Galasia
Galatians
Tè̤hébè Ré̤ Dố Nyě
Ǔ lě hésodônyǎ Jesǔ a tè̤thè́krṳ̂̌mila rò Judaphú má̤to tahe zṳ̂́enyá̤eka̤ kuô̌ tahe. Phúnuôrò thyáphú kayǎ tôprè̤prè̤ ki htwǒhtya má̤lakǒ Krístuphú tôprè̤nuô a bè krwǒlṳ̂ me̤kuô̌ Mosè a tè̤thyótè̤thya è̌, ma a bè krwǒlṳ̂ me̤ to è̌ nuô, ngó̤sudyǎ ohtya phúnuô tahe. Rò Paulu kryá̤sû ná lo krwǒlṳ̂ me̤kuô̌ to. Tè̤ohtwǒprè̤ dố Krístu akǔ yěnuô, a lodulố ǔ ma tû́prè́ tè̤zṳ̂́ prè́ rò Cò́marya dyacò́dyate̤ lǔ ná atè̤zṳ̂́ prè́. Manárò kayǎ o dố Galasia ké̤, Romaké̤ a tè̤pốlè̤̌, Asia Minor ké̤dukǔ prè̤zṳ̂́etè̤plò́mṳ tahe aklè̌ tahehenuô a htésû Paulu rò a hé lahyǎ ná thyáphú Cò́marya ki dyacò́dyate̤ kayǎ tôprè̤ agněnuô, a bè krwǒlṳ̂me̤ tuố̤kuô̌ pó̤ Mosè a tè̤thyótè̤thya tahe.
Thyáphú Galasiaphú dố a krwǒzṳ̂́thû́ kuô̌ ǔ ithyóithya thû́ lǔ nuôtahe ki zṳ̂́ ka̤khyětǒ ka̤khyěbè khyěthyá agněnuô, Paulu rǎcuố pé̤ Galasiaphú tahe li yětôba prè́. A cáhtya héplǒ pé̤ré̤lố ǔ ná Cò́marya è́ má̤lakǒ lǔ ná Jesǔ Krístu a Prè̤dônyǎphú tôprè̤. Prè̤lu hekhuphú dố a o ná a taryěshyosò̌ tôprè̤prè̤ è́ vǎ má̤to, Cò́marya è́ vǎ dố vǎ ki htwǒhtya Prè̤dônyǎphú tôprè̤ rò a è́ khódû vǎ dố vǎ ki bème̤ dố Judaphú má̤to tahe aklè̌ a héluô̌plǒ pé̤ ǔ phúnuô. Yětôphuốrò a hé ná Cò́marya dyacò́dyate̤ prè̤lu kayǎ ná a tè̤zṳ̂́e tôcô tû́ prè́, a cyé̤pryě̤ kryá̤sû ǔ phúnuô. Li Galasia Amǎ̤du dố khyělốǔ tahenuô, Paulu dyéluô̌ ná bí pè̤ zṳ̂́ehò́ Krístu akhè̌nuô, pè̤ ki mo̤ Cò́marya ná kayǎ dố aruôtahe. Rò bí pè̤ mo̤hò́ Cò́marya ná kayǎ dố aruô tahe akhè̌nuô, pè̤ Krístuphú a tè̤dyathudyathè́ tahenuô a ki ryáhyǎ pǎ.
Tè̤hébè tôtó̤ ná tôtó̤
Tè̤hébè ré̤ dố nyě 1:1-10
Paulu ní̤bè tè̤taryěshyosò̌ dố a htwǒ hò́ Prè̤dônyǎphú tôprè̤ 1:11-2:21
Cò́marya abwídu taryěhtǔ a tè̤thè́krṳ̂̌mila 3:1-4:31
Krístuphú ní̤bè tè̤palǎ ná a tè̤phyétè̤me̤ 5:1-6:10
Tè̤hébè dố khyě tadû 6:11-18
1
1-2 Vǎ ma Paulu, liyětôba ma vǎ rǎ prè́. Vǎ ma Prè̤dônyǎphú tôprè̤. Kayǎ tômṳmṳ nò̌htwǒhtya vǎ ná Prè̤dônyǎphú má̤to. Htuô̌to, vǎ htwǒhtya Prè̤dônyǎphú dố kayǎ tôprè̤prè̤ a takhukǔ má̤to to. Jesǔ Krístu ná Phè̌ Cò́marya dố a me̤htwǒprè̤ ka̤khyě Jesǔ Krístu dố tè̤thyě nuôtôprè̤ nò̌htwǒhtya vǎ ná Prè̤dônyǎphú tôprè̤ prè́. Htuô̌rò puố̤vyá̤ Krístuphú lò̌꤮ plǐ dố a o kuô̌ ná vǎ bíyě tahe, thǔhyǎ pé̤ a tè̤hémo̤héryá yětahe dố Galasia ké̤ prè̤zṳ̂́etè̤ plò́mṳphú tahe a o.
