1 Iyan heini keguǥuza mehitenged te menge vaal ni Nehemias he anak ni Hacalia.

Hein ikesiyam he vulan he iyan kes bulan he Kislev, duen te ike-20 he tuig te kedhadì ni Artaserkses diyà te Persia, diyà a te vinerengbeng he inged he Susa. 2 Midhendiyà te kedì si Hanani is sevaha te menge suled ku; ebpuun sikandin diyà te Juda duma te nepipira he menge maama. Mid-insaan ku sikandan mehitenged te Jerusalem wey te menge Judio he vihag te Babilonia he nemenlikù diyà. 3 Midtavak dan te, “Ebpemenlised is menge nemenlikù diyà te Juda, ne ebpeel-elezan sikandan te menge etew ziyà te peliǥuy zan. Ne taman en guntaan wazè pa mepurungi is berengbeng te Jerusalem wey neepur is menge pultahan din.”

4 Ne hein nezineg ku haazà, mibpinuu a is midsineǥew. Nepipira he andew is kedlalew ku, kebpuasa ku, wey kebpengemuyù ku ziyà te etuvangan te Megbevayà diyà te langit. 5 Ke siak te, “Nengazen he Megbevayà diyà te langit, mekeǥeǥehem ka wey egkein-inuwan he Megbevayà. Edtumanen nu is paaǥi nu te kebpekid-uyun duma is kebmahala nu te menge ebmahal kenikew wey edtuman te menge suǥù nu. 6 Siak is suluǥuen nu, ebpengemuyù a ziyà te kenikew te maandew wey mezukilem para te menge etew ziyà te Israel he menge suluǥuen nu. Pemineǥa a wey tevaka nu is ampù ku. Idtug-an ku kenikew is menge salà te menge Israilihanen, ragkes en is kedì he menge salà wey is menge salà te menge kepuun ku. 7 Mezaat is menge vaal zey ziyà te kenikew. Wazè dey tumana is menge suǥù nu wey menge sulunuzen he imbeǥey nu kenami pinaaǥi ki Moises he suluǥuen nu.

8 “Tentenuzi nu heini is nekaǥi nu ziyà te ki Moises he: ‘Ibpeyapat ku sikiyu ziyà te zuma he menge nasyun emun kenè kew ebpezumazuma kediey. 9 Piru emun edlikù kew zini te kediey ne edtumanen niw is menge suǥù ku, minsan ebpekepeyapat kew pa ziyà te kinemeziyuan he menge lugar, ed-umanan ku sikiyu edtiǥuma ziyà te lugar he mibpilì ku he zutun a ebeǥayi te zengeg.’

10 “Menge suluǥuen key kenikew wey menge etew nu he midlibri nu pinaaǥi te zekelà he ǥehem nu wey zesen nu. 11 Nengazen, pemineǥa nu is ampù ku te suluǥuen nu, wey is ampù te zuma he menge suluǥuen nu he igkelipey zan is kedtehuza kenikew. Pengelinteuwi nu he ituǥut te hadì is edhengyuen ku ziyà te kandin. Ne verakat he purungi e zin.”

Dutun he timpu, iyan a edsilbi te vinu ziyà te hadì.