Kayëte kigëna nte kerëhnëkëhni Pol vëvë Korent
Wade yehëhna hnë iŋi kayëte
Afaƴik Pol cery sali mbë Korent ŋa kerëhnëk iŋi kaỹëte kigëna, wati nte nkeho Masedëwan hna hnë bëhn wafëhw imbëɗ g'imbëɗ ma hnë bëhn wafëhw mbëɗ g'imbëɗ gë ryaw̃ (55 gë 56) ga ndëcëk hnagi Yesu ỹa.
Pol pëmpëhnahnëkawo nkwëryëla ntëw̃u ŋa gë vële hwëtahnëk vëvë Korent va antë nko nëfa. Atufahnëd hnatah lëw̃u w̃a soŋe imaw̃ëhn ntëw̃ hni ŋa. Nësëɗ soŋe wameh wante kitiŋëk kaỹëte ndënkwëryënkw ntëw̃u hna do g'idëkwa catah ntëw̃ hni ŋa; nkabahnëk soŋe ile nkok ƴina njëkihni ỹa; kamënaỹehnëɗëhëhni vëvë Korent va mbarëni koryi ndemahnënihëhni vëvë cery sali mbë Yerusalem ŋa hnë uhorot lëw̃ hni hna; Pol nkwëryëk vëryampo hnë vëhni vëw̃aw̃ëna soŋe ile ntiyak had afaƴik do tëfëka pacëna.
Pol nësëɗ hnë iŋi kayëte soŋe yas rarëna lëw̃u ile ñaɗ njihahn njëkihni vëvë Korent va (12.14; 13.1).
Wëlin wanës waɗaw̃ wakwëhn nafa hn'iŋi kayëte: ɗoku, Pol, wanës, fanka, toña, ikwëtahn, iƴir.
Wëlin gante nke kayëte ka:
Simpaỹi gë cëmb (1.1-11)
Pol nkwëcëtëk ile ñaɗëho nti ỹa (1.12–2.17)
Soŋe kwëtëla kasëk (3.1–7.1)
Uhnatah Pol (7.2-16)
Uhwëhna nëf (8.1–9.15)
Idëkwa Pol soŋe vële hnëw̃ëɗëha (10.1–11.15)
Horot ile yehaw̃o Pol ỹa (11.16–12.21)
Siyab rëkwa Pol (13.1-14)
1
1 Ami Pol, afaƴik Yesu Këris ỹa yehahnëɓu kaɓi W̃ënu ŋa ỹak koyëna. Gë aỹënta fu ỹa, Timote, nkeɓun. Kerëhnëryiɗerun w̃uhnë vëvë cery sali W̃ën nte ye Korent ŋi do gë fop vële hwëtahnëka Yesu hn'inkal Akayi va fop. 2 Araɓi W̃ënu ŋa, Rëm fu ỹa g'Ahwëhn a Yesu Këris ndëwanihu do njëɗënihu ƴam ỹa!
Pol camehnëɗëha W̃ënu ŋa
3 Cëmbënëfuna W̃ënu ŋa, Rëm Ahwëhn fu ỹa Yesu Këris, Rëm fu le fëɓëka kaỹëhnahn ŋa, ale hamënaỹehnëɗëhëfu kwëlëkwël! 4 Kamënaỹehnëɗëhëfu hnë horot fu hna fop soŋe mëkin fuhnë fëna kamënaỹehninëhni fop horot hna, njëɗayinëhni ikamëna nte hnuỹayinëk fuhnë dënk hnë W̃ën hna. 5 Do gante korotëntëɗerun ɗus wahorot Këris w̃a, koyëna fëna Këris njëɗaɗëhëfu ikamënaỹehn ƴaɓah. 6 Age korotëɗëfun, soŋe ahnuỹahnu ikamënaỹehn ŋa ye do gë ipeh iŋa; ge kamënaỹehniɓun, soŋe ahnuỹahnu ikamënaỹehn nte yaw̃ënaỹehnëɗëhu ye gante korotërun gë fuhnë ki. 7 Ikwëtahn fu soŋe hun ŋa njaw̃ëk. Ha, njëtëɓun gante nkentëɗerun hnë horot lëw̃ fu ka, nuỹantëɗerun fëna kamënaỹehn nte hnuỹaɗëfun hna.