3 Pè̤ Phè̌ Cò́marya ná Byacè Jesǔ Krístu ki dyédû thǐ tè̤bwídutè̤taryěhtǔ ná thè́plò a tè̤kacṳ́kabè́ ní꤮. 4 Thyáphú Krístu ki me̤lwóhteka̤ pè̤ ná yětôhtû̌ a tè̤mǔmyá̤ricyá̤ tahe agněnuô, a dyélya̤kyǎ hò́ a thè́htwǒprè̤ dố pè̤ tè̤thû́tè̤ora ki plwǒkyǎ agně hò́. Phú a Phè̌ Cò́marya thè́zṳ̂́ nò̌me̤ lǔ tahenuô, a me̤htuô̌hò́. 5 Pè̤ ki me̤lǐme̤takhè̌htya Cò́marya acṳ́cṳ́ ahtû̌htû̌ pó꤮. Amèn.
Tè̤thè́krṳ̂̌mila Otû́ Tôcôtuô̌
6 Dố thǐkhuthǐkhyě rò vǎ khyéthukhyéthè́ nyacò́, me̤těhérò, anyě̤꤮ rò anyě̤ tyahíto rò, thǐ dyakyǎkhyě Cò́marya dố a è́ thǐ ná Krístu abwíataryě yětôprè̤. Rò thǐ phyésû tè̤ithyóithya aruô tôcô dố thǐ tane̤ ná tè̤thè́krṳ̂̌mila yěnuô. 7 Ki hélakǒ ma tè̤thè́krṳ̂̌mila dố aruô nuô a o pǎ tôcô꤮ to hò́, manárò kayǎ dố a me̤dídòdídyǎ thǐ thè́plò rò a thè́zṳ̂́ buô̌taple khókyǎ Krístu a tè̤thè́krṳ̂̌mila nuô a o tahe. 8 Manárò pè̤ bèbè, tanémò́khuphú tôprè̤prè̤ bèbè, ki hésodônyǎ tè̤thè́krṳ̂̌mila dố a ki khódû ná pè̤ hésodônyǎ htuô̌pé̤hò́ thǐnuô tahe hénuôma Cò́marya ki cirya dû è pǎ ní꤮. 9 Dố aré̤khè̌ nuôma pè̤ héhtuô̌hò́ thǐ hò́ rò khǒnyá̤yě vǎ hé khyěthyá thǐ, kayǎ tôprè̤prè̤ dố a ki hésodônyǎ pé̤ thǐ tè̤thè́krṳ̂̌mila dố a khódû ná thǐ phyésû htuô̌hò́nuô hénuôma, Cò́marya ki ciryadû è pǎ ní꤮.
10 Vǎ hé phúyě nuôma athyáná vǎ yácû́ krwǒlṳ̂ kuô̌ prè̤lukayǎ athè́plò phúnuô è̌? Vǎ thè́zṳ̂́ krwǒlṳ̂ kuô̌ prè̤lukayǎ athè́plò phúnuô má̤to. Vǎ thè́zṳ̂́ krwǒlṳ̂kuô̌ phú Cò́marya athè́plò nuôprè́. Vǎ ki yácû́ lṳ̂me̤mo̤ tadûpǎ prè́ prè̤lukayǎ tahe athè́plò prè́ hénuôma, vǎ ma Krístu a prè̤me̤tè̤phú tôprè̤ má̤to.
Paulu Htwǒhtya Prè̤dônyǎphú Tôprè̤ Ari-akyǎ
11 Puố̤vyá̤thǐ, vǎ thè́zṳ̂́ nò̌thè́gněkuô̌ thǐ ná tè̤thè́krṳ̂̌mila dố vǎ hésodônyǎ pé̤ thǐ yěnuô, tè̤thè́krṳ̂̌mila yěnuôma prè̤lukayǎ me̤htwǒhtya è má̤to. 12 Vǎ ní̤bè dố prè̤lukayǎ a o nuô má̤to. Ǔ ithyó pé̤ vǎ tôprè̤꤮ to. Prè̤ dố a dyéluô̌htya pé̤ vǎ yěnuôma má̤dû Jesǔ Krístu prè́.
