1 Dalip e duw ni par e nam nu Israel nge nam nu Syria nike aw e gapas u thilrow, 2 ma fa’ani taw ngalan e bin dalip e duw me yan Jehoshafat ni Pilung nu Judah i guy Ahab ni Pilung nu Israel.

3 Me fith Ahab e pi tolang ni yad bay u tan pa’ ni ga’ar, “Mangfan ndawor da guyed rogon ni ngad fulweged ngodad fare binaw nu Ramoth u lan e nug nu Gilead ni fek e pilung nu Syria u pa’dad? Ya tafedad!” 4 Me ga’ar Ahab ngak Jehoshafat, “Mog, ga ra un ngog ngad m’agew e mael nga Ramoth?”

Me fulweg Jehoshafat ni ga’ar, “Gur e ngam fal’eg rogom ma gadow yan, ya salthaw rog nge salthaw ni yad ma yan u daken e os e kar fal’eged rogorad yad be par. 5 Machane som’on e ngam fith lanyan’ SOMOL.”

6 Me pi’ Ahab e thin nge yan ngak e pi profet ngarbad ni gonap’an yad 400 u gubin, me fith ngorad ni ga’ar, “Nga mogned ngog ko nggu m’ag e mael nga Ramoth fa danga’.”

Me lungurad ngak, “Mm’ag e mael ngay, ya ra gel nigem SOMOL ngorad.”

7 Machane me fith Jehoshafat ni ga’ar, “Mog, dakuriy yugu reb e profet ngabang ni gadow ra fith lanyan’ SOMOL ngak?”

8 Me ga’ar Ahab, “Kabay ta’abe’, ni Mikayah fithingan, ni fak Imlah. Machane kug dabuy daken, ya dariy ban’en ni bfel’ nike yi’iynag ngog; gubin ngiyal’ ni ban’en nib kireb e ma yi’iynag ni nge yib ngog.” Me ga’ar Jehoshafat, “Dabmog e bug nir e thin!”

9 Me pining Ahab reb e tolang nma ayuweg e maruwel ko tabinaw rok me yog ngak ni nge yan i pining Mikayah ni ka chingiyal’nem.

10 Gal pilung nem e ra bagayow ma ke par ko chiya rok ni tagil’ e pilung, ni kar chuwgow nga madan e pilung ko gin ba’aram ni yima gunugunuy wom’ngin e grain riy u wuru’ e garog nu Samaria, ma fapi profet ni yad gubin e yad be yi’iy u p’eowcherow. 11 Ma reb fapi profet, ni aram Zedekiah ni fak Kenaanah e ngongliy e wasey ni bod ya’an e gagey ko gamanman, me ga’ar ngak Ahab, “Ba’aray e n’en nike yog SOMOL: Pin’ey e bayi mang talin e cham rom ngam cham ngak yu Syria nge mada’ ko ngiyal’ ni kam thirifrad u but’.” 12 Ma urngin fapi profet ni ku aram e n’en nrogned ni lungurad, “Mm’ag e mael nga Ramoth, ya ga ra gel. I SOMOL e bayi gagiyeg nigem ngam gel.”

13 Ma fa’anem nike yan ni nge pining Mikayah e ga’ar ngak, “Fapi profet ni urngin e karogned nra gel e en ni pilung ko mael, ere susun e ngkum yi’iynag ni aram rogon.”

14 Me fulweg Mikayah ni ga’ar, “Rogon feni riyul’ ni be par SOMOL nib fos, e rogon nra yog ngog e aram rogon ni nggu weliy.”

15 Ma fa’ani yib nga p’eowchen e en ni pilung, me fith ngak ni ga’ar, “Mikayah, nggu m’agew Jehoshafat ni Pilung e mael nga Ramoth fa danga’?”

Me ga’ar Mikayah, “Mmarow, ya gimew ra gel. I SOMOL e bayi gagiyeg nagmew ngam gelgow.”

