1 Nga tomuren e pin’ey ni i ngongliy Hezekiah ni Pilung nrib yul’yul’, me yib Sennakerib ni Pilung nu Assyria i m’ag e mael nga Judah. Me longbiy fapi binaw ni kan yororiy nib gel ni fan ko mael me yog ko fa raba’ i salthaw rok ni ngar buthged e yoror ngranod riy. 2 Ma nap’an ni guy Hezekiah nike yib Sennakerib nike leamnag ni ngki mael nga Jerusalem, 3-4 me ir nge pi tolang ko salthaw rok e ra leam niged ni ngar ninged e lul’ u wuru’ e binaw nge dabkiyag e ran ko pi Assyrian u nap’an ni ngarbad i yib nga Jerusalem. Fapi tolang e ra gafaliyed e girdi’ nib yo’or nga wuru’ fare binaw ngar ninged gubin e alublub, nge par dakir yib e ran riy. 5 Me yin’ fare pilung gelngin e yoror ko fare binaw ni ngongliy e yungin ke kireb ko yoror, me toy boch e wulyang ni tagil’ e damit nga daken, me ubung reb e yoror u wuru’. Miki fal’eg e yungin ke kireb ko pi yoror ko mael ni kan toy nga daken fa gi but’ ni kanin’ u ba’ ni ngek e Jerusalem ni kakrom. Miki yog ni ngan ngongliy e sarey nge shield nib yo’or. 6 I tay gubin e pumo’on u lan fare binaw nga tan pa’ e pi tolang ko fa raba’ i salthaw rok me kunuyrad nga wean nga langan e garog ko fare binaw. Me ga’ar ngorad, 7 “Nge muthan’med me pagan’med, ma dab mu rusgad ngak fare pilung nu Assyria ara fa raba’ i salthaw ni be gafaliy. Ba gel gelngin e ba’ rodad ko ba’ rok. 8 Ir e gelngin e girdi’ gelngin, machane gadad e bay SOMOL ni Got rodad nra aywegdad nge cham ni pa’dad ko mehl.” Pi thin ney ni yog e pilung rorad e pi’ gelngin lanyan’ fapi girdi’.

9 Me yan i bangiyal’ ni kabay Sennakerib nge fa raba’ i salthaw rok u Lakish, me pi’ e re bugithin ni ba’aray nge yib ngak Hezekiah nge girdi’ nu Judah ni yad bay rok u Jerusalem: 10 “I gag Sennakerib ni Pilung nu Assyria e gu be fith ko ba mang e ke pi’ e pagan’ ngomed e pi girdi’ nir niki gimed be par u lan yu Jerusalem ni yug aray rogon ni ku gu cholongobiyed. 11 Be yog Hezekiah ngomed ni bayi ayuwegmed SOMOL ni Got romed u pa’mad, machane be ban nagmed i Hezekiah ma bayi pagmed ngamm’ad ko bilig nge balel. 12 Irera’ e cha’ ni gathay e pi tagil’ e liyor ngak SOMOL nge gubin e pi altar riy me cheal nge yog ko girdi’ nu Judah ngu Jerusalem ni kemus ni ta’reb e altar ni ngu’un liyor ma yibe urfiy e incense riy. 13 Mogned, damnanged e n’en ku gu rin’ed pi chitamngig kakrom ko girdi’ u boch e nam? I yag rok reb fapi got u reb fapi nam ni ayweg e girdi’ riy u pa’ fare pilung nu Assyria? 14 Wi’in e kay gi pi’ reb e got rok reb e pi nam nem e ayuw ngorad u pa’mad? Ere mang e ke yib ngan’med ni ka mu leam niged nra aywegmed e got romed? 15 Ere chiney e dab mu paged Hezekiah nge ban nagmed me fekmed nga wuru’ e wo’ ni errogon. Dabi mich u wan’med e n’en ni be yog! Dariy ba got u ba nam ni ka’a yag rok ni nge ayuweg e girdi’ rok u pa’ ba pilung nu Assyria. Ere rib muduwgil nre got romed ney e ri dabiyag ni nge yuwegmed!”

16 Ku bo’or e thin nib kireb ni yog fapi tolang nu Assyria ni murung’agen SOMOL ni Got nge Hezekiah ni fare tapigpig rok SOMOL. 17 Fare gi babyor ni yoloy fare pilung e be dariyfannag SOMOL ni Got rok yu Israel. Ya be ga’ar, “Pi got rok e pi nam e dawori yag ni ngar ayuweged e girdi’ rorad u pa’ag, ma ku dabiyag rok e got rok Hezekiah ni nge ayuweg e girdi’ rok rog.” 18 I tolulnag e pi tolang nu Assyria e pin’ey ni thin ni Hebrew ni fan e nge k’armarus ko girdi’ nu Jerusalem ni yad bay u p’ebugul fare yoror ko binaw, ya nge mom rogon ni ngan kol fare binaw. 19 Ur weliyed murung’agen fare Got nu Jerusalem nri ta’reb rogon nga rogon ni yad ma weliy murung’agen e pi got rok boch e girdi’ ni bogi liyos ni ya’an boch ban’en nni ngongliy nga pa’ay.

20 Ma aram e Hezekiah ni Pilung nge Isaiah ni profet nib mo’on ni fak Amoz e ra meybilgow ngak Got mar yor nigew e ayuw ngak. 21 Me l’oeg SOMOL ba engel nge thang e fan rok e salthaw nge tolang ko fa raba’ i salthaw nu Assyria. Ma aram me sul fare pilung nga Assyria nike tamra’. Me yan i reb e rran ni bay u lan e tempel ko got rok, me yib boch i pifak ni pumo’on ni bay e saydon rorad ngar li’ed nge yim’.

22 Irera’ rogon ni ayuweg SOMOL i Hezekiah ni Pilung nge girdi’ nu Jerusalem u gelngin Sennakerib ni Pilung nu Assyria, ma ku aram rogon ni ayuwegrad u pa’ boch e pi to’ogor rorad. Me pag fapi girdi’ rok ngar pired nib gapas thilrad gubin e nam nib chugur ngorad. 23 Bo’or e girdi’ nrabad nga Jerusalem ni ka ra feked e maligach ni fan ngak SOMOL nge tow’ath ni fan ngak Hezekiah, rengiyal’ i n’em e gubin e nam ni ur tedfan Hezekiah.

24 Bang ko ngiyal’ney e yib i m’ar Hezekiah ni Pilung nge chugur ni nge yim’. Me meybil, me dag SOMOL ba pow ngak ni ku ra gol bayay. 25 Machane ke uf Hezekiah ma daki pining e magaer ngak SOMOL ko urngin ban’en nike rin’ ni fan ngak, ma aram me yib e gafgow nga Judah ngu Jerusalem. 26 Chane me tomur riy me sobut’nag Hezekiah nge girdi’ nu Jerusalem yad, aram made gechignag SOMOL fapi girdi’ nge taw ko ngiyal’ nike yim’ Hezekiah.

27 Hezekiah ni Pilung e ri fel’ rogon, ma gubin e girdi’ ni ur ted fan. I yog ni ngan toy e senggil ni tafen e cha’ar ko gol, silber, malang nib tolang pulwon, spice, shield, nge pin’en nib tolang pulwon. 28 Miki yog ngan toy boch e naun ni ngi i cha’riy e grain rok riy, nge wayin, nge gapgep ni olive; mu kun toy e naun ko gamanman ni tafen e garbaw rok, nge chumol ni tafen e saf rok. 29 Tin ki peth ko tiney niki pi’ Got ngak, e saf, garbaw nge ku boch ban’en nra fel’ rogon riy aram fan ni sunmiy boch e binaw. 30 Hezekiah ni Pilung e ir e ning fare alublub nu Gihon me ngongliy wol’ fare ran nge yan u tan e but’ i yan ngalan pi yoror u Jerusalem. Gubin ban’en ni ngongliy Hezekiah me yan i aw ni bfel’ rogon, 31 ma ku nap’an ni yib e pi’in owchen yu Babylon nga reb e nam ni yad be fith murung’agen e pin’en nike ngongliy u lan fare nam, me pag Got i Hezekiah nge rin’ e tin ni ba’adag ni fan e be sikengnag ngonglen.

32 Gubin e tin kabay ni i rin’ Hezekiah ni Pilung nge rogon ni pi’ ir ni polo’ ngak SOMOL e bay murung’agen ko babyor ni Pin’en ni pilyeg e changar rok Isaiah ni profet nib mo’on nifak Amoz ngi i guy nge fare babyor ni Chepin e Pilung nu Judah nge Israel. 33 Me yim’ Hezekiah min k’eyag u ba’ ni talang ko fapi low ko yam rok e pilung. Gubin e pi girdi’ nu Judah ngu Jerusalem nrabad ra tedfan ko ngiyal’ nike yim’. Me Manasseh nib mo’on ni fak e yan nga luwan nge mang pilung.