1 Fa ngiyal’ ni mu’ulung yu Israel nga Mizpah, e ra micheged bbugithin ngak SOMOL: “Dariy bagdad nra pag reb e bpin ni fak nge mabgol ko Benjamin.” 2 Ma aram me yan e girdi’ nu Israel nga Bethel ngranod ra pired nga p’eowchen Got nge blayal’. Miyad yor nib gel ma ba ga’ lamrad me lungrad: 3 “SOMOL ni Got nu Israel, mangfan nike buch e biney? Mangfan ni kari chugur ni nge m’ay fare ganong rok Benjamin u Israel?”

4 Me yan i rran riy nri kakadbul me od e girdi’ ngar toyed ba altar u rom. Miyad pi’ e pi maligach riy nma gapaseg thilin Got nge girdi’ nge boch e maligach ni un urfin ni polo’. 5 Miyad fith ni lungurad, “Gur, kabay reb e ulung u fithik’ gubin e pi ganong nu Israel nde un ko fare mu’ulung ntay nga Mizpah u p’eowchen SOMOL?” (Kar micheged u fithingan Got ni en nde yan nga Mizpah e yira thang e pogofan rok.) 6 Fapi girdi’ nu Israel e gafgow lanin’rad ngak e pi’in walagrad ni piyu Benjamin me lungurad, “Daba’ e kemalog reb e ganong rok yu Israel. 7 Mang e thingar drin’ed ngad pi’ed pi le’engin e pumo’on nu Benjamin ni ka ra mageygad? Ka da micheged ngak SOMOL ndab da pi’ed pifakdad ni ppin ngorad.

8 Nap’an nra fithed ko bay reb e ulung ko fapi ganong nu Israel nde un ko fare mu’ulung u Mizpah, miyad pir’eg ndariy ta’be’ u Jabesh u lan yu Gilead ni un ngaram; 9 nap’an nni pining fithingan e salthaw ma dariy be’ nu Jabesh ni non. 10 Ma aram me l’oeg fare ulung 12,000 e pumo’on nth’abi m’uthan’rad ni ba’aray e n’en ni kanog ngorad, “Mmarod ngam thanged e pogofan rok gubin e girdi’ nu Jabesh, nib mu’un e ppin nge bitir ngay. 11 Mu thanged e pogofan rok urngin e pumo’on, nge urngin e ppin ni karnanged e pumo’on.” 12 Miyad pir’eg aningeg mir’ay e ppin ni kab rugod ni dawor nnanged e pumo’on u fithik’ fapi girdi’ nu Jabesh, ma aram miyad fekrad i yib ko fa gin yad be par riy u Shiloh, ni bay u lan e nam nu Kanaan.

13 Ma aram me pi’ fare ulung ni ga’ngin e thin nge yan ngak e Benjamin ni yad bay ko war u Rimmon ni ngan taleg e mael. 14 Me sul piyu Benjamin, me pi’ fa tinef e girdi’ nu Israel e ppin nu Jabesh ngorad ni dar thanged e pogofan rorad. Machane yad ba yo’or ko fapi ppin.

15 Me kireban’ fapi girdi’ ngak piyu Benjamin ni bochan e ke thab’ SOMOL e tha’ ko pi ganong nu Israel. 16 Ma aram me ga’ar e pi tayugang’ ko fare mu’ulung, “Dakriy e ppin u lan fare ganong rok Benjamin. Mang e thingar drin’ed me yag e ppin ni nge le’engiy e tin kabay e pumo’on? 17 Thangri dabi math mit reb fa ragag nge l’agruw i ganong nu Israel. Thingar dagayed rogon e n’en nra rin’ mdabi math mit fare ganong rok Benjamin, 18 machane dabiyag ni ngad pagedyad ngar le’engiyed e ppin ni pifakdad, ni bochan e kad bucheged wa’athan e en nra pag reb e Benjamin nge le’engiy reb i pifak ni bpin.”

19 Ma aram miyad ga’ar, “Fare madnom rok SOMOL u Shiloh e ke chugur.” (Yu Shiloh e bay ko lel’och u Bethel, ma bay nga yimuch u Lebonah, ma bay ko ngek ko fare kanawo’ u thilin yu Bethel ngu Shekem.) 20 Miyad ga’ar ngak e Benjamin, “Mmarod mmithgad ngalan e milay’ ko woldug ni grape 21 ngu’um damitgad. Ma nap’an ni bay yib e ppin nu Shiloh ni ngar churu’gad u nap’an fare madnom, mi gimed yib nga wuru’ fa yung i milay’. Mra bigimed me melle’ nga reb e bpin u fithik’ fapi ppin ni nge le’engiy me fek ngar sulow ko fa gin tafen e Benjamin. 22 Fa’anra yib e pi chitamangirad fa pumo’on ni walagrad ngomed mrayag ni ngmogned ngorad ni nge lungmed, ‘Wenig ngomed mpaged gamad nggu feked e pi cha’ney, ya gathi gu feked yad romed u fithik’ e mael ni nggu le’engyed yad, are debuch e romed ya dawor mu th’abed e n’en mu og niged ngak SOMOL.’

23 Me rin’ e Benjamin ni aram rogon; ra bagyad me mel’eg reb e bpin u fithik’ fapi rugod ni ur churu’gad u Shiloh ni nge le’engiy me fek nge un ngak. Miyad sul ko gin taferad, ra ngongliyed bayay fa yochi binaw rorad, miyad par u rom. 24 Ku aram e ngiyal’ ni chuw e girdi’ nu Israel u rom, ra reb e pumo’on me sul ko ganong rok nge tabnaw rok nge gin tafen.

25 Ngiyal’nem e dariy e pilung u lan yu Israel. Yug ra be’ ma be rin’ e tin ba’adag.