4 Taui ola Hor i netawanei ma boga lebalebarina etanaina i vaia da Edom ita vorei. Au etanai rava amloi i ḡaiḡai aubaina ai vaḡai i manawa, 5 ma Moses ma God i eni i pa, “Aiwai aubaina Egyptei o taravaina-opunelai da au mutulua ana iraḡe? Ai lam eḡa! Ai waira eḡa! Ma wei lam tagogina manna a amgeduaiei.”

6 Ma Bada mota ḡaiḡaiawai i paritawanei awari ma maḡamaḡaui i ani ma i ʼraḡe. 7 Rava i nei Moses awarina ma i riwa, “Tauai ḡoʼapoapoena a kauei maranai Bada ma tam a parivireviremi. Ma raupari da Bada mota ina vaitawanei.” Ma Moses i raupari rava aubaii.

8 Ma Bada Moses i riwei i pa, “Mota ḡaiḡaiawana kokoitauna ma kauei ma ai au damona ma raḡini. Maranai mota, rava aiai i ani ma i taepai da mota kokoitauna i ʼnanai, ma tauna ina lawana.” 9  ✡ 2Ki 18:4Ma Moses mota bronzei i kauei ma ai au damona i raḡini. Maranai mota aiai i ani ma ravana i taepai da mota i ʼnanai ma i lawana!

10 Mai Israel i nae ma au Oboth i rauḡaravu. 11 Ma Oboth i netawanei ma i nae au Iye-Abarim i mae, wei lamna mutulua, Moab au naona au maramatanei. 12 Kampa da i nae Zered au wapuna i rauḡaravu. 13 Ma wei dobuna i netawanei ma i nae waira Arnon au baba ḡelauna au mutulua mai Amori ai au parata. (Moab ma Amori ai dobu au poui wei wairana e viviparata).

21 Ma mai Israel taupariverena i paritawanei da Sihon mai Amori ai gulau i pariverei i pa, 22 “Tauai a ḡoei da am au dobu ata verautua. Tauai eḡa ana deḡa ami au wapu bo grape wapuna, bo ami au waira dogona waira ana umai. Tauai gulau ana au etanai ava ana babara da am dobu paratana ana opu-tawanei.”

23 Wate gulau Sihon mai Israel eḡa ita vianinei da ana au dobu ita verautua. Ma ana sorodia anatapui i tami ma i nae au mutulua da Israel ita nebelei. Au Jahas i ḡeta da Israel maiteni i viḡaiḡaiawa. 24 Wate mai Israel i virewapana ma gulau Sihon i viubai ma ai dobu waira Arnon i ḡae da waira Jabok ana parata i vaia, wei kampa mai Ammon au dobu e viviparata. Mai Ammon ai parata i gagaloana-kauei ma lamna aubaina mai Israel eḡa ai au dobuna ita rui. 25 Ma mai Israel i viḡavia da, mai Amori ai melagai i vaipai da i maeni, taon Heshbon ma melagai ḡelaui kampa maiteni i vaia.

31 Nanare mai Israel mai Amori ai dobu i vaia ma kampa i mae 32 Ma Moses tauivu i paritawanei da Jaser taon i tuvirevirei, ma muriai mai Israel i nae ma ai melaḡai anatapui i vaia ma mai Amori kampa maemaei i viaḡaḡana-opunei. 33 Ma mai Israel i vira ma etanaiei i ḡae au Bashanei. Ma Bashan ai gulau Og ai sorodia anatapui maiteni i opui da taui i nebelei au Edrei. 34 Ma Bada Moses i riwei i pa, “Eḡa tauna ma rovoei, aubaina tauna, ana rava anatapui, ma ai dobu maiteni au uram a tereterei. Aiwai u kauei Amori ai gulau Sihon awarina, au Heshbon taon, nanare gulau Og awarina ma kauei.” 35 Ma gulau Og i viraḡeni natunatuna nelarai ma rava anatapui i viraḡena-pai, eḡa aiai ita mae. Ma mai Israel dobuna i vaia da ai dobu.