1 I SOMOL e dag ngog l’agruw dug e fig ni bay u mit e Tempel. (Ren’ey e tomuren nike fek Nebukadnezzar nu Babylon Jehoyakin ni Pilung nu Judah, ni fak Jehoyakim nga Babylon, ni fek nib kalbus u Jerusalem nga Babylon, nib mu’un e tayugang’ nu Judah ngay, nge pi’in ba salap i thir ya’an ban’en, nge pi’in ba salap ko maruwel.) 2 Bin som’on e dug e bay e fig riy nib fafalel’, ni tin ke lol nsom’on; ma bin kaba’ e dug e tin kireb e fig e bay riy, ni tin nde fel’ ni ngan kay. 3 Ma aram me ga’ar SOMOL ngog, “Jeremiah, mang e kamguy?”

Mug fulweg, “Fig. Ni tin ni bfel’ e rib fel’, ma tin nib kireb e rib kireb, ni dabyag i kay.”

4 Ma aram miki ga’ar SOMOL ngog, 5 “I Gag SOMOL, ni Got rok yu Israel, girdi’ nu Judah ni ka ni fekrad nga Babylon e yad bod fa tinef e fig ni bfel’, ma bay gu aywegrad ni bfel’ rogon. 6 Bay ug guyrad ma bay gu fulwegrad ko re but’ ney. Bay gu ubungirad ngalang ma dab gu buthugrad nga but’; gu ra yungrad ma dab gu pugrad. 7 Bay gu pi’ ngorad ba leam ni ngar chogow niged ni ngar nanged ni gag SOMOL. Ma bay ra manged girdi’eg, ma bay gu mang Got rorad, ni bochan e bay ra sulod ngog u polo’ i gumircha’rad.

8 “Ma Zedekiah ni Pilung nu Judah, nge tayugang’ u to’oben i yan, nge ku tin kabay e girdi’ nu Jerusalem ni yad be par ko re but’ ney ara tin kar chuwgad u roy karanod nga Egypt — I Gag SOMOL, e bay gu kirebnag pa’ag ngorad ni yad bod fatinef e fig ndabi fel’ ni ngan kay. 9 Bay gu girengiy ba riya’ nga dakenrad ni urngin e nam nu fayleng e bay rrusgad ngay. Girdi’ e bay i gosgos ngorad, ma yibe moning nagrad, ma fithinganrad e bayi mang ba yaba’ u gubin yang ni ku gu weregrad riy. 10 Bay gu fek e mael i yib ngorad, uyngol, nge liliy nge taw ngilan’ ndakriy bagyad u daken fare binaw ni gu pi’ ngorad nge pi chitamangirad ni kakrom.”