang ni yad mu’un ngak, miri felan’rad, 14 miyad mil i yan ngorad. 15 Machane Ishmael nge meruk e salthaw rok e ra thaygad rok Johanan ngar milgad ko binaw nu Ammon.

16 Ma aram e Johanan nge fapi tolang ko salthaw e ra ayweged e pi salthaw, nge ppin, nge bbitir, nge eunuch ni fapi girdi’ ni chuwegrad Ishmael u Mizpah nge fekrad ni kalbus u tomuren nni thang e fan rok Gedaliah. 17-18 Kar tamdag gad ngak piyu Babylon ni bochan Ishmael ni ir e thang e fan rok Gedaliah, ni aram e cha’ ni turguy fare pilung nu Babylon ni nge mang governor ko fare nam. Ma aram miyad sor i yan nga Egypt, ni fan e ngar paloggad rok piyu Babylon. Nap’an ni yad be yan i yan miyad tal u Kimham u charen yu Bethlehem.