8 Ha, vëỹënta fu, ñaɗëfun ayëtu horot sankaf ile ryuñënaɓun hn'inkal Asi hna: horot fu ỹa ntënëkëfuno ɗus, ntëbëkëfuno fanka, ntiyahnëkëfuno dënk cëmëɗëfun. 9 Ha, ntiyahnëkëfuno iɗaw̃ fu ŋa fëhnayik. Nkeho koyëna soŋe antë hwëtahn fu vankaf fu va dënk, ɓare W̃ën hunte w̃atëndëɗëhëhni vësëm ŋa fo hwëtahnëɓunëho. 10 Umë fehëtëkëfu iŋi cëm do mbokëɗ pehëtëfu kat; ha, pacëkëfu nkoɗ pehëtëndëfu. 11 W̃uhnë fëna ndemaɗunëhëfu fac-wo-fac g'iƴëfa hun ŋa. Koyëna, nuỹaɗëfun W̃ën hna ufërënak lëw̃u w̃a soŋe iƴëfa nte njëfanëhnënihëfu vahnë vëyaɓah na do vëyaɓah camehnëɗëniha W̃ënu ŋa soŋe ufërënak ule njëɗakëfu ỹa.
Pol nkwëcëtëk ile ñaɗëho nti ỹa
12 Wëlin ile hnatëndanëkëfu ỹa: vinahan fu va ntañak soŋe ile yasëɓun ɗuniỹa li, do kas hnë w̃uhnë. Njasëɓun gë ipacëna do gë toña nte w̃atik hnë W̃ën; gena gë uyët vahnë, ɓare g'ipërëna W̃ënu ŋa nke. 13-14 Vile ỹaɗerun afëƴayiwu ỹa umë herëhnëryiɗerun, gena ihaw̃ary. Gaki nkwëryërun wëɗampo do ntiyahnëko ile w̃ëryëɗun padëɗ fac ryampo. Koyëna natëɗëhu gë fuhnë had gante natëɗëhëfu gë w̃uhnë ki hnë fac Ahwëhn a Yesu.
15 Kwëtahnëɓuho watac do soŋe umë ñaɗëfuho yiryiwu wahwënta wahi ỹal hun hna, soŋe natu g'ahaw̃ary. 16 Ñaɗëfuho rëfëryiwu ỹal hun hna age njiɗëfu gë Masedëwan, tac ge matiɓu hnam, ỹalun hna ñaɗëfuho vokaju. Tac ge matëɓu ỹalun hna ñaɗëfuho aryemawuno fere yiwu Yuɗe. 17 Ante pëhnaɓuho watac ŋa, ntiyahnëkuno bi wakihnah ye? Wante fëhnaɗëfu ŋa nahan vahnë fo bi ye, vële nësëɗ: bi «ha» bi «hali» ndampo fo?
18 W̃ënu ŋa umë dënk njëtëk wapacëk: wante hnësënderun ŋa gena «Ha» do «Hali» ndampo fo. 19 Aju W̃ënu ŋa, Yesu Këris, ale fëƴahnëɓun ami gë Silas do gë Timote ỹalun ỹa ƴijëlohna soŋe ntehn «Ha» do «Hali» ndampo fo. Wadëw̃u ŋa, «Ha» fo yeho. 20 Yesu ye «Ha» fop wante nësëko W̃ënu ŋa ntiɗ. Awa ge muntaɗen gë w̃ac Yesu ntehnëɗen «Amina», cëmbahnina W̃ënu ŋa. 21 Do W̃ënu ŋa umë dënk yaw̃ënëɗëhëfu gë w̃uhnë, hnë ɓëmënkël fu gë Këris hna. W̃ënu ŋa, umë dënk rëhnakëfu, 22 iyavëta lëw̃u yëɗakëfu, Iƴir Ipacah, nte kwëtëk ŋa vintaw̃ary fu hna, nke dahëse ile rufëɗëhëfu paryi nuỹaɗen viỹë vile ñaɗ njëɗafu va.
23 Awa age nurun ga nkoɓu ɓokala gë Korent kaɓi kaỹëhnahnëko gë w̃uhnë ye. Araɓi sëmu ge mërëɗëfu! W̃ënu ŋa ye seɗe ntaw̃ary mën ŋa. 24 Ƴëkëlehnëlëfuhna yefu vësankaf hun, alehniwu gante ntiɗun kwëtahn hun ŋa. Ikwëtahn hun ŋa njaw̃ëk! Ɓare ñaɗëfun ryokuŋëntifu soŋe uhnatah hun w̃a.