1 Machane depag Got tilin Noah nge urngin e gamanman ni malboch nge gamanman nib mongmor ni bay rok Noah u lan fare barkow; ma aram me pi’ e nifeng nge thow u daken e fayleng, me sul fare ran i yan nga but’. 2 Me man fapi alublub ni yib ko ran nu tane but’ nge pi mban e ran u lanelang. Me tal e n’uw, 3 ma aram mi i mam’ fare ran i yan nga but’ u lan 150 e rran, 4 me chirofen ni ragag nge medlip fen e pul ko bin medlip e pul, me gif fare barkow nga daken e burey nu Ararat. 5 Ma aram e ka be mam’ fare ran i yan nga but’, me chirofen ni bin som’on e rran ko bin ragag e pul, me m’ug p’ebugul e pi burey.

6 Tomuren aningeg e ragag e rran me bing Noah fare winda 7 me pag ba arche’ ni raven nge yan. Me chachangeg nge yan i mada’ ko ngiyal’ nike chuw e ran u daken e but’. 8 Me pag Noah ba arche’ ni dove nge changeg nge yan ni fan e nge nang Noah ko ke chuw e ran fa dawor, 9 machane bochan e kabay e ran nike tharey e binaw, ma de pir’eg fare dove bang ni nge toffan riy. Ma aram me sul me fek Noah nge fulweg ngalan fare barkow. 10 Me son Noah ni medlip e rran me ki pag fare dove nge yan. 11 Me gonowrug me sul ngak Noah, ni bay ba gaf i yuwan e olive u l’ugun ni kab mirerey. Ma aram me nang Noah nike yan e ran nga but’. 12 Miki son Noah ni medlip e rran me pag fare dove nge changeg nge yan bayay; me yan ma daki sul.

13 Nap’an ni gaman e 601 e duw yangren Noah, ko bin m’on e rran ko bin som’on e pul, ma aram e kari chuw e ran u daken e but’. Ma nap’an ni chuweg Noah e chigiy u daken fare barkow nge changar nga wean me guy nike mlik’ daken e but’. 14 Me chirofen ni rliw’ nge medlip fen e pul ko bin l’agruw e pul, ma kari mlik’ e but’.

15 Me ga’ar Got ngak Noah, 16 “Mmarod le’engim, nge pifakam ni pumo’on, nge pi le’engirad nga wuru’ e barkow. 17 Ma ga fek urngin fapi gamanman ngar uned ngom nga wuru’ e barkow, ya ngar diyen gad ngar weargad nga gubin yang u daken e fayleng.” 18 Me yan Noah nge le’engin, nge pifakrow ni pumo’on, nge pi le’engirad nga wuru’ fare barkow. 19 Ma urngin e gamanman nge arche’, nranod nga wuru’ e barkow ni yad yu ulung ni bmit ngabang ma bmit ngabang.

20 Me ubung Noah ba altar ni fan ngak SOMOL; mra bmit fapi gamanman nge arche’ nike duwgiliy Got ni ngu’un pi’ ni maligach, me fek reb u fithik’ nge li’ nge urfiy ni polo’ u daken fare altar, ni aram e ke pi’ ni maligach ngak Got. 21 Ma fa’ani faray SOMOL bon fare maligach nrib fel’, me ga’ar u wan’, “Dab kug kirebnag wa’athan e but’ bayay ni bochan e ngongol rok e girdi’; gu manang ni ka nap’an ni kabran e girdi’, ma ba kireb e leam rok. Dab kug thang owchen urngin ban’en nib fos bayay, ni bod ni kug rin’ e yaney. 22 N’umngin nap’an ni kabay e re fayleng ney, e bayi par ni ba’ e ngiyal’ ni ngan yung ban’en riy ma bay e ngiyal’ ni ngan kunuy wom’ngin e tin kan yung. Ma bayi par ni bay nap’an nib garbeb ma bay nap’an me gowel, ma bay nap’an me mat e yal’ ma bay nap’an me aw e n’uw, ma bay nap’an me rran ma bay nap’an me nep’.”