1 Maranai mai Israel au Shittim i mamae, nelara i vikarei da Moab waivinei i viawawanei. 2 Wei waivine, nelara i riwei da i nei da ai god awarii puloi i apuapui.* Wei kauai lamna god ḡelauna i raraudunelei, ma lamnei Moab waivinei ai vitumaḡana nanare i eraerawa. Maranai Israel nelarai wei waivinei maiteni i viviawawana, taui ai god Baal i raraudunelei ma i vovoagui da ai dobu ita viaiaini da ita maura. Ma anatapui i am gogona ma ai godna i raudunelei. 3 Wei kauanei mai Israel Baal-Peor i voepaepai ma lamnei Bada ana meji i vikalai.

4  Bada Moses i riwei i pa, “Babadai anatapui ona vaia ma madeḡai Bada au matana ona viraḡena-naiei, da tau au meji awarimi ina dauva.”

5 Ma Moses Israel babadai i riwei i pa, “Taumi tagotagogi ava ami au dam anatapui da Baal-Peor i raudunelei ona viraḡeni.”

6  Moses ma Israel patarana Bada ana numa gara au metaeta i toutou, ma au matai oroto Israeliei wavine Midianei i taravaina-ruiei ana au numa gara. 7 Maranai Aaron ḡoḡana pirisi wavana Phineas wei kauana i ʼnananai, boru i voterei ma pawasi i lavui, 8 ma Israel iei i votaḡoi da ana au numa gara ma pawasiei uporana i tonai da wavine au uporana i opu-vivira. Ma doriana apoapoena au Israel i kwa. 9 Wate wei gimna rava 24,000 i viraḡeni.

10  Bada Moses i riwei i pa, 11 “Aaron ḡoḡana pirisi Phineas au meji mai Israel awari i viubai; da taui eḡa ata pupuni aubaina tauna ana nota me tau au nota, rava eḡa god ḡelaui ina voepaepaei anina Tau ava. 12 Lamna aubaina tauna ma riwei da maiteni parivainuaḡana bagibagina ana kauei da ata ruaḡa tana viturana vivira. 13 Tau aubaiu ina vipirisi nonoa.”