1 Me turguy Solomon ni Pilung u laniyan’ ni nge toy ba tempel ngu’un liyor ngak SOMOL riy, ma ngki toy ba naun ni tafen e pilung nge tafnay. 2 Me tay 70,000 e pumo’on ni ngu’ur gachworiyed talin e maruwel, nge 80,000 e pumo’on ni ngu’ur th’um malanggad. Ma 3,600 e pumo’on ni tayrad ni ngu’ur roged rogon e maruwel ni nge yan.

3 Me pi’ Solomon e thin e yan ngak Hiram ni Pilung nu Tyre ni be ga’ar: “Ngad maruwelgow ni bod ni um maruwelgow e chitamag i David ni Pilung, nnap’an ni um pi’ e ren ni cedar ngak nchuway’ ni fan ko fare naun rok ntafen e pilung. 4 Nggu toy ba tempel ni nggu meybil ngak SOMOL ni Got rog riy. Bayi par ni bangi ban’en nib thothup ni tirog e girdi’ nge gag e bay ug liyorgad ngak riy ngu’ug urfiyed e incense nge spice riy, ma ku ireram e gin bay ug pi’ed e maligach riy ni flowa nib tabgul ngak SOMOL ni gubin ngiyal’, ma ku aram e gin bay ug pi’ed e pi maligach ni mo’oruf riy ni gubin e kadbul nge blayal’, ma ku errogon ko pi Sabbath, nge pi Madnom ko M’ug e Pul, nge ku boch e rran nib thothup ni yima liyor ngak SOMOL ni Got romad riy. Ke ta’chiylen ngak yu Israel ni ngu’ur rin’ed e ren’ey ni dariy n’umngin nap’an. 5 Ku gu tafinaynag ni nggu toy ba tempel nib ga’ ni bochan e Got romad e ba ga’ ngak gubin e pi got. 6 Machane ri dariy be’ nrayag rok ni nge toy ba tempel ni fan ngak Got, ya mus nga ga’ngin lan e tharmiy u lang ma dabi taw ngay. Ere gag mini’ ni nggu toy e tempel rok, gur kemus ni bang i n’en ni ngu’un urfiy e incense riy ngak Got? 7 Ere chiney e ngam pi’ be’ nib mo’on ngog nib salap i ker ya’an ban’en, ma ba salap ko maruwel ko gol, nge silber, nge bronze, nge wasey, ma ba salap i ngongliy e mad ni ra’en mak’ef, nge purple, nge row. Cha’ ney e bay ra maruwelgad e pumo’on nu Judah ngu Jerusalem ni yad ba salap ko maruwel nike mel’egrad David ni chitamag. 8 Gu manang rogon feni rib salap e pi pumo’on ni yad ma th’ab e ren rom, ere mu pi’ e ren ni cedar nge cypres, nge juniper ngog u Lebanon. Kug fal’eg rogog ni nggu l’oeg e pi pumo’on rog u roy ngarbad ra ayuweged e tirom e girdi’ 9 ngar fal’eged rogon e plang nib yo’or, ya re tempel ney ni ku gu leamnag ni ngan toy e ba ga’ ma rib fel’ ya’an. 10 Bay gu pi’ ra’ay e bbiyu’ e barril e wheat, nge 100,000 e barril e barley, nge 110,000 e gallon e wayin, nge ra’ay nge ragag e bbiyu’ e gallon e gapgep ni olive ni fan ngak e pumo’on rom ni girdi’en e dimow ren.”

11 Me pi’ Hiram ni Pilung e babyor ni fulweg ko thin rok Solomon ni be ga’ar, “Ke tem SOMOL ni gur e pilung rok e tirok e girdi’ ni bochan e yad bt’uf rok. 12 Ngu’un pining e sorok ngak SOMOL ni Got rok yu Israel, ni sunmiy e tharmiy nge but’! Ke pi’ be’ nib mo’on nib gonop ni fak David ni Pilung, re mo’on ney e ba tamilangan’ ma ba salap, ma ir e be leamnag e chiney ni nge toy ba tempel ni fan ngak SOMOL nge ba naun ko pilung ni nge tafnay. 13 Nggu pi’ ngom be’ nib gonop ma ba salap ko maruwel ni Huram fithingan. 14 Chitiningin e reb i girdi’en fare ganong rok Dan ma chitamngin e ri be’ nu Tyre. Manang rogon i ngongliy bogi ban’en ko gol, nge silber, nge bronze, nge wasey, nge malang, nge gek’iy. Ma rayag ni maruwel ko mad nib ra’en mak’ef, nge purple, nge row, nge mad nib wech. Ma rayag rok ni nge ker gubin mit e ya’an, ma demturug e re ya’an ni yira yog ngak me ngongliy. Mu tay ngar maruwelgad e pi’in salap rom nge pi’in ni ur maruwelgad rok e chitamam i David ni Pilung. 15 Ere chiney e ngam pi’ fapi wheat, nge barley, nge wayin, nge gapgep ni olive ni kamog ni ga ra pi’. 16 Bay gu th’abed urngin e ren nib t’uf rom u fithik’ e burey nu Lebanon, mu gu m’aged ni bod e fofot ma gamad fek u maday nge mada’ nga Joppa. Mi gimed fek u rom nga Jerusalem.”

17 Me the’eg Solomon ni Pilung e pi girdi’ nu boch e nam ni yad ma par u lan fare nam nu Israel, ba chugur ni nge ta’reb rogon ko fare mathe’eg girdi’ ni tay e chitamngin i David. Pi girdi’ nu boch e nam ni yad be par u Israel e yad 153,600 u gubin. 18 Me tay 70,000 i yad ni girdi’en e gachwor ma 80,000 e girdi’en e th’um malang u daken e pi burey, me turguy 3,600 ni ngu’ur guyed e maruwel nge yan i m’ay ni bfel’ rogon.