1 Kakrom e ra non fare ganong rok Efraim me rus urngin e ganong nu Israel, ya yad ma tayfan fare ganong rok Efraim. Machane miyad denen ni bochan e ur tedfan Baal, ma aram fan ni bay ram’ad. 2 Dartalgad ko denen ra ngongliyed ya’an boch e ban’en ko wasay ngu’ur tedfan — bogi liyos ko silber, ni girdi’ e leamnag rogon, ni pa’ e girdi’ e ni ngongliy ngay. Ma aram miyad ga’ar, “Ngan pi’ e maligach ngorad!” Mi i yan e girdi’ ngi i faray fapi liyos — ni bogi liyos ni bod ya’an e garbaw! 3 Ere pi girdi’ ney e bay ra m’aygad ngabang ni bod e garbeb ni kadbul, ma bod e wa’angchol nma m’ay ngabang nri kakadbul u reb e rran. Bay ra boded keru’ e grain nike fek e nifeng ke chuw ko gin yima chuweg keru’ e grain riy, ku bod e ath ni be chuw u tafen e ath.

4 Be ga’ar SOMOL, “I Gag SOMOL ni Got romed, ni gag e gu pow’iymed nga wuru’ yu Egypt. Re ngiyal’ i nem e dariy reb e Got romed kemus ni Gag. Yi go’ gag e ta’ayuw romed. 5 Ug ayuwegmed u bangi ted ni desert. 6 Machane fa’an mmarod ngalan fare nam ni bfel’, mi gimed abich ngam fosgad, mi gimed ufanthin ngam paged talig. 7 Ere bay gu cham ngomed ni bod ba layon. Bay gu pach nggu son nagmed ni bod rogon ba gamanman ni leopard. 8 Bay gu cham ngomed ni bod ba gamanman ni bear ni kan leag pifak rok, ma bay gu popofmed. Bay gu languymed u luwmed ni bod rogon ba layon, mu gu popofmed ngam pired ni nochyang, ni bod rogon nma rin’ ba gamanman ni malboch.

9 “Gimed e girdi’ nu Israel, bay gu thirifmed u but’! Ma aram e mini’ e rayag rok ni nge ayuwegmed? 10 Kam wenig niged ngog ni nggu pi’ ba pilung ngomed nge girdi’ ni ngi i yog e thin romed. Machane ra di’in me yag rorad ni ngar chuweged e nam romed ko riya’? 11 Kug pi’ e pi pilung ngomed u fithik’ e damumuw rog, ma kug chuwegrad u fithik’ e damumuw nib gel.

12 “Denen nike ngongliy piyu Israel nge tin kar bucheged e bay u babyor, ma pi babyor nem e ka ni cha’riy ndabi kireb. 13 Israel e bay kanawo’en ni nge fos, machane rib gel feni balyang ni gathi ra yan ko re wo’nem, ni bod bbitir nike taw nga nap’an ni nga ni gargeleg, ma be siyeg ni nge yib nga wean! 14 Dab gu ayuweg e pi girdi’ ney u pa’ e fayleng ko yam’ ara gu lagrad u gelngin e yam’. Gur fayleng ko yam’ mfek e riya’ rom i yib! Dabki kireban’ug ko pi girdi’ ney. 1 Kor 15:55 15 Yugu aram rogon ni be fel’ rogon yu Israel i yan ni bod rogon e pan ni be tugul i yan nib machreg, ma bay gu pi’ e nifeng nib gowel u ngek nge yib u daken e ted ni desert, ma bayi mlik’nag e pi alublub nge pi luwed rorad. Bayi fek urngin ban’en nib t’uf ma ba tolang puluwon. 16 Samaria e thingar ni gechignag ni be togopluw ngog. Girdi’ rok e bay yim’ u fithik’ e mael; pi bitir ni kab ran e bay ni garpay nga but’, ma ppin nib diyen e bay ni guchthuy yinrad.”