1 Re bugithin ney e ba riyul’, ni fa’anra ba’adag be’ ni ngari mang reb e girdi’ ni ngi i tay murung’agen girdi’en e galesiya ma aram e ke nameg reb e maruwel ni ir e ba th’abi fel’. 2 En ni be tay murung’agen girdi’en e galesiya e thangri yan i aw ni be’ ni bfel’ thin nge pangin; thangri par ni ta’reb e bpin rok,* ta’reb e bpin rok; ara ta’abyay ni ngan mabgol. ma ba gonop, mrayag ni nge t’ar laniyan’, ma bfel’ e ngongol rok; ma thangri m’agan’ ngay ni nge t’ufeg e milekag ni karbad nga tabinaw rok; ma thangri yag rok ni nge machib; 3 me ir be’ nder ma balyang ko rrum ma der ma cham, machane be’ nib munguy ma ba’adag e gapas; ma thangri dabi chogownag e salpiy; 4 ma thangri yag rok ni gagiyegnag girdi’en e tabinaw rok ni bfel’ rogon, me guy rogon e bitir rok ngar folgad rok miyad tayfan. 5 Ya fa’anra de nang be’ rogon ni nge gagiyegnag girdi’en e tabinaw rok, me ere uw rogon me yag ni nge ayuweg e galesiya rok Got? 6 Ma thangri dabi yan i aw ni ir be’ ni kafini pig kemang reb i girdi’en Kristus ndawori n’uw nap’an; ya richey nge uf nge turguy Got e gechig rok ni bod ni rin’ ngak fare mo’onyan’. 7 Ma susun e ir be’ nma tay e girdi’ fan, ni girdi’ ni gathi yad girdi’en e galesiya, ni bochan e nge dabi kireb thin me mul ngalan e wup rok mo’onyan’.

8 Pi’in ni ngu’ur ayuweged e galesiya e ku errogon nthingar ur pired ni bfel’ pangirad ma yad ba yul’yul’ ko maruwel rorad; ma thangri dab ra unumed e wayin ni pire’ ara ur chogow niged e salpiy; 9 ma susun e ngar chichiiyed pa’rad ko thin nib riyul’ ni kar nanged ko mich u wun’uy ngak Got, ma dariy ban’en ni be yog lanin’rad ngorad ni kar rin’ed nib kireb. 10 Susun e som’on e ngan sikeng nagrad, ma fa’anra dar mulgad ko sikeng, ma aram e susun e ngar pigpiggad. 11 Ma ppin rorad† ppin rorad; ara ppin ni yad e tama ayuw. e ku errogon ndabisiy ni bfel’ pangirad, ndab ur uned ko dugdug thin; ma thingar ra pired ni yad ba gonop mrayag ni ngan pagan’uy ngorad u urngin ban’en. 12 Be’ ni ngi i ayuweg e galesiya e thangri par ni ta’reb e bpin rok,‡ thangri par ni ta’reb e bpin rok; ara ta’ab yay ni nge mabgol. ma nge yag ni gagiyegnag e bitir rok nge girdi’en e tabinaw rok ni bfel’ rogon. 13 Ma pi arorad ni bfel’ e maruwel nike rin’ e ra fel’ u wan’ e girdi’ mrayag rorad ni ngar weliyed murung’agen e michan’ rorad ngak Kristus Jesus ndab ra tamdaggad.

14 Chiney ni gu be yoloy e gi babyor ney ni nge yib ngomed, e gu be finey ni nggub gguymed ni kane’. 15 Machane fa’anra gu sowath, ma re gi babyor ney e bay yog ngomed rogon pangidad ni nge par nrogon girdi’en e tabinaw rok Got, ni aram fare galesiya rok fare Got ni be par nib fos, nre galesiya nem e ir e duga’ me ir e be dunubiy fare thin nib riyul’. 16 Rib muduwgil ni yira ngat ko n’en nib riyul’ ni ir e ke michan’dad ngay: