1 Midlaus medhipanew is menge Israilihanen taman te nekeuma zan diyà te suǥud te Moab. Ne migkampu zan diyà te zapit te edsilaan te Jordan, he etuvangan te Jerico.

2 Ne netuenan te hadì diyà te Moab he si Balak he anak ni Zipor, is langun he mibeelan te menge Israilihanen diyà te menge Amorihanen, 3 ne nahandek sikandin wey is menge Moabitanhen tenged te kahabet te menge Israilihanen.

4 Migkaǥi is menge Moabitanhen diyà te menge perezumala ziyà te Midian te, “Ed-eminen kiw kayi te mahabet he menge etew he henduen be te vaka he ed-eminen dan edtebtava is menge sagbet.”

Umbe, si Balak he anak ni Zipor, he iyan hadì diyà te Moab dutun he timpu, 5 mibpesuǥuan din te menge menunudtulà si Balaam he anak ni Beor he meǥinged diyà te Petor he iyan tanà he mid-enakan kandin, he uvey te wahig he Eufrates. Iyan heini menge lalag ni Balak:

“Duen menge etew he ebpuun diyà te Ehipto, utew sikandan mahabet ne kayi zan med-ubpà te uvey zey. 6 Umbe hendini ka ǥuntaan ne rewaki nu heini he menge etew, su edhuna sikandan he gemhanan kenami. Su kela ke mezaag ku zed sikandan ne egkesegseg ku puun kayi te tanè ku. Su netuenan ku he egketuman is ibpenuvadtuvad nu wey is idrawak nu te minsan hentei.”

7 Umbe, migenat is menge perezumala ziyà te Moab wey Midian he uwiten dan is ibayad ki Baalam. Midtudtulan dan heini te migkaǥi ni Balak. 8 Ne migkaǥi si Balaam diyà te kandan te, “Kayi kew zà hizeǥà guntaan he kezukileman, ne egkeǥiyen ku ziyà te keniyu keeselem is egkeǥiyen te Nengazen kayi te kedì.” Umbe ziyà medhizeǥà haazà is menge pengulu te Moab.

9 Ne mid-insà is Megbevayà diyà te ki Balaam, “Hentei heini is duma nu he menge etew?” 10 Midtavak ni Balaam is Megbevayà te, “Menge menunudtulà sikandan he midsuǥù ni Balak he hadì te Moab, he anak ni Zipor. Iyan heini menge lalag din: 11 ‘Duen menge etew he ebpuun diyà te Ehipto he utew mezakel. Umbe hendini ka ǥuntaan ne rewaki nu sikandan para kedì. Su kela ke mezaag ku zed sikandan ne egkesegseg ku pehendiyà te meziyù.’ ”

12 Piru migkeǥiyan te Megbevayà si Balaam te, “Kenè ka zuma kandan. Ne kenè nu rewaki haazà is menge etew he egkeǥiyen dan, su midtuvazan ku sikandan.”

13 Ked-enew ni Balaam hein meselem, migkeǥiyan din sikan is menge pengulu ni Balak te, “Ulì kew en nasì diyà te nasyun niw su kenà edtuǥut is Nengazen ke eduma a keniyu.”

14 Umbe, midlikù haaza is menge pengulu te Moab diyà te ki Balak he ke sikandan te, “Wazà meduma kenami si Balaam.”

15 Ne mid-uman medsuǥù si Balak te edhuna pa he mahabet he menge pengulu wey edhuna pa he dungganen duen te nehuna he midsuǥù din. 16 Midhendiyè dan te ki Balaam he ke sikandan te,

“Iyan heini migkaǥi ni Balak he anak ni Zipor: ‘Kenè nu mehimuwa he zuen ebpekevelavag kenikew te kedhendini. 17 Edsuhulan ku sikew wey ebeelan ku is minsan hengkey he egkeǥiyan nu. Pekelalaglalag ka ne hendini ke en ne rewaki nu heini he menge etew para kediey.’ ”

18 Piru midtavak sikandan ni Balaam te, “Minsan ibeǥey pa kedì ni Balak is turuǥan din he nepenù te pelata wey vulawan, kenà egkehimu ke edrepasen ku is suǥù te Nengazen he Megbevayè ku, dekelà etawa zeisey he vaal. 19 Piru kayi kew zà dèpa hizeǥà guntaan he kezukileman iring te mibeelan te zuma he menge zuma niw, su kela he zuen pa zuma he egkeǥiyen te Nengazen kayi te kedì.”

20 Dutun he kezukileman migkaǥi is Megbevayà diyà te ki Balaam te, “Geina te midhengkayi en man heini is menge etew su edumahan ke zan, duma ke en nasì kandan, piru iyan nu zà beeli is egkeǥiyen ku.”

21 Umbe, hein meselem in-andam ni Balaam is asnu zin ne miduma zuen te menge pengulu te Moab, 22 duma is dezuwa he suluǥuen din. Piru zutun te edhipanew en si Balaam, utew nepauk is Megbevayà, umbe midhitindeg is belinsuǥuen te Nengazen diyà te zalan su ed-alang kandan. 23 Ne hein naahà duen te asnu he midhitindeg is belinsuǥuen te Nengazen diyà te zalan he egkulang te ispada, midsuwey heini zuen te zalan ne ziyà mebayà te vevesukà. Umbe mibpenlagkut heini ni Balaam su wey medlikù duen te zalan.

24 Ne midhitindeg sikan is belinsuǥuen te Nengazen diyà te meliǥet he ibayà su nekepetug-elang te zezuwa he verengbeng te pemuleey te paras. 25 Hein naahà duen te asnu sikan is belinsuǥuen te Nengazen utew heini mibpekilid duen te verengbeng ne nelipit is paa ni Balaam. Umbe mid-umanan din heini penlegkuta.

26 Ne midhipanew ziyà te egkehunaan sikan is belinsuǥuen te Nengazen ne midhitindeg diyà te meliǥet he lugar he wazè en duen egkeeliǥuwan diyà te zapit te kewanan etawa givang. 27 Ne hein naahà duen te asnu haazà is belinsuǥuen te Nengazen midleku en heini; utew nepauk si Balaam, ne mibpenlagkut din heini te tuked din. 28 Ne zutun impekaǥi te Nengazen haazà is asnu, migkaǥi heini te, “Hengkey ves is neveelan ku ziyà te kenikew maan is ketetelu ad kenikew penlegkuta?” 29 Midtavak ni Balaam haazà is asnu te, “Midhimu a kenikew he tulebung! Angin ke zuen ku ispada su edhimetayan ku en sikew ǥuntaan.” 30 Migkeǥiyan duen te asnu si Balaam, “Kenè be iyan a asnu nu he layun nu ed-untuzi? Mibeelan ku ve heini ziyà te kenikew zutun te nehuna he timpu.” Midtavak si Balaam te, “Wazà.”

31 Ne zutun impaahà te Nengazen ki Balaam is belinsuǥuen din he edhithitindeg diyà te zalan is egawed te ispada. Umbe midluhud si Balaam diyà te tanà.

32 Mid-insà kandin haazà is belinsuǥuen te Nengazen, “Maan is ketetelu nu en penlegkuta is asnu nu? Midhengkayi a te ked-alang kenikew su mezaat diyà te etuvangan ku is baal nu. 33 Naahà a te asnu nu ne midlikayan e zin te ketetelu. Emun wazà heini medlikey kediey, midhimetayan ku en pezem sikew ne kenè ku mulà edhimetayan is asnu nu.”

34 Migkeǥiyan ni Balaam haazà is belinsuǥuen te Nengazen te, “Nekesalà a! Wazè ku metueni he midhitindeg ke ves keniyan te ked-alang kedì. Emun mezaat diyà te kenikew is ebeelan ku, ne ed-ulì ad.”

35 Migkaǥi haazà is belinsuǥuen te Nengazen te, “Duma ka keniyan te menge etew, piru iyan nu zà keǥiya is egkeǥiyen ku ziyà te kenikew.” Umbe miduma si Balaam dutun te menge pengulu ni Balak.

36 Ne hein netuenan ni Balak he ebpelinggume en si Balaam, midsinuǥung sikandin diyà te sevaha he inged diyà te Moab he uvey te Arnon he dulunà te tanè din.

37 Migkaǥi si Balak diyà te ki Balaam te, “Kenè be migkaǥi a he ibpeǥaanggaan ka? Maan is wazè ka mediritsu medhendini? Egkeisip nu ve he kenè ku sikew edsuhulan?” 38 Midtavak si Balaam te, “Nekeuma ad. Piru wazè ku egkekaǥi ziyà te kenikew gawas te ibpekaǥi kedì te Megbevayà.”

39 Ne miduma si Balaam ki Balak pehendiyà te Kiriat Huzot. 40 Ne hein nekeuma zan nemuhat si Balak te vaka wey kerehidu. Imbeǥey zin is usa ki Balaam wey te menge pengulu he zuma zin. 41 Ne sunud he andew, miduma ni Balak si Balaam diyà te Bamot Baal, ne nepantew zin diyà te alug is duma he menge Israilihanen.