1 A mu guyed ngarogon fadad t’uf rok e en ni Chitamangiy! Rogon ni gadad bt’uf rok e ri ba ga’, ni aram tapgin ma kanog ni gadad pifak Got, ma riyul’ ni gadad pifak. Aram fan ni girdi’ nu fayleng e dar nanged gadad, ya dar nanged Got. 2 Pi tafager rog ni gimed ba t’uf rog, chiney e gadad pifak Got, machane dawori tamilangan’dad u rogodad ni bay darod da pired. Machane ba’aray e tin gadad manang: nap’an nra yib i m’ug Kristus ma gadad ra bod ir, ya bay da guyed ir nrogon. 3 Gubin e girdi’ nike l’agan’rad ngak Kristus ni aray rogon e ra bagayad ma be tay ir nib machalbog, ni bod rogon feni machalbog Kristus.

4 Ya en nra denen e ba kireb e rok nike th’ab e motochiyel rok Got; ya denen e aram e kan th’ab fare motochiyel. 5 Gimed manang ni m’ug Kristus ni bochan e nge fek e denen ko girdi’ nge chuweg, ma ir e dariy e denen rok. 6 Aram fan ni gubin e girdi’ ni be par u fithik’ Kristus e dakurir denengad i yan; machane en nra i denen i yan e ri dawori guy ma dawori nang Kristus.

7 Pifakag, dab mpaged be’ nge ban nagmed! En nra rin’ e tin nib mat’aw e bmat’aw ni bod feni mat’aw Kristus. 8 Ma en nra i denen i yan e ke par nike mil suwon ngak fare mo’onyan’, ya fare mo’onyan’ e ke denen ko tabolngin. Ireray fan ni yib i m’ug Fak Got, ni bochan e nge kirebnag e maruwel rok e re mo’onyan’ nem.

9 En kemang fak Got e dakir denen i yan, ya ke yib rarogon Got ngak; ma bochan i Got e kemang Chitamngin, ma aram fan ndabkiyag ni nge denen i yan. 10 Ba’aray e ren’en nib gagiyel nib thil u thilin e pi’in ni pifak Got nge pi’in ni pifak mo’onyan’: en nde rin’ e tin nib mat’aw ara de t’uf rok e en ni walagen ni girdi’en Kristus e gathi ir be’ ni fak Got.

11 Ya thin rok Got ni kam rung’aged ko tabolngin e ba’aray rogon: thingari bagadad me t’uf rok bagadad. 12 Thingar dab da boded Kain ni i par nib milfan ngak Fa’anem nib Kireb, me li’ walagen ni pumo’on nge yim’. Mangfan ni li’ Kain e cha’nem? Bochan e ngongol ni i ngongliy Kain e ba kireb, ma ngongol ni i ngongliy walagen e bmat’aw.

13 Pi walageg, dab mu gin gad ngay ni fa’anra fanenikaymed e girdi’ nu fayleng. 14 Gadad manang ni kad chuwgad ko yam’ kadbad ko ba’ ni bay e yafos riy; kadnanged ni bochan e ke t’uf rodad pi walagdad ni girdi’en Kristus. En ndariy e t’ufeg rok e kab yam’. 15 En ni be fanenikay walagen ni girdi’en Kristus e be’ nma thang e fan ko girdi’; ma gimed manang ni be’ nib tathang e fan ko girdi’ e dawori yag e yafos ndariy n’umngin nap’an ngak. 16 Ba’aray tapgin ma kadnanged fan e t’ufeg: Kristus e ke pi’ e pogofan rok ni fan ngodad. Ere ku er rogodad nsusun e ngad pi’ed e pogofan rodad ni fan ngak pi walagdad! 17 Fa’anra bo’or ban’en rok be’ ma be guy be’ ni walagen ni girdi’en Kristus nike gafgow nthingari yag ban’en ngak, me fek owchen rok, mra di’in me ga’ar e ba t’uf Got rok? 18 Pifakag! Rogon nib t’uf Got nge girdi’ rodad e dabi par ni kemus ni thin nge welthin; ya thingari yan i aw ni bin riyul’ rogon nib t’uf Got nge girdi’ rodad nma m’ug ko ngongol.

19 Ireray rogon ma gadad nang ni gadad bmu’un ko tin riyul’. Ireray rogon me pagan’dad u p’eowchen Got. 20 Ya fa’anra yog lanin’dad ngodad ni gadad ba kireb, ma kadnanged ni Got e ka ba ga’ nga lanin’dad, ni gubin ban’en ma manang. 21 Pi tafager rog, fa’anra dabi yog lanin’dad ngodad ni gadad ba kireb ma ba pagan’dad u p’eowchen Got. 22 Demturug e n’en ni gadad ra ning ngak mma pi’ ngodad, ni bochan e gadad be fol ko tin keyog ngodad ma gadad be rin’ e tin nib m’agan’ ngay. 23 Ba’aray e tin ni yog ni ngad rin’ed: ni aram e nge pagan’dad nga fithingan Fak ni Jesus Kristus me bagadad me t’uf rok bagadad, ni bod rogon ni yog Kristus ngodad ni ngu’ud rin’ed. 24 En nra fol ko tin keyog Got e be par u fithik’ Got ma be par Got u fithik’ fa’anem. Ireray rogon ma gadad nang ni be par Got u fithik’dad: gadad manang ni bochan fare Kan Nthothup nike pi’ ngodad.