1 Jehoshafat e fek luwan e chitamngin i Asa nge mang pilung me gelnag ir nge togopluw ngak yu Israel. 2 Me tay e salthaw ngalan fapi binaw nu Judah ni kan yororiy nib gel ni fan ko mael, nge tin kabay e binaw u lan fapi binaw ni kol Asa ko nug nu Efraim. 3  SOMOL e tow’athnag Jehoshafat ni bochan e i falwok rok e chitamngin ni da i tay fan Baal. 4 I pigpig ngak e Got rok e chitamngin, mi i fol ko tin keyog Got, ma ngonglen e de bod ngonglen e pilung nu Israel. 5 I SOMOL e tay Jehoshafat ni ir e nge gagiyegnag fare nam nu Judah, ma gubin e girdi’ mu’ur feked e pi tow’ath i yib ngak, ma aram me par nike fel’ rogon ma yibe tay fan nib gel. 6 Ma rib uf ko pigpig ni i tay ngak SOMOL me gathay gubin fa yungi tagil’ e meybil rok e pi’in ndar nanged Got nge fapi ya’an Asherah nib got ni bpin u lan yu Judah. 7 U lan e re duw ni gaman e dalip ngay ko gagiyeg rok me l’oeg e pi tolang ni ba’aray ni ngar machib niged e motochiyel rok SOMOL u lan e pi binaw nu Judah: Benhail, Obadiah, Zekariah, Nethanel, nge Mikayah. 8 Nike un mereb e pumo’on nu Levi nge l’agruw e prist ngorad. Pi Levite nra uned e Shemayah, Nethaniah, Zebadiah, Asahel, Shemiramoth, Jehonathan, Adonijah, Tobijah, nge Tobadonijah; ma fa gali prist e Elishama nge Jehoram. 9 Rabad ra feked fare ke babyoren e motochiyel rok SOMOL mranod u lan e gubin e yochi binaw nu Judah, ngar machib niged ngak e girdi’.

10 Me gagiyegnag SOMOL gubin e pi lung nib liyeg yu Judah ni ngar rusgad ni ngranod ko mael nib togopluw ngak Jehoshafat ni Pilung. 11 Boch piyu Filistia e ra feked i yib ngak Jehoshafat e silber nib yo’or nge ku boch e pi tow’ath, ma boch piyu Arab e ra feked i yib ngak 7,700 e saf nge 7,700 e kaming. 12 Ma aram mi i par Jehoshafat ni be gel gelngin i yan. Me ubung e yoror ni fan ko mael, metoy boche binaw u lan yu Judah, 13 aram e pi binaw ni i cha’riy bokun ban’en ngay.

Mu lan yu Jerusalem e tay ni nge par fapi tolang ko salthaw ni yad ba falu’ riy, 14 nrogon ko yuke girdi’ rorad. Adnah e ir e gireng ko fa yu raba’ i salthaw rok e yuke girdi’ nu Judah, ma 300,000 e salthaw ni urmed u tan pa’. 15 Me Jehohanan e bin l’agruw e liw e bay riy, ni 280,000 e salthaw ni bay u tan pa’, 16 ma bin dalip e liw ngay e Amasiah nib mo’on ni fak Zikri, ni 200,000 e salthaw ni bay u tan pa’. (Amasiah e ir e ke ognag ir ni nge pigpig ngak Somol.) 17 Eliada e ir e gireng ko fa yu raba’ i salthaw ko yuke girdi’ rok Benjamin, ni ir reb e salthaw nrib falu’, nma gafaliy l’agruw mir’ay e bbiyu’ e salthaw ni bay e shield nge gat’ing rorad. 18 Ma en nib migid e liw rok ngak e Jehozabad ni ra’ay nge meruki ragag e bbiyu’ e salthaw ni bay u tan pa’ ni bfel’ rogon talin e cham rorad. 19 Pi salthaw ney e matanag rok e en pilung nu Jerusalem, ki immoy boch e salthaw ni tayrad ngalan yug boch e binaw nu Judah ni ka ni yororiy nib gel ni fan ko mael.