1 Migkeǥiyan ni Moises is menge pengulu te menge tribu te Israel te, “Iyan heini menge suǥù te Nengazen: 2 Emun ebpenaad etawa ebpenangdù is sevaha he maama diyà te Nengazen he ebeelan din etawa kenà haazà is sevaha he vaal he midtendek din, kinahanglan he edtumanen din is langun he mibpengaǥi zin.

3 “Emun duen betan-en he vahi he ziyà gihapun ed-ubpa te ed-ubpaan te amey zin he ebpenaad etawa ebpenangdù te kebaal etawa kenà kebaal te vaal he midtendek din, 4 ne netuenan heini te amey zin piru wazà lalag te amey zin mehitenged kayi, kinahanglan he edtumanen din heini. 5 Iyan, emun mibelevaǥan heini te amey zin dutun te kegketueni zin kayi, ne kenà kinahanglan he edtumanen din. Ebpeseyluwen sikandin te Nengazen emun kenè din edtumanen su mibelavag kandin is amey zin.

6 “Penenglitan neesawa is sevaha he vetan-en he vahi he zaan en he ebpenaad etawa ebpenangdù he ebeelan din etawa kenè din ebeelan is sevaha he vaal. Minsan kenà tinutuuwà is kebpenaad din, 7 emun kenà haazà ebelevaǥan te esawa zin dutun te kegketueni zin duen, kinahanglan he edtumanen duen te vahi is penaad din. 8 Piru emun ebelavag is esawa zin dutun te kegketueni zin duen, ne kenè en kinahanglan he edtumanen din haazà, minsan pa ke tekew en sikandin nenaad he wazè din mepurung meisip etawa nepurung din meisip-isip, ne ebpeseyluwen sikandin te Nengazen.

9 “Emun is sevaha he valu he vahi etawa bahi he midsuwayan te esawa zin ebpenaad etawa ebpenangdù he ebelan din etawa kenà is sevaha he vaal he midtendek din, kinahanglan he edtumanen din heini.

10 “Emun ebpenaad etawa ebpenangdù is bahi he zuen din esawa te kebaal etawa kenà kebaal te vaal he midtendek din, 11 ne mibpereremek dà is esawa zin dutun te kegketueni zin kayi su wazè din heini belevaǥi, kinahanglan he edtumanen dutun te vahi haazà. 12 Iyan, emun ebelavag is esawa zin dutun te kegketueni zin kayi, kenè en kinahanglan he edtumanen din heini. Ebpeseyluwen sikandin te Nengazen su mibelavag man kandin is esawa zin. 13 Umbe, is maama, zuen din ketenged te kedtuǥut etawa kedwazà te minsan hengkey he impenaad etawa impenangdù te esawa zin. 14 Iyan, emun wazà mebelavag haazà is maama zutun te esawa zin dutun te andew te kegketueni zin, pinaaǥi kayi netuǥutan din is esawa zin he edtumanen din heini. 15 Iyan, emun impelavey pa zutun te maama is nepipira he andew ne human sikandin mebelavag, ne iyan egkesilutan haazà is maama te ereg pezem te esawa zin.”

16 Iyan heini menge sulunuzen he imbeǥey te Nengazen diyà te ki Moises mehitenged te teleesawa, wey mehitenged te amey wey is anak din he vetan-en he vahi he ziyè pa ed-ubpà te kandin.