16 Me ga’ar Ahab ngak, “Nge uw urngin yay ni nggog ngom ni kemus ni tin riyul’ e ngam weliy ngog u fithingan SOMOL?”

17 Me fulweg Mikayah ni ga’ar, “Kug guy e girdi’ nu Israel ni kar weargad u daken e yungi ted, ni yad bod bogi saf ndariy be’ ni be gafaliyrad. Mi SOMOL e ke ga’ar, ‘Pi girdi’ ney e dariy be’ ni nge yog e thin rorad; ere ngar sulod nga taferad u fithik’ e gapas.’ ” Mat 9:36

18 Me ga’ar Ahab ngak Jehoshafat, “Kugog ngom faram ndariy ban’en ni bfel’ nma yi’iynag ni fan ngog; gubin ngiyal’ ni ban’en nib kireb!”

19 Me ul ul Mikayah ngay nge ga’ar, “Mu telim ko thin keyog SOMOL! Kug guy SOMOL nike par nga tagil’ u tharmiy, ni bay e pi engel rok ni yad ba sak’iy u to’oben. 20 Me fith SOMOL ni ga’ar, ‘I mini’ e nge bannag Ahab nge yan nga Ramoth nge yim’ u rom?’ Me yog boch fapi engel reb e ban’en, me yog bochi yad yugu reb. 21 Ma aram me thay ba kan nga m’on me yib nga p’eowchen SOMOL me ga’ar, ‘Bay gu bannag.’ 22 Me ga’ar SOMOL ngak, ‘Uw rogon ni ngam bannag?’ Me fulweg fare kan ni ga’ar, ‘Bay gu wan gu lifith l’ugunag u l’ugun urngin e pi profet rok Ahab.’ Me ga’ar SOMOL ngak, ‘Mman ngam bannag Ahab, ya rayag rom.’ ”

23 Me ul ul Mikayah ngay nge ga’ar, “Kam guy, i SOMOL e ke pag ba kan nma lifith l’ugun ke yib i lifith l’ugun ngom u l’ugun e pi profet rom ney. Machane ke turguy SOMOL ni riya’ e nge yib ngom.”

24 Me yan Zedekiah ngak Mikayah, me batnag owchen me ga’ar, “Wi’in ney e kechuw e gelngin rok SOMOL rog ke non ngom?”

25 Me ga’ar Mikayah, “Bay mu nang ko ngiyal’ ni bay mman nga reb e senggil u ba’ ni tabugul ko naun ni ngam mith.”

26 Me yog Ahab ni Pilung ngak reb fapi tolang ko salthaw rok ni ga’ar, “Mu kol Mikayah nga ni fek ngak Amon, ni ir e governor ko re binaw nem, nge ngak Joash ni be’ ni fak e pilung. 27 Minog ngorow ni ngan tay nga kalbus, ma kemus ni flowa nge ran e ngu’un pi’ ngak nge yan i mada’ ko ngiyal’ ni kugsul nde buch ban’en rog.”

28 Me ga’ar Mikayah ngak Ahab, “Fa’an ga ra sul nde buch ban’en rom, me ere gathi SOMOL e ke non u l’ugunag!” Me ul ul ngay ni ga’ar, “Gimed gubin ni ngam rung’aged fapi thin ni kugog!”

29 Ahab ni Pilung nu Israel nge Jehoshafat ni Pilung nu Judah e ranow ra m’agew e mael nga Ramoth ni bay u lan e nug nu Gilead. 30 Me ga’ar Ahab ngak Jehoshafat, “Fa’an bay darod ko mael ma bay gu thiliyeg e mad rog nge dab kun poyeg, me gur e ngam man ni ka mon’ madan e pilung.” Me yan fare pilung nu Israel ko mael nike thiliyeg e mad rok ndab kun poy.

31 Ma fare pilung nu Syria e keyog ngak fa guyey nge l’agruw i pilungen e salthaw rok ni yad ma yan u chariot ni kemus ni fare pilung nu Israel e ngar chamgad ngak. 32 Ere fa’anra guyed Jehoshafat ni Pilung ma yad gubin nra leam niged ni ir fare pilung nu Israel, miyad cheal ni ngar chamgad ngak. Ma fa’ani non ni ba ga’ laman, 33 miyad nang ni gathi ir fare pilung nu Israel, ma dakur chamgad ngak. 34 Me pag ba salthaw nu Syria ba gan e gat’ing, ni gathi Ahab e leamnag ni nge aw ngak me aw ko peth ko madan e mael nike yin’ nga daken ni nge ayuweg ko mael. Me non ni ba ga’ laman ngak e en ir e ma yannag e chariot rok ni ga’ar, “Kug maad’ad!” Me ga’ar ngak, “Mu chuwegeg u fithik’ e mael!”

