1 U lan e bin ragag e pul ko bin mereb e duw nike pilung Zedekiah u Judah, me yib Nebukadnezzar ni Pilung nu Babylon nge ga’ngin fa raba’ i salthaw rok ngar chamgad nga Jerusalem. 2 Bin mereb e rran ko bin aningeg e pul ko re duw ni ragag nge ta’reb nap’an nike pilung Zedekiah, min buthug e yoror ko re binaw nem nga barba’.

( 3 Nap’an nkol yu Jerusalem, ma gubin e tolang ko fare pilung nu Babylon ni mang tagil’rad e bin lukngun e garog, nib mu’un Nergal Sarezer, nge Samgar Nebo, nge Sarsekim, ngay nge ku reb e Nergal Sarezer.)

4 Ma nap’an ni guy pilung Zedekiah nge gubin e salthaw rok e n’en ni yad be rin’, miyad guy rogon ni ngar milgad ngar chuwgad ko fare binaw nnep’. Ranod u kanawo’ ko milay’ rok e pilung ngar thumurgad u langan e fare garog u thilin fagal yoror, ni yad be sor i yan ko loway u Jordan. 5 Machane fa raba’ i salthaw nu Babylon e ra tulfedyad ngar koled Zedekiah u lan e tafel’fel’ nib chugur nga Jeriko. Ma aram miyad yan ngak Nebukadnezzar ni Pilung, u lan fare binaw nu Riblah u daken e but’ nu Hamath, ni aram e gin ni duwgiliy Nebukadnezzar riy e n’en ni ngan rin’ ngak. 6 Mu rom u Riblah u p’eowchen Zedekiah e thang e fan rok pifak Zedekiah ni pumo’on riy, miki thang e fan rok e pi tolang nu Judah. 7 Tomuren e binem me luf lan owchen Zedekiah min m’ag ko chen ni ngan fek nga Babylon. 8 Ngiyal’ i nem, ma ke urfiy piyu Babylon tafen e pilung nge naun ko girdi’ ma kar buthged nga but’ e pi yoror nu Jerusalem. 9 Tomuren, me Nebuzaradan ni ir e ga’ ko salthaw e fek e girdi’ ni magach u lan fare binaw ni kalbus nga Babylon, nib mu’un e girdi’ ngay nra milgad ngak. 10 Kemus ni pi’in th’abi gafgow ni dariy taferad e pagrad u lan e nam nu Judah, me pi’ ngorad yung i milay’ ni grape nge flang.

11 Machane Nebukadnezzar ni Pilung e yog ngak Nebuzaradan, ni fare tolang ko salthaw ni ga’ar, 12 “Man ngam gay Jeremiah ngam ayuweg. Dab mu maad’ad ngak, ma ngam rin’ e tin ni ba’adag.” 13 Ere Nebuzaradan ni ir e ga’ ko salthaw, nge Nebushazban, nge Nergal Sarezer ni yad boch e tolang u tafen e pilung nu Babylon, 14 e ni l’oegrad ngar fekedgag u lan e yoror ko pilung. Ra pi’edgag ngak Gedaliah nib mo’on ni fak Ahikam nib mo’on ni fak Shafan ni nge ayuwegneg, ma nge thapegneg nga tabnaw ni bfel’ rogog. Aram mu gu par u rom u fithik’ e girdi’.

15 Nap’an ni gu ba kalbus u lan e yoror ko pilung, me taw e thin rok SOMOL ngog ni be ga’ar, 16 “Mman ngamog ngak Ebedmelek ni be’ nu Ethiopia ni SOMOL ni Gubin ma Rayag Rok, ni fare Got nu Israel e be ga’ar, “Ri bod rogon ni gog, nggu fek nga daken e re binaw ney e riya’ ma gathi fla’ab, ma nap’an nra buch e ran’ey, ma ga bay u rom ni ngam guy. 17 Machane I Gag SOMOL e bay gu yororiyem, nga dab ni pi’em ngak fapi girdi’ ni gab marus ngorad. 18 Bay gu ayuweg e pogofan rom nge dab ni li’em ngamum’. Bay mu thay ni dab mum’ ni bochan e pagan’ rom ngog. I Gag SOMOL e kugog e pi thin ney.”