13 Bí vǎ lṳ̂krwǒkuô̌ Judaphú tahe a tè̤cò́bucò́bè̌ akhè̌nuô, vǎ ohtwǒprè̤ phútě nuôma thǐ thè́gně htuô̌dûhò́. Vǎ me̤cyě̤me̤cṳ̂ kayǎ dố a zṳ̂́e Jesǔ Krístu tahe, rò vǎ yácû́ pṳ̌ me̤pyéme̤kyǎ cò́ èthǐ cò́. 14 Htuô̌rò phú Judaphú tahe a tè̤cò́bucò́bè̌ lé̤klǒlé̤khya onuô, vǎ pṳ̌thè́gně cyá̤dèklò̌ ná Judaphú dố ana krṳ̂nya̤ ná vǎ nuôtahe dố nyěcò́, htuô̌to dố vǎ muố̤phè̌phyěphuô̌ má̤hò́ Judaphú alé̤klǒ tahe agněnuô, vǎ thè́plòshyo nyacò́cò́. 15 Manárò, bí vǎ opacè̤̌lya̤ tyahíto akhè̌nuô, Cò́marya nwóhtya htuô̌hò́ vǎ ná abwídu-ataryěhtǔ hò́, rò a è́ hò́ vǎ dố vǎ ki me̤ pé̤ lǔ tè̤me̤ hò́. 16 Thyáphú vǎ ki hésodônyǎ pé̤ Judaphú má̤to tahe ná Krístu a tè̤thè́krṳ̂̌mila agněnuô, Cò́marya thè́plòo ná a ki dyéluô̌htya pé̤ vǎ ná aphúkhǔ. Bínuôkhè̌, vǎ kwǐ ná kayǎ a tè̤dyéthè́gně zṳ̌klyázṳ̌klǒ cwó̤ vǎ tôprè̤꤮ to. 17 Vǎ cuố myáhtyenò́ Prè̤dônyǎphú dố a htwǒhtya ré̤ ná vǎ dố a o lahyǎ dố vǐ̤ Jerusalem akǔ nuôtahe tôphuố꤮ to. Má̤tôkhónuô, vǎ cuố tôphuốcuố dố꤮ Arabia ké̤ htuô̌rò vǎ ka̤khyě khyěthyá dố vǐ̤ Damasco akǔ prè́.
18 Thuô̌na htuô̌rò vǎ htya dố vǐ̤ Jerusalem. Thyáphú vǎ ki cuốolě bò́thyó thè́gněkuô̌ ná Petru rò vǎ cuố prè́. Rò vǎ cuố okuô̌ ná è bínuô shyényǎ̤nyě prè́. 19 Vǎ myáhtye Prè̤dônyǎphú dố aruô tôprè̤꤮ to. Vǎ myáhtye tû́prè́ Byacè apuố̤ Jakomo prè́. 20 Lò̌꤮ vǎ rǎ pé̤ thǐ yětahe nuôma atǒ prè́. Vǎ lahǒ to nuôma Cò́marya thè́gně prè́. 21 Dốkhyě nuô vǎ cuố dố Syria ké̤ ná Cilicia ké̤kǔ. 22 Bínuôakhè̌, prè̤zṳ̂́etè̤ plò́mṳphú dố Juda ké̤kǔ nuôtahe thè́gněhí vǎ to. 23 Èthǐ ní̤huô̌ prè́ ǔ hé pé̤ èthǐ, “Kayǎ dố a me̤cyě̤me̤cṳ̂ htuô̌hò́ pè̤ dố nuôkhè̌ tôprè̤nuô, khǒnyá̤rò a hésodônyǎ pé̤ kuô̌ hò́ ǔ ná tè̤zṳ̂́tè̤nyá̤ dố a pṳ̌ me̤pyéme̤kyǎ dố꤮ nuôkhè̌ nuôtôkuô hò́.” 24 Dố vǎkhuvǎkhyě rò èthǐ htuthè́htya lahyǎ hò́ Cò́marya hò́.