1 Kemus ni pi’in nib gonop e manang e tin riyul’ i fan ban’en. Gonop e ir e ma siminminnag be’ me chuweg e taganan’ u owchen.

2 Mu rin’ e tin be yog e pilung, ma dab mu gur ngam micheg ban’en ngak Got. 3 Pilung e rayag ni rin’ demturug ban’en ni ba’adag, ere muchuw u p’eowchen; dab mu par ko gin ni bay e wogwog riy. 4 Mithmith ko pilung e bay gelngin, ma dariy be’ nrayag ni nge togopluw ko n’en ni be rin’. 5 N’umngin nap’an ni ga be tay e thin rok u gil’, e dariy ban’en nra buch rom, ma be’ nib gonop e manang rogon nge ngiyal’ ni nge rin’ ban’en. 6 Bay e ngiyal’ ni bfel’ nge kanowo’en gubin ban’en ni ngan rin’, machane gadad e ri buchu’uw riy e gadad manang! 7 Dariy bagdad ni manang ko mang e bayi buch, ma dariy be’ nra yog ngodad. 8 Dariy be’ nrayag ni nge siyeg e yam’ u puluwon ara yin’ yaran e rofen ni nge yim’. Ireram ba mael ndabyag ni ngad thaygad riy; dariy liben magad liyeg riy.

9 Gguy urngin e pin’ey u nap’an ni gu be leamnag rogon e pin’en ni kan ngongliy u lan e re fayleng ney, nib fayleng ni bay boch e girdi’ riy nib gel gelingrad ma boch e be gafgow u tan pa’rad. 10 Errogon, gguy e pi’in kireb ni ka ni k’ayagrad ngalan e low, ma nap’an ni gu be sul u taliw i yib ma be yog e girdi’ e sorok ngorad u lan e fare binaw ni ur ngongliyed e kireb riy. Rib m’ayfan.

11 Mangfan ni girdi’ e kaygi par ni be ngongliy e kireb? Bochan e kireb e danir gechignag ni aram feni papay. 12 Be’ nib kireb e rayag ni nge rin’ e oloboch ni ra’ay yay ma ku be par nib fos. Ahh rriyul, gu manang ko mang e yad be yog: “Fa’anra um fol rok Got, ma urngin ban’en mra par ni bfel’ rogon, 13 machane pi’in kireb e dariy ban’en nra fel’ u puluwrad. Yafos rorad e bod fon ban’en ma yad ra yim’ ni kayad ba pagel, ni bochan e darir folgad rok Got.” 14 Machane go’ dariyfan e tiney. Mu changar ko tin e yi be rin’ u fayleng: Yungiyal’ ma pi’in nib mat’aw e be aw e gechig rok e pi’in kireb ngorad, ma pi’in kireb e yad ma fek e tow’ath rok e pi’in nib mat’aw. Gu be ga’ar ba m’ayfan.

15 Ere ku gu t’ar u wun’ug nra be’ ma ngi i rin’ e tin ba’adag’, ya kemus ni felfelan’ rok be’ u lan e yafos rok, e abich nge garbad nge lanyan’ ni ngi i par ni bfel’. Rayag ni ngad rin’ed e pin’ey u fithik’ e maruwel ni gadad be rin’ nike pi’ Got ngodad u roy u fayleng.

16 Ngiyal’ ni gu ma guy rogon ni nge man’og e gonop rog ya nggu fil nggu nang e n’en ni yibe rin’ u fayleng, mu gu wan gu nang ni ga ra od nnep’ nge rran 17 ma ku dabi chigur ni ngam nangfan ko mang e be rin’ Got. Demturug feni almarin ni ga ra guy rogon ni ngam nang ma ridab mu nang. Pi’in yad ba gonop e bay ra ga’argad a yad manang, machane der nanged.