35 Ma nap’an ni kari achngiy fare mael, ma ke par Ahab ni Pilung u chariot rok nib suwon nike gire’ nib changar ko salthaw nu Syria. Mi i lul’ e racha’ ko fa gin ke maad’ad u dow nge sugnag e faraf ko fare chariot, me yan i blayal’ me aw e fan rok. 36 Ma fa’ani gonowrug mi ni wereg e thin rok e salthaw nu Israel ni nge be’ me sul ko girok e nug nge binaw rok.

37 Aram rogon ni yim’ Ahab ni Pilung. Mi ni fek nga Samaria nga ni k’eyag u rom. 38 Ma fare chariot rok e ni maluknag u bangi ran ni bay u Samaria, ni tagil’ e maluk rok e pi’in ppin ni yad ma chuway’ ngorad, me yib e pilis ngu’ur ll’ed e racha’ rok Ahab, ni bod ni fa’ani yog SOMOL.

39 Urngin yugu boch ban’en ni i rin’ Ahab ni Pilung, nge murung’agen fare naun rok nni fanay nguwelen e elefant ngay, nge urngin fapi binaw ni ir e ubung, e ni yoloy ngalan Chepin e Pilung nu Israel. 40 Ma fa’ani yim’ Ahab me yan Ahaziah ni fak nga luwan nge mang pilung.

41 U lan e duw ni aningeg ngay ko gagiyeg rok Ahab ni Pilung nu Israel, me Jehoshafat nib mo’on ni fak Asa e yib i mang pilung nu Judah 42 nike gaman e guyey nge lal e duw rok, mi i par u Jerusalem ngi i yog e thin u rom ni rliw’ nge lal e duw. Chitiningin e Azubah, ni be’ ni bpin ni fak Shilhi. 43 Bod e chitamngin i Asa ni i pilung nib som’on rok, mi i rin’ e tin nib mat’aw u p’eowchen SOMOL; machane fapi yungi tagil’ e meybil rok e pi’in ndar nanged SOMOL e dan ni gathay, miki ul ul’ e girdi’ ngay ngu’ur pi’ed e maligach ma yad be urfiy e incense u rom. 44 Me ngongliy Jehoshafat e gapas u thilrow fare pilung nu Israel.

45 Gubin e tin kabay ni i rin’ Jehoshafat, urngin e pi ngongol ko madangdang rok nge pi mael ni i tay, e kan yoloy ngalan Chepin e Pilung nu Judah. 46 Me chuweg urngin e pumo’on nge ppin ni yad ma pi’rad nchuway’ ni aram e pigpig rorad ko fapi altar rok e pi’in ndar nanged SOMOL ni pi’in nra magaygad nap’an e fapi rran ni i gagiyeg Asa ni chitamngin.

47 Ma fare nam nu Edom e dariy e pilung riy; me duwgiliy fare pilung nu Judah be’ ni ngi i gagiyeg u rom.

48 Me Jehoshafat ni Pilung e toy bogi barkow ni ngi i yan ko fare nam nu Ofir ni fan ko gol; machane pil e pi barkow nem u Eziongeber ni dan taregnag bayay. 49 Ma aram me ognag Ahaziah ni Pilung nu Israel ni nge pag e pi sala rok ngar uned ngak e tirok Jehoshafat e sala ko tareg, machane me siyeg Jehoshafat. 50 Me yim’ Jehoshafat min k’eyag u lan fapi low ko yam’ rok e pilung u lan fare Binaw rok David, me Jehoram nib mo’on ni fak e ir e yan nga luwan nge pilung.

51 U lan e bin ni ragag nge medlip e duw ko gagiyeg rok Jehoshafat ni Pilung nu Judah, me mang Ahaziah nib mo’on ni fak Ahab e pilung nu Israel, mi i yog e thin u Samaria ni l’agruw e duw. 52 Me denen nib togopluw ngak SOMOL, ya i folwok ko kireb ni i rin e chitamngin i Ahab, nge chitiningin i Jezebel, nge Jeroboam ni Pilung, nra pow’iyed yu Israel nga fithik’ e denen. 53 I meybil ma be pigpig ngak Baal, ma ku bod e chitamngin nib m’on rok, miki pug e damumuw rok SOMOL, ni Got nu Israel.