1 Wei au marai Bada eḡa rava awari ita bababani bo ai au rauboni bo ai au inana ita vivieḡana-melei, mara tagotagogi ava wei i tuputupua. Tevera Samuel Eli i voagui ma Bada awarina i vitaunola.

2  Eli matana i apoapoe kaua ma eḡa ita inainana kaua. Ma waguvara tagogi ana au gabu i matamatave. 3 Ma Samuel Bada ana au numa i matamatave Parivainuaḡana bokisina au ririvana ma God ana rampa au Gabu vivivireina i ararata. 4 Ma Bada Samuel i ḡorei, “Samuel!”

Ma Samuel i paribelei i pa, “Ee tau weka!”

5 Ma i vomairi ma i ruba Eli awarina ma i riwa, “U ḡoreu da a nei.”

Eli i riwa, “Eḡa ata ḡorem, ma nae me da ma matave.”

6 Ma Bada i viḡore me, “Samuel!”

Samuel i vomairi me ma i ruba Eli awarina ma i riwa, “U ḡoreu da a nei.”

Eli i riwa, “Natu tau eḡa ata ḡorem ma nae me da ma matave.”

7  Bada eḡa Samuel awarina ita babani dadana lamna aubaina ponana eḡa ita aramanei.

8 Anina ma mara vitonuina Bada i viḡore ma Samuel i vomairi ma i nae Eli awarina ma i riwei, “U ḡoreiu da a nei.”

Anina ma Eli i aramanei da lamna Bada tevera i ḡoreḡorei. 9 Ma Samuel i riwei, “Ma nae me da ma matave. Mepa da ina viḡore me lamna wenanare ma riwei, ‘Bada ma babani, am taunola a rarautaniḡana.”

Anina ma Samuel i nae me da i matave.

10 Ma Bada i nei ma i mairi ma i viḡore me au naona i kaukaueia nanare, “Samuel, Samuel!”

Samuel i paribelei i pa, “Ma babani am taunola a rarautaniḡana.”

11 Ma Bada Samuel i riwei, “Tau kaua vivi-inirovorovo kaukauana ana kauei mai Israel awarii ma maranai rava riwana ina nonori taui orai ina sisi. 12 Rorova a riwa nanare, Eli ana numa ravai maiteni ana kovoḡi. 13 A riwana-guratei da ana numa ravai ana kovoḡa-nonoei aubaina natunatuna i vijiboḡiu ma i vinimalamalaiu ma tauna natunatuna i vibae-naenaelei. 14 Riwa bagibaginei a ririwa da Eli ana numa ravai ai ḡoʼapoapoe eḡa melanai ana nota-tawanei. Avena da pulo ina apui awariu.”

15  Samuel ana au aravi i mae da mara i tom ma Bada ana numagara metaetai i votawatawanei. Bada aiwai Samuel i riwei tauna i rovo da Eli ita pariverei. 16 Wate Eli Samuel i ḡorei i pa, “Samuel natu.”

Ma i paribelei i pa, “Tau weka.”

17  Eli i paridadana, “Bada aiwai i riwem? Anatapuna ma riweiu ma eḡa lamna Bada ina kovoḡa-guratem!” 18 Anina ma Samuel anatapuna i riwei, eḡa aiwai ita tajijini. Ma Eli i riwa, “Tauna Bada, ma aiwai awarina i jijimana ina kauei.”

19  Bada Samuel i mae-ratui maranai i rarata ma Samuel aiwai i ririweia ma nanare i tuputupua. 20 Ma Israel au giana da au giana, au Dan i vikarei da au Beersheba, anatapui i aramanei da Samuel lamna Bada ana peroveta. 21 Mara i maḡa Bada au Shiloh Samuel awarina i eḡa ma i babani.