1 Me rung’ag David nike cham e pi Filistine ko fachi binaw nu Keilah ma yad be iring e grain riy ni ka fin nt’ar. 2 Ma aram me fith SOMOL ni ga’ar, “Gu ba’adag ni gu ra yan gu cham ko pi Filistine?”

Me fulweg SOMOL ni ga’ar, “Mman mu cham ngorad ngam ayuweg yu Keilah.”

3 Machane me ga’ar e pi salthaw rok David ngak, “Ke gaman e tin ngad dugowgad ngay u roy u lan yu Judah; ma ku ra gel boch e kireb riy ni fa’an gad ra yan nga Keilah ngad chamgad e pi salthaw nu Filistine!” 4 Ma aram miki fith David laniyan’ SOMOL bayay, me ga’ar SOMOL ngak, “Mman ngam cham nga Keilah, ya bay gu pi’ e pi Filistine nga pa’am.” 5 Aram me yan David nge pi salthaw rok nga Keilah ngar chamgad ko pi Filistine; miyad thang e pogofan rok bo’or i yad miyad fek e gamanman rorad. Ere aram rogon ni ayweg David fachi binaw.

6 Nap’an ni mil Abiathar ni fak Ahimelek nge yan ngak David ngalan yu Keilah, me ke fek fare mad ni efod.

7 Minog ngak Saul nike yan David nga Keilah, me ga’ar, “I Got e ke tay David ngalan pa’ag. Ke thabaynag David ir ko wup nike yan ngalan ba binaw nib yoror ma bay e pi garog riy ni fan ko mael.” 8 Ma aram me pining Saul e pi yu raba’ i salthaw rok ni ngranod ko mael nga Keilah ngar koled David nge pi salthaw rok.

9 Nap’an ni rung’ag David nike t’ar Saul liben ni nge cham ngak, me ga’ar ngak Abiathar ni prist, “Mfek fare efod i yib ngaray.” 10 Ma aram me ga’ar David, “SOMOL, ni Got nu Israel, kug rung’ag nike t’ar Saul liben ni nge yib nga Keilah nge gathay ni bochag, i gag e re tapigpig rom. 11 Ere mog, ra pi’eg e pi girdi’ ney nu Keilah ngalan pa’ Saul? Mog, rriyul’ nra yib Saul, ni bod ni kug rung’ag? SOMOL, ni Got nu Israel, gu be wenig ngom ni ngam fulweg lungug!”

Me fulweg SOMOL ni ga’ar, “Ra yib Saul.”

12 Miki fith David bayay ni ga’ar, “Ma pi girdi’ nu Keilah ney, yad ra pi’eg nge pi salthaw rog ngalan pa’ Saul?”

Me fulweg SOMOL ni ga’ar, “Yad ra rin’.”

13 Ere David nge pi salthaw rok ni gonap’an yad n’el mir’ay u gubin e ra chuwgad u Keilah ni kachingiyal’ nem ni dar talgad u bang. Fa’ani rung’ag Saul nike chuw David u Keilah, me pag e tin ni yog ni ngan rin’.

14 David e par ni be mith u daken e ted ni go’ burey, ko fagi fithik’ e garger u charen yu Zif. Ma gubin ngiyal’ ma be guy Saul rogon ni nge pat ngak, machane Got e de pi’ David ngalan pa’ Saul. 15 Me guy David ni Saul e be gey ni nge thang e fan rok.

Me David e immoy u Horesh, ko fagi fithik’ e garger u charen yu Zif. 16 Me yan Jonathan ngak e ngaram ngi i pi’ e athamgil nga lanyan’ ma be puguran e ayuw rok Got ngak, 17 ni be ga’ar ngak, “Dab mu rus. Chitamag i Saul e dabyag ni nge rin’ ban’en ngom. Ri manang ni gur e cha’ ni bay mmang pilung nu Israel me gag e bay gu par ko re liw nib migid ngom.” 18 Miyow michmich u mit Got ni ngar pirew ni yow fager. Me par David u Horesh, me yan Jonathan nga tafen.

19 Me yan boch e girdi’ u Zif ngak Saul u Gibeah me lungurad, “Be mith David u lan e gin nib milsuwon ngomad u Horesh u daken fare burey ni Hakilah, u lan e gin bay ko yimuch ko ted u Judeah. 20 Pilung, gamad manang feni ri ga ba’adag ni ngam kol David; ere moy ngalan e gin nib milsuwon ngomad, ma bay gguyed rogon nga ri mich ni ngam kol.”

21 Me fulweg Saul ni ga’ar, “Mang e yigi fal’eg SOMOL wa’athmed ni fan e gimed ba gol ngog! 22 Mmarod ngam micheged bayay; migmed pir’eg e rrigin bay riy nge mini’ e guy u rom. Kug rung’ag nrib cheag ko smithmith. 23 Mu gayed ngam pir’eged e yungi n’en nriyul’ ni i mith riy, ma dabisiy ni ngam fulweged e thin riy ngog ni papey. Ma aram e bay gu un ngomed, ma fa’anra kabay ko gi nug nem, ma bay gu tuluf nggu kol, ndemturug rogon machane gu ra gey u lane e re nam nem nu Judah ni ga’ngin.”

24 Ma aram mar chuwgad ngar sulod nga Zif ni yad bm’on rok Saul. Ma David nge pi salthaw rok e yad bay u magarger u Maon, u lan ba loway u bang ko yimuch ko fare gi ted nu Judeah. 25 Me yan Saul nge pi salthaw rok ni ngar changar niged David, machane me rung’ag David ni yad be changarnag me yan nga bochi burey nib m’ak war u lan e ted nu Maon me par u rom. Nap’an ni rung’ag Saul murung’agen, me lek daken David. 26 Me taw Saul nge pi salthaw rok nga barba’ fare burey, me David nge salthaw rok e yad bay u barba’. Miyad be gur ni ngar milgad rok Saul nge salthaw rok, ni arme karbad i yib ngorad nike chuchugur ni ngan kolrad. 27 Kachingiyal’ nem me taw ba tamal’og me ga’ar ngak Saul, “Ngam sul e chiney! Ya fapi Filistine e karbad ni mael ko fare nam!” 28 Ma aram me tal Saul i tuluf David me yan ni nge cham ngak e pi Filistine. Aram fan ni yima yog fithingan e re gin’em ni burey ko puf. 29 Me chuw David nge yan ko fagi nug nu Engedi, ko gin i par riy ni be mith.